حضرت شعیب فرماتے ہیں کہ ایک شخص حضرت عبد اللہ بن عمرو رضی اللہ عنہ کے پاس آیا اور دریافت کیا کہ ایک شخص نے حالت احرام میں بیوی سے شرعی ملاقات کرلی ہے؟ آپ نے حضرت عبد اللہ بن عمر رضی اللہ عنہما کی طرف اشارہ کردیا کہ ان سے دریافت کرو، وہ شخص ان کو نہیں جانتا تھا، حضرت شعیب فرماتے ہیں کہ میں اس کے ساتھ ان کے پاس گیا اور پھر ان سے دریافت کیا؟ آپ نے فرمایا اس کا حج باطل ہوگیا ہے، اس نے عرض کیا تو کیا وہ بیٹھ جائے؟ آپ نے فرمایا نہیں بلکہ وہ لوگوں کے ساتھ جائے اور جس طرح لوگ کرتے ہیں اسی طرح کرتا رہے، پھر جب آئندہ سال آئے تو حج کی قضاء کرے اور قربانی کرے، حضرت شعیب فرماتے ہیں کہ ہم دونوں حضرت عبد اللہ بن عمرو رضی اللہ عنہ کی خدمت میں آئے اور آپ کو خبر دی، پھر حضرت عبد اللہ بن عمرو رضی اللہ عنہ نے ہمیں حضرت ابن عباس رضی اللہ عنہما کے پاس بھیجا۔ [مصنف ابن ابي شيبه/كتاب الحج/حدیث: 13550]

حضرت شعیب فرماتے ہیں کہ پھر میں اس کے ساتھ حضرت ابن عباس رضی اللہ عنہما کی خدمت میں حاضر ہوا تو اس نے ان سے دریافت کیا؟ حضرت ابن عباس رضی اللہ عنہما نے بھی وہی فرمایا جو حضرت ابن عمر رضی اللہ عنہما نے فرمایا تھا، پھر وہ شخص حضرت عبد اللہ بن عمرو رضی اللہ عنہ کے پاس واپس آیا اور آپ کو خبر دی۔ [مصنف ابن ابي شيبه/كتاب الحج/حدیث: 13551]

پھر اس شخص نے حضرت عبد اللہ بن عمرو رضی اللہ عنہ سے دریافت کیا کہ آپ کی کیا رائے ہے؟ آپ نے فرمایا وہی جو ان دونوں حضرات کی ہے۔ [مصنف ابن ابي شيبه/كتاب الحج/حدیث: 13552]

حضرت سعید بن المسیب ایسے شخص کے متعلق فرماتے ہیں کہ وہ چلیں اور اپنے حج کو مکمل کریں اور جہاں سے چاہیں لوٹ جائیں، پھر جب آئندہ سال آئے تو وہاں سے حج کے لیے احرام باندھیں جہاں سے انہوں نے اس حج کا احرام باندھا تھا جسے فاسد کیا تھا اور دو قربانیاں کریں اور دونوں جدا ہوجائیں۔ [مصنف ابن ابي شيبه/كتاب الحج/حدیث: 13553]

حضرت مجاہد اور حضرت عطاء فرماتے ہیں کہ وہ دونوں حج مکمل کریں اور ہر ایک پر ایک دم ہے اگرچہ ایک ان دونوں کی طرف سے کافی ہو، اور ان پر آئندہ سال حج کرنا ہے لیکن وہ دونوں آئندہ سال علیحدہ علیحدہ نہ ہوں گے۔ [مصنف ابن ابي شيبه/كتاب الحج/حدیث: 13554]

حضرت حسن اس شخص کے متعلق جو بیوی سے حالت احرام میں شرعی ملاقات کرے جدا ہونا ضروری نہیں سمجھتے۔ [مصنف ابن ابي شيبه/كتاب الحج/حدیث: 13555]

حضرت حکم اور حضرت حماد ایسے شخص کے متعلق فرماتے ہیں کہ اپنا حج مکمل کریں ان پر دو قربانیاں ہیں اور آئندہ سال حج کی قضائ، پھر جب وہ آئندہ سال اس جگہ پر پہنچ جائیں جہاں یہ معاملہ رونما ہوا تھا تو علیحدہ علیحدہ ہوجائیں پھر جب تک احرام نہ کھول لیں آپس میں ملاقات نہ کریں۔ [مصنف ابن ابي شيبه/كتاب الحج/حدیث: 13556]

حضرت ابراہیم فرماتے ہیں کہ ان میں سے ہر ایک پر اونٹ قربانی کرنا ہے۔ [مصنف ابن ابي شيبه/كتاب الحج/حدیث: 13557]

حضرت علقمہ فرماتے ہیں کہ ان میں سے ہر ایک پر دم ہے۔ [مصنف ابن ابي شيبه/كتاب الحج/حدیث: 13558]

حضرت عطاء فرماتے ہیں کہ ان دونوں کے درمیان ایک اونٹ ہے۔ [مصنف ابن ابي شيبه/كتاب الحج/حدیث: 13559]