حضرت مغیرہ سے مروی ہے کہ حضرت عمر بن عبد العزیز دیہاتیوں سے نصف صدقات وصول فرماتے اور نصف ان کے فقراء میں لوٹا دیتے۔ [مصنف ابن ابي شيبه/كتاب الزكاة/حدیث: 10954]

حضرت ابن عون فرماتے ہیں کہ حضرت سالم بن عبد اللہ، حضرت عمر رضی اللہ عنہ کا صدقہ تقسیم فرمایا کرتے تھے۔ ان کے پاس اچھی ہیئت والا ایک شخص آتا جس کو وہ پہلے عطا کر چکے ہوتے، وہ کہتا کہ مجھے عطا کرو تو وہ اس کو عطا فرماتے اور اس سے سوال نہ فرماتے۔ [مصنف ابن ابي شيبه/كتاب الزكاة/حدیث: 10955]

حضرت عبد الرحمن بن عمرو بن سہل فرماتے ہیں کہ میں نے حضرت عثمان رضی اللہ عنہ کو مکہ کے راستہ میں دیکھا۔ اور زکوٰۃ کے مویشی ان کے ساتھ ہانکے جا رہے تھے۔ حضرت عثمان راستے میں رہ جانے والے پیادہ مسافر کو ان پر سوار کردیتے۔ [مصنف ابن ابي شيبه/كتاب الزكاة/حدیث: 10956]

حضرت شریک بن نملہ فرماتے ہیں کہ حضرت علی رضی اللہ عنہ نے مجھے صدقات و زکوٰۃ وصول کرنے کیلئے بھیجا، میرا بھائی بھی میرے ساتھ ہوگیا۔ راوی کہتے ہیں کہ میں نے اپنے بھائی کو اونٹ پر سوار کردیا، میں نے کہا اگر حضرت علی رضی اللہ عنہ نے اجازت دیدی تو ٹھیک ہے وگرنہ یہ میرے مال میں سے ہے۔ جب میں واپس آیا تو حضرت علی رضی اللہ عنہ کو اپنے بھائی کا قصہ سنایا آپ نے فرمایا: اس میں تیرا بھی حصہ ہے۔ [مصنف ابن ابي شيبه/كتاب الزكاة/حدیث: 10957]

حضرت سالم، حضرت اسلم سے روایت کرتے ہیں کہ حضرت عمر رضی اللہ عنہ نے ان کو زکوٰۃ کے اونٹ دے کر حمی مقام کی طرف بھیجا۔ حضرت اسلم فرماتے ہیں کہ جب میں واپس لوٹنے لگا تو فرمایا ان کو میرے سامنے پیش کر، میں نے اس حال میں پیش کیا کہ ان میں سے ایک اونٹنی پر میرا سامان تھا۔ آپ نے (غصہ میں) فرمایا تیری ماں نہ رہے۔ تو نے ایسی اونٹنی کا قصد کیا جو مسلمانوں کے ایک گھرانے کو زندہ رکھ سکتی ہے اور اس پر اپنا سامان لاد دیا، کیا بہت زیادہ پیشاب کرنے والا ابن لبون یا کم دودھ دینے والی اونٹنی نہ تھی (اس کام کیلئے)۔ [مصنف ابن ابي شيبه/كتاب الزكاة/حدیث: 10958]

حضرت ابوہریرہ رضی اللہ عنہ فرماتے ہیں کہ غلاموں میں زکوٰۃ نہیں ہے مگر اس غلام میں جس کا تو مالک ہے۔ [مصنف ابن ابي شيبه/كتاب الزكاة/حدیث: 10959]

حضرت زیاد بن ابی مریم اپنی والدہ سے روایت کرتے ہیں کہ وہ فرماتی ہیں: میں حضرت عبد اللہ بن ارقم رضی اللہ عنہ کے پاس آئی۔ وہ حضرت عمر اور حضرت عثمان کی امارت میں بیت المال (کے نگران) تھے۔ اور وہ مدینہ میں صدقہ (زکوٰۃ) تقسیم فرما رہے تھے، جب انہوں نے مجھے دیکھا تو فرمایا: اے ام زیاد تو یہاں کیوں آئی؟ تو میں نے جواب دیا کہ جس مقصد کے لیے باقی لوگ آئے ہیں میں بھی اسی مقصد سے آئی ہوں۔ انہوں نے پوچھا کہ کیا تو آزاد ہوچکی ہے؟ میں نے جواب دیا کہ نہیں، تو انہوں نے کسی کو گھر بھیجا جو چادر لے کر آیا۔ آپ نے وہ مجھے دے دی۔ لیکن صدقہ (زکوٰۃ) میں سے کچھ نہ دیا۔ کیونکہ میں اس وقت مملوکہ تھی۔ [مصنف ابن ابي شيبه/كتاب الزكاة/حدیث: 10960]

حضرت مجاہد فرماتے ہیں کہ ان کالے (غلاموں کو) اپنی قربانیوں میں سے مت کھلاؤ۔ یہ تو اہل مکہ کے اموال ہیں۔ [مصنف ابن ابي شيبه/كتاب الزكاة/حدیث: 10961]

حضرت لیث سے مروی ہے کہ حضرت سالم بدو غلاموں پر صدقہ کرنے کو ناپسند سمجھتے تھے۔ [مصنف ابن ابي شيبه/كتاب الزكاة/حدیث: 10962]

حضرت عباس بن عبد الرحمن المدنی فرماتے ہیں کہ نبی کریم صلی اللہ علیہ وآلہ وسلم دو عادتیں اپنے اہل میں سے کسی کے سپرد نہ فرماتے تھے۔ ایک یہ کہ مسکین کو اپنے ہاتھ سے عطا فرماتے تھے، اور دوسرا اپنے وضو کا پانی خود رکھتے تھے۔ [مصنف ابن ابي شيبه/كتاب الزكاة/حدیث: 10963]