راوی فرماتے ہیں کہ حضرت عطاء نے فرمایا: شفعہ تو صرف زمین اور گھر میں ہے۔ حضرت ابن ابی ملیکہ نے فرمایا: تیری ماں نہ رہے! تم مجھے سن رہے ہو کہ میں کہہ رہا ہوں کہ رسول اللہ صلی اللہ علیہ وسلم نے یوں فرمایا، پھر بھی تم ایسی بات کہہ رہے ہو؟ [مصنف ابن ابي شيبه/كتاب البيوع والأقضية/حدیث: 24236]

حضرت شعبی گھر کے دو پڑوسیوں کے متعلق فرماتے ہیں۔ اگر دونوں پڑوسی برابر ہوں، تو جو ان میں سے پہل کرے گا (یعنی جو مطالبہ کرنے اور مقدمہ لے جانے میں سبقت کرلے گا) اس کو حق شفعہ حاصل ہے۔ [مصنف ابن ابي شيبه/كتاب البيوع والأقضية/حدیث: 24237]

حضرت شعبی رحمہ اللہ فرماتے ہیں کہ جس شخص کے سامنے اس کی شفعہ والی زمین بیچی جائے اور وہ کوئی اعتراض نہ کرے تو اب اس کو حق شفعہ حاصل نہیں ہوگا۔ [مصنف ابن ابي شيبه/كتاب البيوع والأقضية/حدیث: 24238]

حضرت عامر اور حضرت قاسم اس شخص کے متعلق فرماتے ہیں کہ اس کا گھر فروخت ہو اور وہ خاموش رہے نکیر نہ کرے، فرماتے ہیں اس پر لازم ہوجائے گا اور وہ اس پر جائز ہوگا۔ [مصنف ابن ابي شيبه/كتاب البيوع والأقضية/حدیث: 24239]

حضرت عامر اور حضرت قاسم بن عبد الرحمن خریدار سے فرماتے تھے کہ تو اس بات کا گواہ قائم کر کہ اس کو گھر کو فروخت کیا گیا یہ گواہ تھا (دیکھ رہا تھا) لیکن اس پر نکیر نہ کی۔ [مصنف ابن ابي شيبه/كتاب البيوع والأقضية/حدیث: 24240]

حضرت حکم فرماتے ہیں کہ شفیع اگر خود مشتری کو خریدنے کی اجازت دے اور مشتری خرید لے تو پھر شفیع کو اس پر قبضہ کرنے کا حق حاصل نہیں۔ [مصنف ابن ابي شيبه/كتاب البيوع والأقضية/حدیث: 24241]

حضرت سفیان فرماتے ہیں کہ اس کو شفعہ کرنے کا حق حاصل ہوگا، کیونکہ اس کا حق تو بیع ہونے کے بعد واقع ہوا ہے۔ (ثابت ہوا ہے) [مصنف ابن ابي شيبه/كتاب البيوع والأقضية/حدیث: 24242]

حضرت ابو عثمان فرماتے ہیں کہ حضرت ابن مسعود رضی اللہ عنہ اس بات کو ناپسند کرتے تھے کہ کوئی شخص دراہم کسی کو قرض دے کر اس سے بہتر وصول کرے۔ [مصنف ابن ابي شيبه/كتاب البيوع والأقضية/حدیث: 24243]

حضرت عطاء فرماتے ہیں کہ حضرت ابن عمر رضی اللہ عنہما دراہم قرض لیتے تھے۔ پھر جب انکا وظیفہ (تنخواہ) نکلتی تو اس سے اچھے درہم بدلہ میں ادا کرتے۔ [مصنف ابن ابي شيبه/كتاب البيوع والأقضية/حدیث: 24244]

حضرت أشعث فرماتے ہیں کہ میں نے حسن سے دریافت کیا کہ اے ابو سعید! بڑے (درہم) آتے ہیں، اور میری کچھ پڑوسیاں ہیں۔ ان کے کچھ وظائف مقرر ہیں۔ وہ مجھ سے قرض لیتی ہیں اور دیتے وقت میری نیت یہ ہوتی ہے کہ ان کے درہم بوقت واپسی میری ان دراہم سے اچھے ہوں؟ انہوں نے جواب دیا کہ اس میں کوئی حرج نہیں۔ [مصنف ابن ابي شيبه/كتاب البيوع والأقضية/حدیث: 24245]