نافع، سیدنا ابن عمر رضی اللہ عنہما کے حوالے سے نقل کرتے ہیں: انہوں نے نبی کریم صلی اللہ علیہ وسلم کے فرمان کے طور پر یہ بات نقل کی کہ آپ صلی اللہ علیہ وسلم نے فرمایا: ”حالت احرام والا شخص نہ خود نکاح کر سکتا ہے، نہ کسی کا نکاح کروا سکتا ہے، نہ کسی کو (اپنی) شادی کا پیغام دے سکتا ہے، نہ کسی کی طرف سے شادی کا پیغام دے سکتا ہے۔“ [سنن الدارقطني/ كتاب النكاح/حدیث: 3651]

سیدنا انس رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”حالت احرام والا شخص نہ خود شادی کر سکتا ہے، نہ کسی کی شادی کروا سکتا ہے۔“ [سنن الدارقطني/ كتاب النكاح/حدیث: 3652]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے جب سیدہ میمونہ رضی اللہ عنہا کے ساتھ شادی کی تھی، آپ صلی اللہ علیہ وسلم اس وقت حالت احرام میں نہیں تھے۔ [سنن الدارقطني/ كتاب النكاح/حدیث: 3653]

سیدہ میمونہ رضی اللہ عنہا بیان کرتی ہیں: نبی کریم صلی اللہ علیہ وسلم نے جب ان کے ساتھ شادی کی تھی، آپ صلی اللہ علیہ وسلم اس وقت حالت احرام میں نہیں تھے، اور جب سیدہ میمونہ رضی اللہ عنہا کی رخصتی ہوئی، تو اس وقت نبی کریم صلی اللہ علیہ وسلم حالت احرام میں نہیں تھے۔ [سنن الدارقطني/ كتاب النكاح/حدیث: 3654]

یزید بن اصم بیان کرتے ہیں: نبی کریم صلی اللہ علیہ وسلم نے جب سیدہ میمونہ رضی اللہ عنہا کے ساتھ شادی کی تھی، آپ صلی اللہ علیہ وسلم اس وقت حالت احرام میں نہیں تھے، اور جب سیدہ میمونہ رضی اللہ عنہا کی رخصتی ہوئی، تو اس وقت بھی نبی کریم صلی اللہ علیہ وسلم حالت احرام میں نہیں تھے، سیدہ میمونہ رضی اللہ عنہا کا انتقال سرف کے مقام پر ہوا۔ [سنن الدارقطني/ كتاب النكاح/حدیث: 3655]

سیدہ میمونہ بنت حارث رضی اللہ عنہا بیان کرتی ہیں: نبی کریم صلی اللہ علیہ وسلم نے سرف کے مقام پر میرے ساتھ شادی کی، ہم دونوں اس وقت حالت احرام میں نہیں تھے۔ [سنن الدارقطني/ كتاب النكاح/حدیث: 3656]

سیدہ میمونہ رضی اللہ عنہا بیان کرتی ہیں: جب نبی کریم صلی اللہ علیہ وسلم نے ان کے ساتھ شادی کی، تو وہ دونوں اس وقت حالت احرام میں نہیں تھے۔ [سنن الدارقطني/ كتاب النكاح/حدیث: 3657]

سیدنا ابورافع رضی اللہ عنہ بیان کرتے ہیں: نبی کریم صلی اللہ علیہ وسلم نے جب سیدہ میمونہ رضی اللہ عنہا کے ساتھ شادی کی تھی، آپ صلی اللہ علیہ وسلم اس وقت حالت احرام میں نہیں تھے، اور جب سیدہ میمونہ رضی اللہ عنہا کی رخصتی ہوئی، اس وقت بھی نبی کریم صلی اللہ علیہ وسلم حالت احرام میں نہیں تھے، میں نے ان دونوں کے درمیان قاصد کا فریضہ سرانجام دیا تھا۔ [سنن الدارقطني/ كتاب النكاح/حدیث: 3658]

سیدنا ابورافع رضی اللہ عنہ بیان کرتے ہیں: نبی کریم صلی اللہ علیہ وسلم نے جب سیدہ میمونہ رضی اللہ عنہا کے ساتھ شادی کی تھی، آپ صلی اللہ علیہ وسلم اس وقت حالت احرام میں نہیں تھے، اور جب سیدہ میمونہ رضی اللہ عنہا کی رخصتی ہوئی، اس وقت بھی آپ صلی اللہ علیہ وسلم حالت احرام میں نہیں تھے، میں نے ان دونوں کے درمیان قاصد کا فریضہ سرانجام دیا تھا۔ داؤد ابوعمرو نامی راوی داؤد بن زبرقان ہے۔ [سنن الدارقطني/ كتاب النكاح/حدیث: 3659]

سیدنا ابن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے محمیہ بن جزء اور دو افراد کو سیدہ میمونہ رضی اللہ عنہا کے پاس بھیجا، تاکہ انہیں (نبی کریم صلی اللہ علیہ وسلم کی طرف سے) نکاح کا پیغام دیں، سیدہ میمونہ رضی اللہ عنہا اس وقت مکہ میں مقیم تھیں، انہوں نے یہ ذمہ داری اپنی بہن سیدہ ام فضل رضی اللہ عنہا کو سونپی، سیدہ ام فضل رضی اللہ عنہا نے یہ ذمہ داری (اپنے شوہر اور نبی کریم صلی اللہ علیہ وسلم کے چچا) سیدنا عباس رضی اللہ عنہ کو سونپی، تو سیدنا عباس رضی اللہ عنہ نے سیدہ میمونہ رضی اللہ عنہا کا نکاح نبی کریم صلی اللہ علیہ وسلم کے ساتھ کر دیا۔ [سنن الدارقطني/ كتاب النكاح/حدیث: 3660]