سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے اہل مدینہ کے لیے ذوالحلیفہ کو، اہل یمن کے لیے یلملم کو، اہل شام اور اہل مصر کے لیے حجفہ کو اور اہل عراق کے لیے ذات عرق کو میقات مقرر کیا تھا۔ [سنن الدارقطني/ كتاب الحج/حدیث: 2501]

سیدنا حارث بن عمرو رضی اللہ عنہ بیان کرتے ہیں: میں نبی کریم صلی اللہ علیہ وسلم کی خدمت میں حاضر ہوا، آپ اس وقت منی میں موجود تھے (اس کے بعد انہوں نے پوری حدیث ذکر کی ہے، جس میں یہ بیان کیا ہے) آپ نے اہل یمن کے لیے یلملم کو میقات مقرر کیا کہ وہ لوگ وہاں سے احرام باندھیں گے اور اہل عراق کے لیے ذات عرق کو (میقات مقرر کیا)۔ [سنن الدارقطني/ كتاب الحج/حدیث: 2502]

ابوزبیر بیان کرتے ہیں: انہوں نے سیدنا جابر بن عبداللہ رضی اللہ عنہما کو سنا، ان سے احرام باندھنے کے بارے میں دریافت کیا، تو انہوں نے نبی کریم صلی اللہ علیہ وسلم کے حوالے سے یہ بات بیان کی: ”اہل مدینہ کے لیے احرام باندھنے کی جگہ ذوالحلیفہ ہے، جبکہ دوسرے راستے سے حجفہ ہے، اہل عراق کی مخصوص جگہ ذات عرق ہے، اہل نجد کی مخصوص جگہ قرن ہے اور اہل یمن کے لیے احرام باندھنے کی جگہ یلملم ہے۔“ [سنن الدارقطني/ كتاب الحج/حدیث: 2503]

سیدنا عبداللہ بن عباس رضی اللہ عنہما کے حوالے سے، مرفوع حدیث کے طور پر یہ بات منقول ہے: نبی کریم صلی اللہ علیہ وسلم نے اہل مدینہ کے لیے ذوالحلیفہ کو، اہل شام کے لیے حجفہ کو، اہل نجد کے لیے قرن کو (ایک روایت میں لفظ قرن المنازل منقول ہے)، اہل یمن کے لیے یلملم کو میقات مقرر کیا ہے۔ یہ ان علاقوں اور ان کے دوسری طرف سے آنے والوں کے لیے ہے۔ جو شخص حج یا عمرہ کا ارادہ رکھتا ہو، لیکن جو ان جگہوں کے (مکہ کی طرف والے حصے) میں رہتا ہو (ایک روایت میں یہ الفاظ ہیں) وہ اپنے گھر سے احرام باندھے گا، (اور ایک روایت میں یہ الفاظ ہیں) وہ جہاں سے چاہے احرام باندھ لے، یہاں تک کہ اہل مکہ بھی مکہ ہی میں احرام باندھ لیں گے۔ [سنن الدارقطني/ كتاب الحج/حدیث: 2504]

یہی روایت ایک اور سند کے ہمراہ بھی منقول ہے۔ [سنن الدارقطني/ كتاب الحج/حدیث: 2505]

خلاد بن سائب اپنے والد کا یہ بیان نقل کرتے ہیں: نبی کریم صلی اللہ علیہ وسلم نے یہ ارشاد فرمایا: ”جبرائیل علیہ السلام میرے پاس آئے اور انہوں نے مجھے کہا: میں اپنے ساتھیوں کو یہ ہدایت کروں کہ وہ بلند آواز میں تلبیہ پڑھیں۔“ [سنن الدارقطني/ كتاب الحج/حدیث: 2506]

عمارہ بن خزامہ اپنے والد کا یہ بیان نقل کرتے ہیں: جب نبی کریم صلی اللہ علیہ وسلم تلبیہ پڑھ کر فارغ ہوئے، تو آپ نے اللہ سے مغفرت اور رضامندی کے حصول کی دعا مانگی اور جہنم سے اس کی رحمت کی پناہ مانگی۔ قاسم بن محمد کہتے ہیں: آدمی کے لیے یہ بات مستحب ہے کہ وہ تلبیہ پڑھ کر فارغ ہونے کے بعد نبی کریم صلی اللہ علیہ وسلم پر درود بھیجے۔ [سنن الدارقطني/ كتاب الحج/حدیث: 2507]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے حج افراد کیا تھا۔ [سنن الدارقطني/ كتاب الحج/حدیث: 2508]

سیدنا عبداللہ بن عمر رضی اللہ عنہما بیان کرتے ہیں: ہم نے نبی کریم صلی اللہ علیہ وسلم کے ساتھ حج افراد کا احرام باندھا تھا۔ [سنن الدارقطني/ كتاب الحج/حدیث: 2509]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے پہلے سیدنا عتاب بن اسید رضی اللہ عنہ کو امیر الحج مقرر کیا، تو انہوں نے حج افراد کیا، پھر ۹ ہجری میں آپ نے سیدنا ابوبکر رضی اللہ عنہ کو امیر الحج مقرر کیا، تو انہوں نے بھی حج افراد کیا، ۱۰ ہجری میں نبی کریم صلی اللہ علیہ وسلم نے خود حج کیا، تو آپ نے بھی حج افراد کیا، آپ کے بعد سیدنا ابوبکر رضی اللہ عنہ خلیفہ بنے، تو انہوں نے سیدنا عمر رضی اللہ عنہ کو (امیر الحج بنا کر) بھیجا، تو انہوں نے بھی حج افراد کیا، پھر سیدنا ابوبکر رضی اللہ عنہ نے خود حج کیا، تو انہوں نے بھی حج افراد کیا، پھر سیدنا ابوبکر رضی اللہ عنہ کا انتقال ہو گیا، تو ان کے بعد سیدنا عمر رضی اللہ عنہ خلیفہ بنے، انہوں نے سیدنا عبدالرحمن بن عوف رضی اللہ عنہ کو (امیر الحج بنا کر) بھیجا، تو انہوں نے بھی حج افراد کیا، پھر اس کے بعد سیدنا عمر رضی اللہ عنہ نے کئی مرتبہ حج کیا اور ہمیشہ حج افراد کیا، پھر سیدنا عمر رضی اللہ عنہ کا انتقال ہو گیا اور سیدنا عثمان رضی اللہ عنہ خلیفہ بنے، تو انہوں نے بھی حج افراد کیا، پھر سیدنا عثمان رضی اللہ عنہ کو محصور کر دیا گیا، تو سیدنا عبداللہ بن عباس رضی اللہ عنہما نے حج میں لوگوں کی قیادت کا فریضہ سرانجام دیا، انہوں نے بھی حج افراد کیا۔ [سنن الدارقطني/ كتاب الحج/حدیث: 2510]