حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا: تم سے پہلے سیاہ رنگ سروں والوں کے لئے غنیمتیں حلال نہیں تھیں۔ آسمان سے آگ اترتی تھی اور غنائم کو کھا لیتی تھی۔ پھر جب بدر کا دن آیا تو لوگوں نے غنائم مں جلد بازی شروع کی۔ تو اللہ نے یہ آیت نازل کی۔ { لَوْلاَ کِتَابٌ مِنَ اللہِ سَبَقَ لَمَسَّکُمْ فِیمَا أَخَذْتُمْ عَذَابٌ عَظِیمٌ، فَکُلُوا مِمَّا غَنِمْتُمْ حَلاَلاً طَیِّبًا }۔ [مصنف ابن ابي شيبه/كتاب المغازي/حدیث: 39503]

حضرت قاسم بن عبد الرحمان سے روایت ہے کہ بدر کے دن اہل اسلام میں سب سے پہلے شہید ہونے والے حضرت مہجع تھے۔ [مصنف ابن ابي شيبه/كتاب المغازي/حدیث: 39504]

حضرت شعبی سے منقول ہے کہ رسو ل اللہ (صلی اللہ علیہ وآلہ وسلم) نے احد کے دن مشرکین کے ساتھ چال چلی تھی۔ اور یہ پہلا دن تھا جس میں آپ صلی اللہ علیہ وآلہ وسلم نے ان کے ساتھ چال چلی تھی۔ [مصنف ابن ابي شيبه/كتاب المغازي/حدیث: 39505]

حضرت عائشہ رضی اللہ عنہا سے روایت ہے کہ جب احد کا دن تھا، مشرکین کو شکست ہوئی تو ابلیس نے آواز لگائی: اے بندگانِ خدا اپنے پیچھے والوں کو دیکھو۔ آگے کے لوگ پلٹے اور پیچھے والوں کے ساتھ لڑ پڑے۔ راوی کہتے ہیں۔ اس دوران حضرت حذیفہ رضی اللہ عنہ نے نظر کی تو اچانک وہاں ان کے والد یمان تھے تو انہوں نے کہا۔ اے بندگانِ خدا! میرے والد۔ میرے والد۔ حضرت عائشہ رضی اللہ عنہا کہتی ہیں۔ بخدا! صحابہ کرام نہ رکے یہاں تک کہ صحابہ نے انہیں قتل کردیا۔ تو حضرت حذیفہ رضی اللہ عنہ نے کہا۔ اللہ تمہاری مغفرت کرے۔ عروہ کہتے ہیں۔ بخدا! حضرت حذیفہ رضی اللہ عنہ میں خیر باقی رہی یہاں تک کہ وہ اللہ سے جا ملے۔ [مصنف ابن ابي شيبه/كتاب المغازي/حدیث: 39506]

حضرت شعبی کہتے ہیں کہ جب احد کا دن تھا اور مشرکین واپس ہوگئے تھے تو مسلمانوں نے اپنے بھائیوں کو بدترین مثلہ کی حالت میں دیکھا۔ مشرکین نے مسلمانوں کے کانوں اور ناکوں کو کاٹا تھا اور ان کے پیٹ چاک کیے تھے۔ نبی کریم صلی اللہ علیہ وآلہ وسلم کے صحابہ نے کہا: اگر اللہ تعالیٰ نے ہمیں ان پر دسترس دی تو ضرور بالضرور ہم بھی ان کے ساتھ (یہی رویہ) اختیار کریں گے۔ اور یہی رویہ اختیار کریں گے۔ اللہ تعالیٰ نے یہ آیت نازل کی۔ { وَإِنْ عَاقَبْتُمْ فَعَاقِبُوا بِمِثْلِ مَا عُوقِبْتُمْ بِہِ، وَلَئِنْ صَبَرْتُمْ لَہُوَ خَیْرٌ لِلصَّابِرِینَ } آپ صلی اللہ علیہ وآلہ وسلم نے فرمایا: بلکہ ہم صبر کریں گے۔ [مصنف ابن ابي شيبه/كتاب المغازي/حدیث: 39507]

حضرت سعید بن مسیب بیان کرتے ہیں کہ احد کی جنگ میں مسلمانوں میں سے سب سے زیادہ لڑائی لڑنے والے حضرت سعد تھے۔ [مصنف ابن ابي شيبه/كتاب المغازي/حدیث: 39508]

حضرت عمیر بن اسحاق سے روایت ہے۔ جنگ احد میں لوگ نبی کریم صلی اللہ علیہ وآلہ وسلم سے دور رہ گئے تھے اور حضرت سعد بن مالک تیر اندازی کر رہے تھے۔ اور ایک جوان انہیں تیر اندازی کے لئے تیر پکڑا رہا تھا۔ پس جونہی ایک تیر چلتا تو وہ دوسرا تیر حضرت سعد کے حوالے کردیتے۔ پھر اس نے کہا۔ اے ابو اسحاق! اس پر تیر پھینکو۔ پھر بعد میں لوگوں نے اس (تیر پکڑانے والے) جوان کو تلاش کیا۔ لیکن لوگوں کو اس جوان پر قدرت نہ ہوئی (یعنی نہیں ملا)۔ [مصنف ابن ابي شيبه/كتاب المغازي/حدیث: 39509]

حضرت علی رضی اللہ عنہ بن ابی طالب سے روایت ہے کہ میں نے سعد کے علاوہ کسی آدمی کے لئے نبی کریم صلی اللہ علیہ وآلہ وسلم کو اپنے والدین کے فدا کہنے کو نہیں سُنا۔ میں نے آپ صلی اللہ علیہ وآلہ وسلم کو احد کے دن سُنا۔ آپ صلی اللہ علیہ وآلہ وسلم فرما رہے تھے۔ اے سعد! تیر پھینکو، میرے ماں، باپ تم پر قربان ہوں۔ [مصنف ابن ابي شيبه/كتاب المغازي/حدیث: 39510]

حضرت سعد بیان کرتے ہیں کہ رسول اللہ صلی اللہ علیہ وآلہ وسلم نے احد کے دن میرے لئے اپنے ماں، باپ کو جمع (کر کے قربان ہونے کا) فرمایا۔ [مصنف ابن ابي شيبه/كتاب المغازي/حدیث: 39511]

حضرت سعد کہتے ہیں میں نے احد کے روز نبی کریم صلی اللہ علیہ وآلہ وسلم کے دائیں جانب اور بائیں جانب دو آدمیوں کو دیکھا جن پر سفدں رنگ کے کپڑے تھے۔ میں نے ان کو اس سے پہلے اور اس کے بعد (کبھی) نہیں دیکھا۔ [مصنف ابن ابي شيبه/كتاب المغازي/حدیث: 39512]