حضرت مجاہد سے دریافت کیا گیا کہ ایک شخص نے خود حج نہیں کیا ہوا تو کیا وہ دوسرے شخص کے لیے کرسکتا ہے؟ آپ نے فرمایا یہ حج اس کے اور اس کے ساتھی کی طرف سے کافی ہوجائے گا۔ [مصنف ابن ابي شيبه/كتاب الحج/حدیث: 13860]

ابوبکر (ابن ابی شیبہ) فرماتے ہیں کہ صرورہ سے مراد وہ شخص ہے جس نے کبھی حج نہ کیا ہو۔ [مصنف ابن ابي شيبه/كتاب الحج/حدیث: 13861]

حضرت حسن اس میں کوئی حرج نہیں سمجھتے تھے کہ ایک شخص نے پہلے خود حج تو نہ کیا ہو لیکن وہ کسی کے لیے حج کرے۔ [مصنف ابن ابي شيبه/كتاب الحج/حدیث: 13862]

حضرت سعید بن المسیب فرماتے ہیں کہ اللہ تعالیٰ اس ایک حج کو ہی دونوں کی طرف سے وسیع فرما دے گا (اور دونوں کی طرف سے قبول کرے گا)۔ [مصنف ابن ابي شيبه/كتاب الحج/حدیث: 13863]

حضرت مجاہد سے دریافت کیا گیا کہ کوئی شخص حج اور عمرے کا احرام باندھے اور اس کی بیوی بھی حج و عمرے کا احرام باندھے اور پھر وہ آپس میں شرعی ملاقات کرلیں، آپ نے فرمایا: وہ دونوں اپنے حج و عمرے کو جاری رکھیں اور ہر ایک پر قربانی لازم ہے اور آئندہ سال حج وعمرہ کی قضاء لازم ہے اور آئندہ سال اس جگہ سے نہ گزریں جہاں یہ واقعہ پیش آیا تھا۔ [مصنف ابن ابي شيبه/كتاب الحج/حدیث: 13864]

حسن سے دریافت کیا گیا کہ کوئی شخص حج وعمرہ کا احرام باندھے ہو اور وہ بیوی سے شرعی ملاقات کرلے؟ آپ نے فرمایا: اس پر دو اونٹوں کی قربانی ہے۔ [مصنف ابن ابي شيبه/كتاب الحج/حدیث: 13865]

حضرت عطاء فرماتے ہیں کہ حج قران کرنے والا ہو یا قران کرنے والا نہ ہو شکار کی جزاء میں وہ دونوں برابر ہیں۔ [مصنف ابن ابي شيبه/كتاب الحج/حدیث: 13866]

حضرت عطاء سے دریافت کیا گیا کہ محرم اگر شرعی ملاقت کرنے کے بعد دوسری بار پھر کرلے تو؟ آپ نے فرمایا کہ اس پر ایک ہی قربانی لازم ہے۔ [مصنف ابن ابي شيبه/كتاب الحج/حدیث: 13867]

حسن سے دریافت کیا گیا کہ محرم یکے بعد دیگرے بیوی سے ہمبستری کرے، آپ نے فرمایا: اگر اس نے قربانی کرنے سے پہلے اور یہ جاننے سے پہلے کہ اس پر کیا لازم ہے، اس طرح کیا تو اس پر ایک ہی قربانی ہے۔ [مصنف ابن ابي شيبه/كتاب الحج/حدیث: 13868]

حضرت ابن عمر رضی اللہ عنہما سے عرفہ کے دن روزہ رکھنے کے متعلق دریافت کیا گیا؟ آپ نے فرمایا: میں نے نبی اکرم (صلی اللہ علیہ وآلہ وسلم) کے ساتھ حج کیا تو آپ صلی اللہ علیہ وآلہ وسلم نے اس دن کا روزہ نہیں رکھا، میں نے حضرت ابوبکر صدیق کے ساتھ حج کیا آپ نے بھی اس دن روزہ نہیں رکھا، میں نے حضرت عمر کے ساتھ حج کیا آپ نے بھی اسی دن روزہ نہیں رکھا، میں نے حضرت عثمان کے ساتھ حج کیا آپ نے بھی اس دن روزہ نہیں رکھا اور میں خود بھی نہیں رکھتا، باقی میں تمہیں نہ اس کا حکم دیتا ہوں اور نہ ہی اس سے منع کرتا ہوں۔ [مصنف ابن ابي شيبه/كتاب الحج/حدیث: 13869]