سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے کہ اللہ تعالیٰ نے فرمایا ہے: ”اے آدم کے بیٹے! تمہارے اندر دو خصوصیات ہیں، جو پہلے تم میں نہیں تھیں، ایک یہ کہ جب تم اپنے غصے پر قابوپاؤ گے، تو میں تمہارے مال میں اضافہ کر دوں گا، تاکہ اس طرح تمہیں پاک و صاف کروں اور دوسری یہ کہ جب تمہاری زندگی پوری ہو جائے گی، تو میرے بندے تمہارے لیے دعا کرتے رہیں گے (یا نماز ادا کریں گے)۔“ [سنن الدارقطني/ كتاب الوصايا/حدیث: 4287]

سیدنا معاویہ بن قرہ اپنے والد کے حوالے سے یہ بات نقل کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”جس شخص کی موت کا وقت قریب آ جائے اور وہ کوئی وصیت کرے، تو اللہ تعالیٰ کی کتاب کے حکم کے مطابق، اگر اس کی وصیت ہو، تو یہ اس چیز کے لیے کفارہ بن جائے گی، جو وہ زکوٰة ادا نہیں کر سکا تھا۔“ [سنن الدارقطني/ كتاب الوصايا/حدیث: 4288]

سیدنا معاذ بن جبل رضی اللہ عنہ، نبی کریم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ نے موت کے قریب تمہیں تمہارے مال کا ایک تہائی حصہ، صدقے کے طور پر عطا کر دیا ہے، تاکہ تم اپنی نیکیوں میں اضافہ کر لو، تاکہ وہ تمہارے اعمال میں پاکیزگی کا باعث بن جائے۔“ [سنن الدارقطني/ كتاب الوصايا/حدیث: 4289]

سیدنا عبداللہ بن عمر رضی اللہ عنہما، نبی کریم صلی اللہ علیہ وسلم کا یہ فرمان نقل کرتے ہیں: ”کسی بھی شخص کو اس بات کا حق حاصل نہیں ہے کہ اس کے پاس کوئی ایسا مال موجود ہو، جس میں اس نے وصیت کرنی ہو اور پھر دو راتیں ایسی گزر جائیں (کہ اس نے وہ وصیت تحریر نہ کی ہو)، اس کی وصیت اس کے پاس لکھی ہوئی ہونی چاہیے۔“ [سنن الدارقطني/ كتاب الوصايا/حدیث: 4290]

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”کسی بھی مسلمان شخص کو اس بات کا حق حاصل نہیں ہے کہ اس کے پاس مال موجود ہو، جس کے بارے میں اس نے وصیت کرنی ہو اور پھر دو راتیں ایسی گزر جائیں (کہ اس نے وصیت نہ کی ہو)، اس کی وصیت اس کے پاس لکھی ہوئی ہونی چاہیے۔“ [سنن الدارقطني/ كتاب الوصايا/حدیث: 4291]

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”کسی بھی شخص کے لیے یہ بات مناسب نہیں ہے کہ اس پر تین دن ایسے گزر جائیں کہ اس کے پاس ایسا مال موجود ہو کہ جس کے بارے میں اس نے وصیت کرنی ہو (اور اس نے وصیت نہ کی ہو)، اسے اس بارے میں وصیت کر دینی چاہیے۔“ [سنن الدارقطني/ كتاب الوصايا/حدیث: 4292]

سیدنا عبداللہ بن عباس رضی اللہ عنہما، نبی کریم صلی اللہ علیہ وسلم کا یہ فرمان نقل کرتے ہیں: ”وصیت کرتے ہوئے کسی (وارث) کو نقصان پہنچانا کبیرہ گناہ ہے۔“ [سنن الدارقطني/ كتاب الوصايا/حدیث: 4293]

سیدہ عائشہ رضی اللہ عنہا بیان کرتی ہیں: ”آدمی کو اپنی وصیت میں یہ تحریر کرنا چاہیے کہ اگر میں اپنی وصیت کو تبدیل کیے بغیر فوت ہو گیا (تو یوں ہو گا)۔“ [سنن الدارقطني/ كتاب الوصايا/حدیث: 4294]

سیدنا عبداللہ بن عباس رضی اللہ عنہما بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”وارث کے لیے وصیت کرنا جائز نہیں ہے، البتہ اگر دیگر ورثاء چاہیں (تو حکم مختلف ہو گا)۔“ [سنن الدارقطني/ كتاب الوصايا/حدیث: 4295]

سیدنا عمرو بن خارجہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”وصیت، وارث کے لیے نہیں ہوتی، البتہ اگر دیگر ورثاء چاہیں (تو ہو سکتی ہے)۔“ [سنن الدارقطني/ كتاب الوصايا/حدیث: 4296]