حضرت عبد اللہ کے بارے میں روایت ہے کہ وہ قرآن مجد میں سے بھی کچھ (آیت وغیرہ) لٹکانے کو ناپسند کرتے تھے۔ [مصنف ابن ابي شيبه/ كتاب الطب/حدیث: 25008]

حضرت عقبہ بن عامر سے روایت ہے۔ کہتے ہیں کہ انسان اور بچے کے تعویذ کی جگہ شرک ہے۔ [مصنف ابن ابي شيبه/ كتاب الطب/حدیث: 25009]

حضرت ابو مجلز سے روایت ہے۔ کہتے ہیں کہ جس کسی نے کوئی شئی۔ دھاگہ وغیرہ۔ لٹکایا تو اس کو اسی شئی کے سپر د کردیا جائے گا۔ [مصنف ابن ابي شيبه/ كتاب الطب/حدیث: 25010]

حضرت ابراہیم سے روایت ہے۔ کہتے ہیں کہ (پہلے) اہل علم ہر قسم کے تعویذات کو ناپسند سمجھتے تھے چاہے وہ قرآن سے ہوں یا غیر قرآن سے۔ [مصنف ابن ابي شيبه/ كتاب الطب/حدیث: 25011]

حضرت حسن کے بارے میں روایت ہے کہ وہ ان (تعویذات) کو ناپسند سمجھتے تھے۔ [مصنف ابن ابي شيبه/ كتاب الطب/حدیث: 25012]

حضرت مغیرہ سے روایت ہے۔ کہتے ہیں کہ میں نے ابراہیم سے پوچھا۔ مجھے جو بخار ہوتا ہے میں اس سے (بچاؤ کے لئے) یہ آیت: { یَا نَارُ کُونِی بَرْدًا وَسَلاَمًا عَلَی إِبْرَاہِیمَ } اپنے بازو پر (لکھ کر) لٹکا لوں؟ تو ابراہیم نے اس کو ناپسند کیا۔ [مصنف ابن ابي شيبه/ كتاب الطب/حدیث: 25013]

حضرت عبد الرحمن بن ابی لیلیٰ، نبی کریم صلی اللہ علیہ وآلہ وسلم سے روایت کرتے ہیں کہ آپ صلی اللہ علیہ وآلہ وسلم نے فرمایا: ”جس نے تعویذات لٹکائے اور ڈورے باندھے تو یہ شخص شرک کے ایک شعبہ پر عمل پیرا ہے۔ [مصنف ابن ابي شيبه/ كتاب الطب/حدیث: 25014]

ابراہیم سے روایت ہے۔ کہتے ہیں کہ (پہلے) اہل علم تعویذات، دم جھاڑ اور نشرہ (جادو وغیرہ کے علاج کے عمل) کو پسند نہیں کرتے تھے۔ [مصنف ابن ابي شيبه/ كتاب الطب/حدیث: 25015]

حضرت محمد بن سوقہ سے روایت ہے کہ حضرت سعید بن جبیر نے ایک آدمی کو بیت اللہ کے گرد طواف کرتے دیکھا کہ اس کی گردن میں منکا تھا تو آپ نے اس منکے کو توڑ ڈالا۔ [مصنف ابن ابي شيبه/ كتاب الطب/حدیث: 25016]

حضرت سعید بن جبیر سے روایت ہے۔ کہتے ہیں کہ جس آدمی نے کسی انسان سے تعویذ کو توڑا تو یہ (ثواب میں) ایک غلام کی آزادی کے برابر ہے۔ [مصنف ابن ابي شيبه/ كتاب الطب/حدیث: 25017]