حضرت جابر سے روایت ہے کہ حاطب بن ابی بلتعہ کا غلام نبی کریم صلی اللہ علیہ وآلہ وسلم کی خدمت میں حضرت حاطب کی شکایت کرنے کے لئے آیا اور عرض کیا۔ یا رسول اللہ صلی اللہ علیہ وآلہ وسلم! حاطب ضرور بالضرور آگ میں داخل کیا جائے گا۔ آپ صلی اللہ علیہ وآلہ وسلم نے فرمایا: تو جھوٹ بولتا ہے۔ حاطب، آگ میں نہیں جائے گا۔ (کیونکہ) تحقیق وہ بدر اور حدیبیہ میں حاضر ہوا ہے۔ [مصنف ابن ابي شيبه/كتاب المغازي/حدیث: 39493]

حضرت رافع بن خدیج بیان کرتے ہیں کہ جبرائیل یا کوئی دوسرا فرشتہ آپ صلی اللہ علیہ وآلہ وسلم کی خدمت میں حاضر ہوا اور اس نے پوچھا: جو لوگ بدر میں حاضر ہوئے ہیں۔ انہیں آپ کیا شمار کرتے ہیں؟ آپ صلی اللہ علیہ وآلہ وسلم نے فرمایا: اپنے میں افضل شمار کرتے ہیں۔ اس نے جواب میں کہا: اسی طرح وہ فرشتے ہمارے ہاں بہترین فرشتے ہیں۔ [مصنف ابن ابي شيبه/كتاب المغازي/حدیث: 39494]

حضرت ضحاک سے { وَمَنْ یُوَلِّہِمْ یَوْمَئِذٍ دُبُرَہُ } کے بارے میں منقول ہے کہ یہ حکم خاص طور پر بدر کے دن تھا۔ [مصنف ابن ابي شيبه/كتاب المغازي/حدیث: 39495]

حضرت حسن { وَمَنْ یُوَلِّہِمْ یَوْمَئِذٍ دُبُرَہُ إِلاَّ مُتَحَرِّفًا لِقِتَالٍ، أَوْ مُتَحَیِّزًا إِلَی فِئَۃٍ } کے بارے میں منقول ہے کہ یہ یوم بدر کی خاصیت تھی۔ لشکر سے فرار کبیرہ گناہوں میں سے نہیں ہے۔ [مصنف ابن ابي شيبه/كتاب المغازي/حدیث: 39496]

ابراہیم سے روایت ہے کہ رسول اللہ صلی اللہ علیہ وآلہ وسلم نے عربی کا فدیہ، یوم بدر کو چالیس اوقیہ اور آزاد کردہ غلام (مولیٰ) کا فدیہ بیس اوقیہ مقرر فرمایا تھا۔ ایک اوقیہ چالیس درہم کا ہوتا ہے۔ [مصنف ابن ابي شيبه/كتاب المغازي/حدیث: 39497]

حضرت ابو الزناد سے منقول ہے کہ بدر کے دن عاصم بن منبہ بن حجاج کی تلوار صفی (وہ مقدار جو حاکم تقسیم غنیمت سے قبل اپنے لئے مقرر کرے) بنی تھی۔ [مصنف ابن ابي شيبه/كتاب المغازي/حدیث: 39498]

حضرت جبیر بن مطعم سے روایت ہے کہ میں رسول اللہ صلی اللہ علیہ وآلہ وسلم کی خدمت میں اہل بدر کے فدیہ میں حاضر ہو اتھا۔ [مصنف ابن ابي شيبه/كتاب المغازي/حدیث: 39499]

حضرت ابو العالیہ سے روایت ہے کہ ہم باہم یہ گفتگو کرتے تھے کہ { یَوْمَ نَبْطِشُ الْبَطْشَۃَ الْکُبْرَی } سے مراد بدر کا دن ہے اور دھواں جا چکا ہے۔ [مصنف ابن ابي شيبه/كتاب المغازي/حدیث: 39500]

حضرت عبد اللہ سے روایت ہے کہ بدر کے دن ہم تینوں، عمار، سعد اور میں حاصل ہونے والی غنیمت میں مشترک ہوگئے۔ میں اور عمار تو کچھ بھی نہ لائے جبکہ حضرت سعد دو قیدی بنا کر لائے۔ [مصنف ابن ابي شيبه/كتاب المغازي/حدیث: 39501]

حضرت محمد بن عمرو بن عطاء سے روایت ہے کہ سہیل بن عمرو ایک ایسا آدمی تھا جس کا نچلا ہونٹ پھٹا ہوا تھا۔ جب وہ بدر کے دن قید کر کے لایا گیا تو حضرت عمر بن خطاب نے عر ض کیا۔ یا رسول اللہ صلی اللہ علیہ وآلہ وسلم! میں اس کے سامنے والے نچلے دو دانت اکھیڑ دیتا ہوں تاکہ اس کی زبان باہر نکل آئے اور یہ آپ کی مخالفت میں کسی بھی جگہ بات نہ کرسکے۔ آپ صلی اللہ علیہ وآلہ وسلم نے فرمایا: میں مثلہ نہیں کرتا کہ (بدلہ میں) اللہ تعالیٰ میرا مثلہ فرمائے۔ [مصنف ابن ابي شيبه/كتاب المغازي/حدیث: 39502]