حضرت ابن عون فرماتے ہیں کہ حضرت محمد نے ارشاد فرمایا: جب حضرت ابوبکر کو خلیفہ بنادیا گیا تو حضرت علی رضی اللہ عنہاپنے گھر والوں میں بیٹھ گئے۔ پس حضرت ابوبکر کو یہ بتلایا گیا، تو آپ نے ان کو قاصد بھیج کر بلایا اور پوچھا! کیا تم میری خلافت کو ناپسند کرتے ہو؟ علی رضی اللہ عنہ نے فرمایا: نہیں، میں نے آپ کی خلافت کو ناپسند نہیں کیا۔ لیکن قرآن میں زیادتی کی جا رہی تھی، پس جب رسول اللہ صلی اللہ علیہ وآلہ وسلم کی وفات ہوگئی تو میں نے خود پر لازم کرلیا کہ میں چادر نہیں اوڑھوں گا مگر صرف نماز کے لیے، یہاں تک کہ میں قرآن کو لوگوں کے لیے جمع کر دوں۔ تو حضرت ابوبکر نے فرمایا: آپ کی رائے بڑی اچھی ہے۔ [مصنف ابن ابي شيبه/كتاب فضائل القرآن/حدیث: 32233]

امام شعبی فرماتے ہیں کہ حضرت صعصعہ نے ارشادفرمایا: سب سے پہلے قرآن کو دو گتوں کے درمیان جمع کرنے والے اور کلالہ کو وارث بنا نے والے حضرت ابوبکر ہیں۔ [مصنف ابن ابي شيبه/كتاب فضائل القرآن/حدیث: 32234]

حضرت سعید بن ابی سعید فرماتے ہیں کہ حضرت ابی ّ نے ارشاد فرمایا: جب تم اپنے مصاحف کو مزین کرنے لگو گے اور اپنی مساجد کو بناؤ سنگھار سے ملمع کرو گے تو تم پر ہلاکت اترے گی۔ [مصنف ابن ابي شيبه/كتاب فضائل القرآن/حدیث: 32235]

حضرت عکرمہ فرماتے ہیں کہ حضرت ابن عباس رضی اللہ عنہما نے ایک مزین مصحف دیکھا تو فرمایا: اس کے ذریعہ تو تم چور کو دھوکے میں ڈالو گے۔ اس کی زینت تو اس کے اندر ہے۔ [مصنف ابن ابي شيبه/كتاب فضائل القرآن/حدیث: 32236]

حضرت مغیرہ فرماتے ہیں کہ حضرت ابراہیم قرآن کے مزین کرنے کو ناپسند کرتے تھے۔ [مصنف ابن ابي شيبه/كتاب فضائل القرآن/حدیث: 32237]

حضرت ابو وائل فرماتے ہیں کہ حضرت عبد اللہ بن مسعود رضی اللہ عنہ کے پاس سونے سے مزین کیا گیا قرآن لایا گیا تو آپ نے فرمایا: بلاشبہ مصحف کو جس چیز کے ساتھ مزین کیا گیا ہے اس سے زیادہ اچھی چیز وہ حق کے مطابق اس کی تلاوت کرنا ہے۔ [مصنف ابن ابي شيبه/كتاب فضائل القرآن/حدیث: 32238]

حضرت زبرقان فرماتے ہیں کہ میں نے حضرت ابو رزین سے فرمایا: میں چاہتا ہوں کہ میرے پاس ایک مصحف ہے اس کو سونے کی مہر لگا دوں، تو آپ نے فرمایا: قرآن میں دنیا کے اوامر میں کسی چیز کا بھی اضافہ مت کرو تھوڑا نہ زیادہ۔ [مصنف ابن ابي شيبه/كتاب فضائل القرآن/حدیث: 32239]

حضرت سعید بن ابو سعید فرماتے ہیں کہ حضرت ابو ذرّ نے ارشاد فرمایا: جب تم اپنی مساجد کو بناؤ سنگھار سے ملمع کرنے لگو گے اور اپنے مصاحف مزین کرنے لگو گے تو تم پر ہلاکت اتر پڑے گی۔ [مصنف ابن ابي شيبه/كتاب فضائل القرآن/حدیث: 32240]

حضرت ابو الزاھریہ فرماتے ہیں کہ حضرت ابو امامہ قرآن کے مزین کرنے کو ناپسند کرتے تھے۔ [مصنف ابن ابي شيبه/كتاب فضائل القرآن/حدیث: 32241]

حضرت مجاہد فرماتے ہیں کہ میں حضرت عبد الرحمن بن ابی لیلی کے پاس سونے کی ڈلی لے کر آیا تو آپ نے فرمایا: کیا شاید تم اس کے ساتھ قرآن کو مزین کرو گے؟ [مصنف ابن ابي شيبه/كتاب فضائل القرآن/حدیث: 32242]