ام المؤمنین سیدہ عائشہ رضی اللہ عنہا کہتی ہیں: ”تم لوگوں نے برا کیا کہ ہمیں (یعنی عورتوں کو) گدھے اور کتے کے برابر کر دیا ہے۔ بلاشبہ میں نے دیکھا کہ رسول اللہ صلی اللہ علیہ وسلم نماز پڑھتے اور میں آپ صلی اللہ علیہ وسلم کے سامنے لیٹی ہوئی ہوتی تھی۔ آپ صلی اللہ علیہ وسلم جب سجدہ کرنا چاہتے تو میرے پاؤں کو دبا دیتے، میں اپنے پاؤں سمیٹ لیتی پھر آپ صلی اللہ علیہ وسلم سجدہ کرتے۔“ [سنن ابي داود/تفرح أبواب ما يقطع الصلاة وما لا تقطعها /حدیث: 712]

ام المؤمنین سیدہ عائشہ رضی اللہ عنہا بیان کرتی ہیں کہ ”میں سوئی ہوئی ہوتی اور میرے پاؤں رسول اللہ صلی اللہ علیہ وسلم کے سامنے ہوتے جبکہ آپ صلی اللہ علیہ وسلم رات کو نماز پڑھ رہے ہوتے تھے۔ جب آپ صلی اللہ علیہ وسلم سجدہ کرنا چاہتے تو میرے پاؤں پر مارتے، میں انہیں سمیٹ لیتی پھر آپ صلی اللہ علیہ وسلم سجدہ کرتے۔“ [سنن ابي داود/تفرح أبواب ما يقطع الصلاة وما لا تقطعها /حدیث: 713]

ام المؤمنین سیدہ عائشہ رضی اللہ عنہا نے بیان کیا کہ میں سوتی اور رسول اللہ صلی اللہ علیہ وسلم کے قبلہ رخ عرض میں لیٹی ہوئی ہوتی تھی اور رسول اللہ صلی اللہ علیہ وسلم نماز پڑھتے رہتے اور میں آپ صلی اللہ علیہ وسلم کے سامنے ہوتی، جب آپ صلی اللہ علیہ وسلم وتر پڑھنا چاہتے، عثمان نے اضافہ کیا کہ آپ صلی اللہ علیہ وسلم مجھے دبا دیتے، پھر (قعنبی اور عثمان) دونوں روایت میں متفق ہیں کہ آپ صلی اللہ علیہ وسلم فرماتے ”(عائشہ!) ایک طرف ہو جاؤ۔“ [سنن ابي داود/تفرح أبواب ما يقطع الصلاة وما لا تقطعها /حدیث: 714]

سیدنا عبداللہ بن عباس رضی اللہ عنہما بیان کرتے ہیں کہ ”میں ایک گدھے پر سوار ہو کر آیا۔“ (دوسری سند سے) سیدنا ابن عباس رضی اللہ عنہما سے مروی ہے، انہوں نے کہا کہ ”میں ایک گدھی پر سوار ہو کر آیا اور میں ان دنوں قریب البلوغ تھا اور رسول اللہ صلی اللہ علیہ وسلم منٰی میں لوگوں کو نماز پڑھا رہے تھے، چنانچہ میں صف کے کچھ حصے کے آگے سے گزرا، پھر میں اترا اور گدھی کو چھوڑ دیا، وہ چرنے لگی اور میں صف میں شامل ہو گیا اور کسی نے مجھ پر اعتراض نہ کیا۔“ امام ابوداؤد رحمہ اللہ نے کہا: ”یہ الفاظ (استاد) قعنبی کے ہیں اور (استاد عثمان بن ابی شیبہ کے الفاظ سے) زیادہ کامل ہیں۔“ امام مالک رحمہ اللہ کہتے ہیں کہ ”میں اس مسئلے میں توسع سمجھتا ہوں جبکہ نماز کھڑی ہو چکی ہو۔“ [سنن ابي داود/تفرح أبواب ما يقطع الصلاة وما لا تقطعها /حدیث: 715]

جناب ابوالصہباء بیان کرتے ہیں کہ سیدنا ابن عباس رضی اللہ عنہما کی مجلس میں ہمارا مذاکرہ ہوا کہ کس چیز سے نماز ٹوٹتی ہے، تو آنجناب نے بیان کیا: ”میں اور بنی عبدالمطلب کا ایک لڑکا گدھے پر سوار ہو کر آئے جبکہ رسول اللہ صلی اللہ علیہ وسلم نماز پڑھا رہے تھے، چنانچہ وہ اترا اور میں بھی اور ہم نے گدھے کو صف کے آگے چھوڑ دیا، تو آپ صلی اللہ علیہ وسلم نے اس کی کوئی پروا نہ کی۔ اور بنی عبدالمطلب کی دو بچیاں آئیں اور صف میں داخل ہو گئیں، آپ صلی اللہ علیہ وسلم نے ان کی بھی کوئی پروا نہ کی۔“ [سنن ابي داود/تفرح أبواب ما يقطع الصلاة وما لا تقطعها /حدیث: 716]

منصور نے یہی حدیث اپنی سند سے روایت کی، انہوں نے کہا: ”بنی عبدالمطلب کی دو لڑکیاں لڑتی ہوئی آئیں تو آپ صلی اللہ علیہ وسلم نے ان دونوں کو پکڑ لیا۔“ عثمان نے کہا: ”آپ صلی اللہ علیہ وسلم نے ان دونوں کو جدا کر دیا۔“ اور ابوداؤد رحمہ اللہ نے کہا: ”انہیں ایک دوسری سے چھڑا دیا اور اس کی کوئی پروا نہ کی۔“ [سنن ابي داود/تفرح أبواب ما يقطع الصلاة وما لا تقطعها /حدیث: 717]

سیدنا فضل بن عباس رضی اللہ عنہ بیان کرتے ہیں کہ ”رسول اللہ صلی اللہ علیہ وسلم ہمارے ہاں تشریف لائے اور ہم باہر اپنے دیہات میں تھے اور آپ صلی اللہ علیہ وسلم کے ساتھ سیدنا عباس رضی اللہ عنہ بھی تھے۔ آپ صلی اللہ علیہ وسلم نے صحراء میں نماز پڑھی، آپ صلی اللہ علیہ وسلم کے سامنے سترہ نہ تھا۔ ہماری گدھی اور کتیا آپ کے سامنے کھیل رہی تھیں اور آپ نے اس کی کوئی پروا نہ کی۔“ [سنن ابي داود/تفرح أبواب ما يقطع الصلاة وما لا تقطعها /حدیث: 718]

سیدنا ابو سعید رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”نماز کو کوئی چیز نہیں توڑتی اور جہاں تک ممکن ہو (آگے سے گزرنے والی شے کو) ہٹاؤ، بلاشبہ وہ شیطان ہے۔“ [سنن ابي داود/تفرح أبواب ما يقطع الصلاة وما لا تقطعها /حدیث: 719]

جناب ابوالوداک بیان کرتے ہیں کہ قریش کا ایک نوجوان سیدنا ابوسعید رضی اللہ عنہ کے آگے سے گزرنے لگا، جب کہ وہ نماز پڑھ رہے تھے، تو انہوں نے اس کو روکا۔ وہ پھر آیا، تو انہوں نے اسے روکا۔ تین دفعہ ایسا ہی ہوا۔ جب وہ نماز سے فارغ ہوئے، تو فرمایا: ”نماز کو کوئی شے نہیں توڑتی، مگر رسول اللہ صلی اللہ علیہ وسلم نے فرمایا ہے: ”(گزرنے والے کو) جہاں تک ہو سکے روکو، بلاشبہ وہ شیطان ہے۔“”امام ابوداؤد رحمہ اللہ فرماتے ہیں: ”جب نبی کریم صلی اللہ علیہ وسلم سے دو حدیثیں ایک دوسرے کے خلاف منقول ہوں تو دیکھا جاتا ہے کہ آپ صلی اللہ علیہ وسلم کے اصحابِ کرام رضی اللہ عنہم نے آپ صلی اللہ علیہ وسلم کے بعد کیا عمل اختیار کیا تھا۔“ [سنن ابي داود/تفرح أبواب ما يقطع الصلاة وما لا تقطعها /حدیث: 720]