سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جس چیز کے بارے میں میں تمہیں چھوڑ دوں تم بھی مجھے ویسے ہی رہنے دو، کیونکہ تم سے پہلے کے لوگ اپنے انبیاء سے (غیرضروری) سوالات کرنے اور اختلاف رکھنے کی وجہ سے ہلاکت کا شکار ہوئے۔ جب میں تمہیں کسی چیز سے منع کر دوں، تو تم اس سے اجتناب کرو اور جب میں تمہیں کسی چیز کا حکم دوں، تو جہاں تک تم سے ہو سکے تم اس پر عمل کرو۔“ [صحیح ابن حبان/المقدمة/حدیث: 21]

سیدہ عائشہ صدیقہ اور سیدنا انس بن مالک رضی اللہ عنہما بیان کرتے ہیں: نبی اکرم صلی اللہ علیہ وسلم نے کچھ آوازیں سنیں۔ آپ صلی اللہ علیہ وسلم نے دریافت کیا: ”یہ کس بات کی آوازیں ہیں؟“ لوگوں نے عرض کی: لوگ کھجوروں کی پیوند کاری کر رہے ہیں۔ نبی اکرم صلی اللہ علیہ وسلم نے ارشاد فرمایا: ”اگر وہ ایسا نہ کریں، تو یہ زیادہ بہتر ہو گا۔“ (راوی کہتے ہیں) تو وہ لوگ اس عمل سے باز آ گئے۔ انہوں نے اس سال پیوند کاری نہیں کی تو پیداوار ٹھیک نہیں ہوئی۔ اس بات کا تذکرہ نبی اکرم صلی اللہ علیہ وسلم سے کیا گیا، تو آپ صلی اللہ علیہ وسلم نے ارشاد فرمایا: ”اگر تمہارا کوئی دنیاوی معاملہ ہو، تو اسے تم خود سنبھالو اور اگر کوئی دینی معاملہ ہو، تو وہ میری طرف آئے گا۔“ [صحیح ابن حبان/المقدمة/حدیث: 22]

سیدنا رافع بن خدیج رضی اللہ عنہ بیان کرتے ہیں کہ جب نبی اکرم صلی اللہ علیہ وسلم مدینہ منورہ تشریف لائے، تو لوگ کھجوروں کی پیوندکاری کیا کرتے تھے، لوگ اسے پیوندکاری کا نام دیتے تھے، راوی بیان کرتے ہیں کہ نبی اکرم صلی اللہ علیہ وسلم نے دریافت فرمایا: ”تم لوگ کیا کرتے ہو؟“ لوگوں نے عرض کی: یہ ایک ایسا طریقہ ہے، جو وہ لوگ پہلے استعمال کیا کرتے تھے، نبی اکرم صلی اللہ علیہ وسلم نے ارشاد فرمایا: ”اگر تم یہ نہ کرو، تو یہ زیادہ بہتر ہے“، تو لوگوں نے اسے ترک کر دیا، تو پیداوار کم ہو گئی، لوگوں نے اس بات کا تذکرہ نبی اکرم صلی اللہ علیہ وسلم سے کیا، تو نبی اکرم صلی اللہ علیہ وسلم نے ارشاد فرمایا: ”میں ایک انسان ہوں، جب میں تمہارے سامنے کسی دینی معاملے کے بارے میں کوئی چیز بیان کروں، تو تم اسے اختیار کر لو اور جب میں تمہارے سامنے کسی دنیاوی معاملے کے بارے میں کوئی چیز بیان کروں، تو میں ایک انسان ہوں“، عکرمہ کہتے ہیں: یہ یا اس کی مانند الفاظ ہیں، ابونجاشی (نامی راوی) سیدنا رافع بن خدیج رضی اللہ عنہ کا غلام ہے اور اس کا نام عطاء بن صہیب ہے، یہ بات شیخ نے بیان کی ہے۔ [صحیح ابن حبان/المقدمة/حدیث: 23]

عروہ بن زبیر بیان کرتے ہیں کہ سیدنا عبداللہ بن زبیر رضی اللہ عنہما نے انہیں بتایا کہ انصار سے تعلق رکھنے والے ایک شخص کا نبی اکرم صلی اللہ علیہ وسلم کے سامنے حرہ سے آنے والی پانی کی نالی کے بارے میں سیدنا زبیر رضی اللہ عنہ کے ساتھ جھگڑا ہوا جس کے ذریعے کھجوروں کے باغوں کو سیراب کیا جاتا تھا۔ اس انصاری نے کہا: آپ پانی کو چھوڑ دیجیے تاکہ وہ گزر جائے، تو سیدنا زبیر رضی اللہ عنہ نے اس کی یہ بات تسلیم نہیں کی (یہ مقدمہ نبی اکرم صلی اللہ علیہ وسلم کے سامنے پیش ہوا تو) تو نبی اکرم صلی اللہ علیہ وسلم نے ارشاد فرمایا: ”اے زبیر! (تم اپنے باغ کو سیراب کر لو) پھر اپنے پڑوسی کے لیے (پانی کو) چھوڑ دو۔“ تو وہ انصاری غصے میں آ گیا اور بولا: یا رسول اللہ! (آپ نے یہ فیصلہ اس لیے دیا ہے) کیونکہ یہ آپ کے پھوپھی زاد ہیں، تو نبی اکرم صلی اللہ علیہ وسلم کے چہرہ مبارک کا رنگ تبدیل ہو گیا، پھر نبی اکرم صلی اللہ علیہ وسلم نے ارشاد فرمایا: ”اے زبیر! تم اپنے (باغ کو) سیراب کرو اور پھر پانی کو روکے رکھو، یہاں تک کہ وہ منڈیروں تک پہنچ جائے۔“ سیدنا زبیر رضی اللہ عنہ بیان کرتے ہیں: اللہ کی قسم! میں یہ سمجھتا ہوں کہ یہ آیت اسی بارے میں نازل ہوئی تھی: ﴿فَلَا وَرَبِّكَ لَا يُؤْمِنُونَ حَتَّىٰ يُحَكِّمُوكَ فِيمَا شَجَرَ بَيْنَهُمْ﴾ [سورة النساء: 65] ”تمہارے پروردگار کی قسم! یہ لوگ اس وقت تک مومن نہیں ہو سکتے، جب تک آپس کے اختلافی معاملات کے بارے میں تمہیں ثالث تسلیم نہ کریں۔“ [صحیح ابن حبان/المقدمة/حدیث: 24]

سیدنا ابوسعید خدری رضی اللہ عنہ بیان کرتے ہیں: سیدنا علی رضی اللہ عنہ نے یمن سے نبی اکرم صلی اللہ علیہ وسلم کی خدمت میں چمڑے میں کچھ سونا بھیجا۔ نبی اکرم صلی اللہ علیہ وسلم نے وہ سونا زید خیل، اقرع بن حابس، عینیہ بن حصن اور علقمہ بن علاثہ کے درمیان تقسیم کر دیا۔ مہاجرین اور انصار سے تعلق رکھنے والے کچھ لوگوں نے یہ کہا: ہم اس کے زیادہ حق دار تھے۔ اس بات کی اطلاع نبی اکرم صلی اللہ علیہ وسلم کو ملی تو یہ بات آپ صلی اللہ علیہ وسلم کو گراں گزری، آپ صلی اللہ علیہ وسلم نے ارشاد فرمایا: ”کیا تم لوگ مجھے امین نہیں سمجھتے ہو؟ حالانکہ میں اس ذات کا امین ہوں، جو آسمان میں ہے، میرے پاس آسمان میں موجود ذات کی خبریں صبح و شام آتی ہیں۔“ (راوی کہتے ہیں:) تو چھوٹی آنکھوں اور ابھرے ہوئے گالوں، تنگ پیشانی، گھنی داڑھی، منڈے ہوئے سر اور اوپر کیے ہوئے تہبند والا ایک شخص نبی اکرم صلی اللہ علیہ وسلم کے سامنے کھڑا ہوا۔ اس نے عرض کی: یا رسول اللہ! آپ اللہ تعالیٰ سے ڈریئے۔ نبی اکرم صلی اللہ علیہ وسلم نے فرمایا: ”کیا میں تمام اہل زمین سے زیادہ اس بات کا حق دار نہیں ہوں کہ میں اللہ سے ڈروں؟“ پھر وہ شخص وہاں سے چلا گیا، تو اللہ کی تلوار سیدنا خالد رضی اللہ عنہ اٹھ کر اس کی طرف جانے لگے، انہوں نے عرض کی: یا رسول اللہ! کیا میں اس کی گردن نہ اڑا دوں؟ نبی اکرم صلی اللہ علیہ وسلم نے ارشاد فرمایا: ”جی نہیں، ہو سکتا ہے وہ شخص نماز ادا کر رہا ہو۔“ سیدنا خالد رضی اللہ عنہ نے عرض کیا: نمازی ایسے ہیں، جو زبان کے ذریعے وہ بات کہتے ہیں، جو ان کے دل میں نہیں ہوتی ہے۔ نبی اکرم صلی اللہ علیہ وسلم نے ارشاد فرمایا: ”مجھے اس بات کا حکم نہیں دیا گیا کہ میں لوگوں کے دل چیر کے دیکھوں، یا ان کے پیٹ چیر کے دیکھوں۔“ پھر نبی اکرم صلی اللہ علیہ وسلم نے اس شخص کی طرف دیکھا وہ اس وقت واپس جا رہا تھا، نبی اکرم صلی اللہ علیہ وسلم نے فرمایا: ”عنقریب اس کی اولاد میں ایسے لوگ پیدا ہوں گے، جو اللہ کی کتاب کی تلاوت کریں گے، لیکن وہ ان کے حلق سے نیچے نہیں اترے گی اور وہ لوگ دین سے یوں خارج ہو جائیں گے، جس طرح تیر نشانے کے پار ہو جاتا ہے۔“ عمارہ نامی راوی یہ بیان کرتے ہیں: میرا خیال ہے، روایت میں یہ الفاظ بھی ہیں کہ نبی اکرم صلی اللہ علیہ وسلم نے یہ ارشاد فرمایا: ”اگر میں نے ان لوگوں کا زمانہ پا لیا، تو میں انہیں اس طرح قتل کروں گا، جس طرح قوم ثمود کو قتل کیا گیا تھا۔“ [صحیح ابن حبان/المقدمة/حدیث: 25]

ابراہیم بن سعد اپنے والد کا یہ بیان نقل کرتے ہیں: ایک شخص نے وصیت کرتے ہوئے اپنے مال کے بارے میں کسی کے ساتھ ترجیحی سلوک کیا، تو میں قاسم بن محمد کے پاس گیا تاکہ میں ان سے اس بارے میں مشورہ لوں، تو قاسم نے بتایا: میں نے سیدہ عائشہ رضی اللہ عنہا کو یہ بیان کرتے ہوئے سنا ہے، نبی اکرم صلی اللہ علیہ وسلم نے یہ بات بھی ارشاد فرمائی ہے: ”جو شخص ہمارے اس معاملے (یعنی دین) میں کوئی نئی چیز پیدا کرے گا، جس کا اس سے کوئی تعلق نہ ہو تو وہ چیز مسترد کی جائے گی۔“ [صحیح ابن حبان/المقدمة/حدیث: 26]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص ہمارے اس معاملے (یعنی دین) میں کوئی نئی چیز پیدا کرے جس کا اس سے کوئی تعلق نہ ہو، تو وہ چیز مردود ہو گی۔“ [صحیح ابن حبان/المقدمة/حدیث: 27]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص میری طرف منسوب کر کے ایسی بات بیان کرے، جو میں نے نہ کہی ہو، تو وہ شخص جہنم میں اپنے مخصوص ٹھکانے تک پہنچنے کے لیے تیار رہے۔“ [صحیح ابن حبان/المقدمة/حدیث: 28]

سیدنا سمرہ بن جندب رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص کوئی بات بیان کرے اور وہ یہ بات جانتا ہو کہ یہ بات جھوٹ ہے، تو وہ شخص بھی جھوٹوں میں سے ایک ہو گا۔“ [صحیح ابن حبان/المقدمة/حدیث: 29]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”آدمی کے گناہ گار ہونے کے لیے اتنا ہی کافی ہے کہ وہ ہر سنی ہوئی بات کو (آگے) بیان کر دے۔“ [صحیح ابن حبان/المقدمة/حدیث: 30]