حضرت محمد بن فضیل فرماتے ہیں کہ ان کے والد حضرت فضیل نے ارشاد فرمایا: حضرت عمر بن عبد العزیز عطیہ مقرر نہیں فرماتے تھے مگر اس شخص کے لیے جس نے قرآن پڑھا ہو۔ اور میرے والد ان لوگوں میں سے تھے جنہوں نے قرآن پڑھا تھا تو ان کے لیے عطیہ مقرر کردیا گیا۔ [مصنف ابن ابي شيبه/كتاب فضائل القرآن/حدیث: 32223]

حضرت یسیر بن عمرو فرماتے ہیں کہ حضرت سعد نے ارادہ کیا کہ جو شخص قرآن پڑھا ہوا ہو اس کے لیے دو دو ہزار مقرر کردیا جائے، تو حضرت عمر نے ان کی طرف خط لکھا: تم اللہ کی کتاب پر اجرت دو گے!۔ [مصنف ابن ابي شيبه/كتاب فضائل القرآن/حدیث: 32224]

محمد فرماتے ہیں کہ کچھ لوگوں نے قرآن یاد کیا یہاں تک کہ ان کی اچھی خاصی تعداد ہوگئی تو حضرت ابو موسیٰ نے اس بارے میں حضرت عمر کو خط لکھا۔ حضرت عمر نے جواب میں لکھا کہ کچھ لوگ قرآن کو دوسروں سے زیادہ یاد کرنے والے ہوتے ہیں۔ اور شاید اس کی قراءت کرنے والے بعض لوگ ایسے مقام پر کھڑے ہوں جو دوسرے کی اس قراءت سے بہتر ہو جو اس پر لازم آخری حد تک ہو۔ [مصنف ابن ابي شيبه/كتاب فضائل القرآن/حدیث: 32225]

حضرت ابراہیم فرماتے ہیں کہ حضرت علی رضی اللہ عنہ ناپسند فرماتے تھے کہ قرآن کو کسی چھوٹے سے مصحف میں لکھا جائے۔ [مصنف ابن ابي شيبه/كتاب فضائل القرآن/حدیث: 32226]

ابراہیم سے حضرت علی رضی اللہ عنہ کا فعل اس سند سے بھی مروی ہے، البتہ اس میں مصاحف کا لفظ ہے۔ [مصنف ابن ابي شيبه/كتاب فضائل القرآن/حدیث: 32227]

حضرت مغیرہ فرماتے ہیں کہ حضرت ابراہیم نے فرمایا: یوں کہا جاتا تھا: قرآن کی تعظیم کرو یعنی اس کو بڑے مصاحف میں لکھو۔ [مصنف ابن ابي شيبه/كتاب فضائل القرآن/حدیث: 32228]

حضرت عبید اللہ بن سلیمان العبدی فرماتے ہیں کہ حضرت ابو حکیمہ العبدی نے فرمایا! ہم کوفہ میں قرآن کو مصاحف میں لکھا کرتے تھے۔ پس حضرت علی رضی اللہ عنہ کا ہم پر گزر ہوا اس حال میں کہ ہم لکھ رہے تھے۔ پس آپ ٹھہر گئے اور فرمایا: اپنے قلم کی نوک کاٹو۔ آپ فرماتے ہیں! میں نے اس کی نوک کاٹی پھر میں نے لکھا، تو آپ نے فرمایا: اس طرح واضح کرو جیسا کہ اللہ نے واضح کیا۔ [مصنف ابن ابي شيبه/كتاب فضائل القرآن/حدیث: 32229]

حضرت علی بن مبارک فرماتے ہیں کہ حضرت ابو حکیمہ العبدی نے فرمایا: ہم کوفہ میں قرآن کو مصاحف میں لکھتے تھے۔ پس حضرت علی رضی اللہ عنہ کا ہم پر گزر ہوا تو وہ کھڑے ہو کر دیکھنے لگے اور ہماری خوش نویسی کو سراہا، اور فرمایا: اسی طرح واضح کرو جیسا کہ اللہ نے واضح کیا۔ [مصنف ابن ابي شيبه/كتاب فضائل القرآن/حدیث: 32230]

حضرت لیث فرماتے ہیں کہ حضرت مجاہد یوں کہنا ناپسند کرتے تھے: چھوٹا سا قرآن۔ [مصنف ابن ابي شيبه/كتاب فضائل القرآن/حدیث: 32231]

حضرت عبد خیر فرماتے ہیں کہ حضرت علی رضی اللہ عنہ نے ارشاد فرمایا: اللہ ابوبکر پر رحم فرمائے، وہ سب سے پہلے شخص ہیں جنہوں نے قرآن کو دو تختیوں کے درمیان جمع کیا۔ [مصنف ابن ابي شيبه/كتاب فضائل القرآن/حدیث: 32232]