حضرت عکرمہ مزارعۃ بالثلث اور ربع کو ناپسند فرماتے تھے۔ [مصنف ابن ابي شيبه/كتاب البيوع والأقضية/حدیث: 22576]

حضرت ابراہیم رحمہ اللہ مزارعۃ بالثلث اور ربع کو ناپسند فرماتے تھے۔ [مصنف ابن ابي شيبه/كتاب البيوع والأقضية/حدیث: 22577]

حضرت جابر رضی اللہ عنہ زمین کرایہ پر دینے کو ناپسند کرتے تھے۔ [مصنف ابن ابي شيبه/كتاب البيوع والأقضية/حدیث: 22578]

حضرت طاؤس فرماتے ہیں کہ زمین کرایہ پر نہ دی جائے، نہ ایک بیج کے بدلے، یا فرمایا: نہ مٹی کے ایک ڈھیلے کے بدلے۔ [مصنف ابن ابي شيبه/كتاب البيوع والأقضية/حدیث: 22579]

حضرت رافع بن خدیج رضی اللہ عنہ سے مروی ہے کہ حضرت ابو رافع رضی اللہ عنہ رسول اکرم صلی اللہ علیہ وسلم کی خدمت سے ہمارے پاس تشریف لائے، اور فرمایا کہ رسول اکرم صلی اللہ علیہ وسلم نے ہمیں ایک ایسے کام سے منع فرمایا جو ہمارے لیے سہولت کا باعث تھا، لیکن اللہ اور اس کے رسول کی اطاعت ہمارے لیے زیادہ سہولت والی بات ہے۔ آپ نے اس بات سے منع فرمایا ہے کہ ہم میں سے کوئی کھیتی باڑی کرے، سوائے اپنی مملوکہ زمین کے یا ایسی زمین کے جو کوئی شخص بلا معاوضہ کام کے لیے دے دے۔ [مصنف ابن ابي شيبه/كتاب البيوع والأقضية/حدیث: 22580]

حضرت ضحاک بن مزاحم فرماتے ہیں کہ زمین کی صرف دو ہی صورتیں درست ہیں، وہ زمین جو اس کے رقبہ کا مالک آدمی تمہیں عارضی طور پر دے دے یا وہ زمین جسے تم نے معین مدت کے لئے معین اجرت پر لیا ہو۔ [مصنف ابن ابي شيبه/كتاب البيوع والأقضية/حدیث: 22581]

ابراہیم فرماتے ہیں کہ کھیتی باڑی کا بہترین اصول یہ ہے کہ آدمی خالی زمین معلوم اجرت کے بدلے کرایے پر لے لے۔ [مصنف ابن ابي شيبه/كتاب البيوع والأقضية/حدیث: 22582]

حضرت مجاہد رحمہ اللہ فرماتے ہیں کہ کھیتی باڑی درست نہیں ہے مگر اس زمین میں جس کے رقبہ کا تو مالک ہو، یا وہ زمین جو کسی نے عارضی طور پر نفع حاصل کرنے کے لئے دی ہو۔ [مصنف ابن ابي شيبه/كتاب البيوع والأقضية/حدیث: 22583]

حضرت رفاعۃ بن رافع ابن خدیج رحمہ اللہ فرماتے ہیں کہ رسول اللہ صلی اللہ علیہ وسلم نے زمین کی مزارعۃ اور اجارہ سے منع فرمایا ہے، مگر یہ کہ آدمی اس کو خرید لے یا اسے عاریۃً دی جائے۔ [مصنف ابن ابي شيبه/كتاب البيوع والأقضية/حدیث: 22584]

پھر فرمایا کہ میرے والد محترم نے ایک شخص کو زمین عاریۃً دی، اس نے اس میں کھیتی باڑی کی اور اس میں ایک عمارت بنا لی، پھر وہ (میرے والد) اس زمین کی طرف نکلے اور عمارت دیکھی اور پوچھا کس نے یہ عمارت بنائی ہے؟ لوگوں نے کہا فلاں شخص نے جس کو آپ نے زمین عاریۃً دی تھی، انہوں نے کہا کہ کیا یہ عوض ہے اس کا جو میں نے اس کو دیا تھا؟ لوگوں نے کہا ہاں، انہوں نے کہا کہ میں یہاں سے نہیں ہٹوں گا جب تک کہ تم لوگ اس کو گرا نہ دو۔ [مصنف ابن ابي شيبه/كتاب البيوع والأقضية/حدیث: 22585]