حضرت حسن کے بارے میں روایت ہے کہ وہ دودھ اور شہد کے علاوہ تما م ادویات کے پینے کو ناپسند سمجھتے تھے۔ [مصنف ابن ابي شيبه/ كتاب الطب/حدیث: 24968]

حضرت محمد کے بارے میں روایت ہے کہ وہ مر کب دواؤں کے پینے کو ناپسند سمجھتے تھے۔ ہاں مگر جس دوائی کو وہ پہچانتے تھے (اس کو ناپسند نہیں سمجھتے تھے) اور آپ جب کوئی ایسی دوائی لینا چاہتے تو بذات خود اس کا انتظام کرتے۔ [مصنف ابن ابي شيبه/ كتاب الطب/حدیث: 24969]

حضرت ابن معقل کے بارے میں روایت ہے کہ وہ ایسی خبیث دوائی (کے استعمال) کو ناپسند سمجھتے تھے کہ جب وہ آدمی کے اندر جم جائے تو اس کو مار ڈالے۔ [مصنف ابن ابي شيبه/ كتاب الطب/حدیث: 24970]

حضرت ابوہریرہ سے روایت ہے۔ کہتے ہیں کہ رسول اللہ صلی اللہ علیہ وآلہ وسلم نے خبیث دوا سے منع فرمایا۔ [مصنف ابن ابي شيبه/ كتاب الطب/حدیث: 24971]

حضرت عبد الملک بن عمیر سے روایت ہے۔ کہتے ہیں کہ ربیع بن خثیم کو ان کی بیماری میں پوچھا گیا کہ کیا ہم آپ کے لئے طبیب کو بُلائیں؟ انہوں نے فرمایا۔ تم مجھے مہلت دے دو، پھر انہوں نے غور و فکر فرمایا اور کہا: { وَعَادًا وَثَمُودَ وَأَصْحَابَ الرَّسِّ وَقُرُونًا بَیْنَ ذَلِکَ کَثِیرًا وَکَُلاًّ ضَرَبْنَا لَہُ الأَمْثَالَ وَکُلاًّ تَبَّرْنَا تَتْبِیرًا } پھر انہوں نے ان لوگوں دنیا پر حرص اور ان کی دنیا میں دلچسپی کا ذکر کیا، فرمایا: یہ لوگ بھی مریض تھے۔ اور ان میں اطباء بھی تھے۔ پس نہ کوئی دوائی دینے والا باقی رہا نہ کوئی دوائی لینے والا۔ نسخہ بتانے والا بھی ہلاک ہوگیا اور جس کے لئے نسخہ بتایا گیا وہ بھی ہلاک ہوگیا۔ خدا کی قسم! تم لوگ میرے لئے طبیب کو نہ بلاؤ۔ [مصنف ابن ابي شيبه/ كتاب الطب/حدیث: 24972]

محمد کے بارے میں روایت ہے کہ وہ سکربانا (کھجور کے عرق) کو ناپسند کرتے تھے۔ [مصنف ابن ابي شيبه/ كتاب الطب/حدیث: 24973]

حضرت معاویہ بن قرہ سے روایت ہے۔ کہتے ہیں کہ حضرت ابو الدرداء بیمار ہوئے تو لوگ ان کی عیادت کو گئے۔ لوگوں نے ان سے کہا۔ ہم آپ کے لئے طبیب نہ بُلائیں؟ حضرت ابو الدرداء نے فرمایا۔ اس نے تو مجھے بستر پر ڈالا ہے۔ [مصنف ابن ابي شيبه/ كتاب الطب/حدیث: 24974]

حضرت ابراہیم سے روایت ہے۔ کہتے ہیں کہ حضرات اہل علم مسہل دوائی لینے میں کوئی حرج نیں و سمجھتے تھے۔ راوی کہتے ہیں۔ صرف اسی وجہ سے کچھ اہل علم اس کو ناپسند کرتے تھے کہ کہیں یہ مسہل دواء آدمی کو کمزور نہ کر دے۔ [مصنف ابن ابي شيبه/ كتاب الطب/حدیث: 24975]

حضرت عطاء سے روایت ہے۔ کہتے ہیں کہ احرام باندھے ہوئے آدمی کے لئے دست آور دواء استعمال کرنے میں کوئی حرج نہیں ہے۔ [مصنف ابن ابي شيبه/ كتاب الطب/حدیث: 24976]

حضرت شعبی سے روایت ہے۔ کہتے ہیں کہ رسول اللہ صلی اللہ علیہ وآلہ وسلم فرمایا کرتے تھے۔ ”بہترین دواء وہ ہے جو منہ کے گوشہ میں ڈال کر استعمال کی جائے اور وہ دواء جو ناک کے راستے سے لی جائے اور مسہل دواء اور پچھنے لگوانا اور عَلَق۔ جونک لگانا۔ ہے۔ [مصنف ابن ابي شيبه/ كتاب الطب/حدیث: 24977]