حضرت سعید بن جبیر رحمہ اللہ جنگ کے وقت، قرآن کریم کی تلاوت کے وقت اور جنازے کے وقت آواز بلند کرنے کو ناپسند کرتے تھے۔ [مصنف ابن ابي شيبه/كتاب السير/حدیث: 35661]

حضرت عبد اللہ بن ابی اوفیٰ رضی اللہ عنہ نے تحریر فرمایا کہ آنحضرت صلی اللہ علیہ وسلم نے ارشاد فرمایا: دشمن سے ملاقات کی تمنا مت کرو، اللہ سے عافیت مانگو، اور اگر دشمن سے مقابلہ ہوجائے تو اگر بھیڑ ہوجائے یا وہ چیخیں تو تم پر خاموشی لازم ہے۔ [مصنف ابن ابي شيبه/كتاب السير/حدیث: 35662]

حضرت انس رضی اللہ عنہ سے مروی ہے کہ آنحضرت صلی اللہ علیہ وسلم فرمایا: لشکر میں ابو طلحہ کی آواز ایک جماعت سے بہتر ہے۔ [مصنف ابن ابي شيبه/كتاب السير/حدیث: 35663]

حضرت ابومجلز رحمہ اللہ سے مروی ہے کہ آنحضرت صلی اللہ علیہ وسلم جب دشمن سے مقابلہ کیلئے آمنے سامنے ہوتے تو یہ دعا پڑھتے: اللَّہُمَّ أَنْتَ عَضُدِی وَنَصِیرِی، بِکَ أَحُولُ، وَبِکَ أُصُولُ، وَبِکَ أُقَاتِلُ۔ اے اللہ! تو ہی میری قوت اور تو ہی میرا مددگار ہے۔ میں تیری قوت سے حملہ کرتا ہوں اور جھپٹتا ہوں اور تیری قوت سے ہی قتال کرتا ہوں۔ [مصنف ابن ابي شيبه/كتاب السير/حدیث: 35664]

حضرت ابن ابی اوفیٰ رضی اللہ عنہ فرماتے ہیں کہ آنحضرت صلی اللہ علیہ وسلم نے احزاب (دشمن کے لشکروں) کے خلاف یہ دعا فرمائی: اللَّہُمَّ مُنْزِلَ الْکِتَابِ، سَرِیعَ الْحِسَابِ، ہَازِمَ الأَحْزَابِ، اِہْزِمْہُمْ وَزَلْزِلْہُمْ۔ اے اللہ! کتاب کو نازل کرنے والے، جلدی حساب لینے والے، گروہوں کو شکست دینے والے، انہیں شکست دے اور انہیں جھنجوڑ کر رکھ دے۔ [مصنف ابن ابي شيبه/كتاب السير/حدیث: 35665]

حضرت زیاد بن مسلم سے مروی ہے کہ اہل ہند میں سے ایک شخص امان لے کر عدن میں آیا، اس کو ایک مسلمان نے اپنے بھائی کے بدلے قتل کردیا، اس کے متعلق حضرت عمر بن عبدالعزیز کو لکھا گیا، آپ نے تحریر فرمایا: اس کو قتل مت کرو، اس سے دیت وصول کرو اور وہ دیت مقتول کے ورثاء کو بھیج دو، اور اس قاتل کو قید کرنے کا حکم فرمایا۔ [مصنف ابن ابي شيبه/كتاب السير/حدیث: 35666]

حضرت حسن رحمہ اللہ سے مروی ہے کہ مشرکین میں سے ایک شخص حج پر گیا، جب وہ واپس لوٹا تو اس کو ایک مسلمان نے قتل کردیا، آنحضرت صلی اللہ علیہ وسلم نے اس کو (قاتل کو) حکم فرمایا کہ اس کے گھر والوں کو دیت ادا کرو۔ [مصنف ابن ابي شيبه/كتاب السير/حدیث: 35667]

حضرت یوسف بن یعقوب سے مروی ہے کہ ایک مشرک نے مسلمان کو قتل کردیا، پھر وہ امان لے کر آیا تو اس کو اس مقتول کے بھائی نے قتل کردیا، حضرت عمر بن عبدالعزیز نے اس پر دیت کا فیصلہ فرمایا، اس کے مال پر دیت کو واجب کیا اور اس کو جیل میں قید کروا دیا اور دیت کا مال دارالحرب مقتول کے ورثاء کو بھیج دیا۔ [مصنف ابن ابي شيبه/كتاب السير/حدیث: 35668]

عکرمہ اور ابراہیم قرآن کریم کی آیت { وَإِنْ کَانَ مِنْ قَوْمٍ بَیْنَکُمْ وَبَیْنَہُمْ مِیثَاقٌ} کے متعلق فرماتے ہیں کہ: کوئی شخص دارالحرب میں مسلمان ہو اس کو کوئی قتل کر دے تو اس پر دیت نہیں ہے صرف کفارہ ہے۔ [مصنف ابن ابي شيبه/كتاب السير/حدیث: 35669]

ابراہیم اور عکرمہ قرآن کریم کی آیت { وَإِنْ کَانَ مِنْ قَوْمٍ بَیْنَکُمْ وَبَیْنَہُمْ مِیثَاقٌ} کے متعلق فرماتے ہیں کہ: کوئی شخص دارالحرب میں مسلمان ہو اور اس کو کوئی قتل کر دے تو اس پر دیت نہیں ہے اور اس پر کفارہ ہے۔ [مصنف ابن ابي شيبه/كتاب السير/حدیث: 35670]