حضرت شعبی قرآن کریم کی آیت { وَإِنْ کَانَ مِنْ قَوْمٍ بَیْنَکُمْ وَبَیْنَہُمْ مِیثَاقٌ} کے متعلق فرماتے ہیں کہ وہ اہل عہد میں سے ہو اور مومن نہ ہو۔ [مصنف ابن ابي شيبه/كتاب السير/حدیث: 35671]

حضرت ابن عباس رضی اللہ عنہما قرآن کریم کی آیت { وَإِنْ کَانَ مِنْ قَوْمٍ بَیْنَکُمْ وَبَیْنَہُمْ مِیثَاقٌ} کے متعلق فرماتے ہیں کہ اس سے وہ شخص مراد ہے جو عہد میں داخل ہو یا اس کی قوم عہد میں شامل ہو، اس کی دیت ان کو دے دیں گے، اور جس نے اس کو مارا ہے وہ ایک غلام آزاد کرے گا۔ [مصنف ابن ابي شيبه/كتاب السير/حدیث: 35672]

ابراہیم قرآن کریم کی آیت { فَإِنْ کَانَ مِنْ قَوْمٍ عَدُوٍّ لَکُمْ وَہُوَ مُؤْمِنٌ} کے متعلق فرماتے ہیں کہ آدمی مارا جائے اور اس کی قوم مشرک ہو، ان کے اور اللہ کے رسول صلی اللہ علیہ وسلم کے درمیان کوئی معاہدہ بھی نہ ہو، تو مومن غلام کو آزاد کریں گے اور اگر کوئی مسلمان قتل ہوجائے جو ایسی مشرک قوم سے ہو جن کے اور رسول اللہ صلی اللہ علیہ وسلم کے درمیان معاہدہ ہو، تو قاتل پر مومن غلام آزاد کرنا ہے، اور دیت اس کی قوم کو دے دی جائے گی جس کے اور رسول اللہ صلی اللہ علیہ وسلم کے درمیان معاہدہ تھا، اس کی وراثت مسلمانوں کی ہوگی، اس کی دیت مسلمانوں پر ہوگی اس کی مشرک قوم کیلئے جن کے اور اللہ کے رسول صلی اللہ علیہ وسلم کے درمیان معاہدہ ہے، مسلمان اس کی وراثت کے وارث ہوں گے۔ اس کی دیت اس کی قوم کو ملے گی کیوں کہ وہ اس کی طرف سے دیت ادا کرتے ہیں۔ [مصنف ابن ابي شيبه/كتاب السير/حدیث: 35673]

حضرت سعد بن ابی ذباب رضی اللہ عنہ فرماتے ہیں کہ میں نبی کریم صلی اللہ علیہ وسلم کی خدمت میں حاضر ہوا اور مسلمان ہوگیا اور میں نے عرض کیا اے اللہ کے رسول صلی اللہ علیہ وسلم ! میری قوم کیلئے وہ کچھ مقرر فرما دیں جس پر وہ اسلام لائے ہیں، آنحضرت صلی اللہ علیہ وسلم نے ان کیلئے مقرر کردیا۔ [مصنف ابن ابي شيبه/كتاب السير/حدیث: 35674]

حضرت صخر بن عیلہ فرماتے ہیں کہ میں نے حضرت مغیرہ کی پھوپھی کو پکڑ لیا اور اس کو لے کر نبی کریم صلی اللہ علیہ وسلم کی خدمت میں حاضر ہوا، اتنے میں حضرت مغیرہ بن شعبہ رضی اللہ عنہ تشریف لے آئے اور اپنی پھوپھی کا پوچھا، ان کو خبر دی کہ وہ میرے پاس ہے، مجھے رسول اکرم صلی اللہ علیہ وسلم نے بلایا اور فرمایا: اے صخر! جب قوم مسلمان ہوجائے، تو وہ اپنے اموال کو محفوظ کرلیتے ہیں، فرماتے ہیں کہ ہم نے اس کو دے دیا، آنحضرت صلی اللہ علیہ وسلم نے مجھے بنو سلیم کا پانی عطا فرمایا تھا، پس وہ مسلمان ہوگئے اور آنحضرت صلی اللہ علیہ وسلم کی خدمت میں حاضر ہوئے اور پانی کا سوال کیا آنحضرت صلی اللہ علیہ وسلم نے ارشاد فرمایا: اے صخر! جب قوم مسلمان ہوجائے تو وہ اپنی جان اور مال کو بچا لیتے ہیں، پس اس کو واپس کر دے، پس پھر میں نے اس کو واپس کردیا۔ [مصنف ابن ابي شيبه/كتاب السير/حدیث: 35675]

حضرت حسن بن صالح رحمہ اللہ فرماتے ہیں کہ میں نے حضرت عبید اللہ بن عمر رحمہ اللہ سے جنگل، دیہات والوں کے اسلام کے متعلق دریافت کیا؟ آپ نے فرمایا: اھل السواد میں سے جو مسلمان ہوا اگر وہ ذمی تھا (جس کا عہد تھا) زمین اور مال اسی کا ہے اور جو اسلام لایا جس کا کوئی ذمہ نہ تھا، (عہد و معاہدہ نہ تھا) اور وہ بزور بازو فتح ہوا تو اس کی زمین مسلمانوں کیلئے ہے۔ [مصنف ابن ابي شيبه/كتاب السير/حدیث: 35676]

حضرت عبید اللہ فرماتے ہیں کہ یہ حضرت عمر بن عبدالعزیز کے مکتوب میں لکھا ہوا تھا۔ [مصنف ابن ابي شيبه/كتاب السير/حدیث: 35677]

حضرت مجاہد رحمہ اللہ فرماتے ہیں کہ جو بھی شہر بزور بازو فتح ہوا۔ پھر اس کے باشندے اسلام لے آئے تو وہ لوگ آزاد ہوں گے اور ان کا مال مسلمانوں کو ملے گا۔ [مصنف ابن ابي شيبه/كتاب السير/حدیث: 35678]

حضرت ہانیٔ بن یزید ذکر کرتے ہیں کہ میں اپنی قوم کے وفد کے ساتھ رسول اللہ صلی اللہ علیہ وسلم کی خدمت میں حاضر ہوا۔ جب وفد نے اپنے علاقہ کی طرف روانگی کا ارادہ کیا تو آپ صلی اللہ علیہ وسلم نے ان میں سے ہر ایک شخص کو اس کے علاقہ میں اس کی پسندیدہ زمین بطور جاگیر کے عطا فرمائی۔ [مصنف ابن ابي شيبه/كتاب السير/حدیث: 35679]

حضرت زہری فرماتے ہیں کہ جو شخص مسلمان ہوگا وہ اپنے نفس اور مال کو محفوظ کرے گا سوائے زمین کے، اس لیے کہ وہ ایسی حالت میں مسلمان ہوا کہ اس کے پاس اپنے دفاع کی قوت نہ تھی۔ [مصنف ابن ابي شيبه/كتاب السير/حدیث: 35680]