سیدنا ابوہریرہ رضی اللہ عنہ بیان کرتے ہیں کہ انہیں نبی اکرم صلی اللہ علیہ وسلم کے اس فرمان کا پتہ چلا ہے: ”اپنے جنازوں کو تیزی سے (قبرستان) لے جاؤ، کیونکہ اگر وہ نیک ہوں گے تو تم انہیں بھلائی کی طرف لے کر جاؤ گے اور اگر وہ برے ہوں گے تو تم اس برائی کو اپنی گردنوں سے اتار دو گے۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3042]

عیینہ بن عبدالرحمن بیان کرتے ہیں کہ میں سیدنا عبدالرحمن بن سمرہ رضی اللہ عنہ کے جنازے میں شریک ہوا، (اس وقت کا گورنر) زیاد ان کی چارپائی کے آگے چل رہا تھا اور کچھ لوگوں نے اپنا رخ چارپائی کی طرف کیا ہوا تھا اور وہ الٹے قدموں چلتے ہوئے یہ کہہ رہے تھے: ”ہٹو، ہٹو! اللہ تعالیٰ تمہیں برکت نصیب کرے“۔ جب ہم راستے میں کسی جگہ پر پہنچے، تو ہماری ملاقات سیدنا ابوبکرہ رضی اللہ عنہ سے ہوئی جو اپنے خچر پر سوار تھے، جب انہوں نے ان لوگوں کے طرزِ عمل کو دیکھا، تو انہوں نے اپنے خچر کا رخ ان لوگوں کی طرف کیا اور اپنے درے کے ذریعے ان کی طرف اشارہ کرتے ہوئے فرمایا: ”راستہ چھوڑ دو، اس ذات کی قسم جس کے دستِ قدرت میں میری جان ہے! مجھے اپنے بارے میں یہ بات یاد ہے کہ جب ہم لوگ نبی اکرم صلی اللہ علیہ وسلم کے ساتھ ہوتے تھے، تو ہم تقریباً دوڑتے ہوئے (تیزی سے) چلتے تھے“۔ راوی بیان کرتے ہیں کہ پھر لوگ آئے اور انہوں نے تیزی سے چلنا شروع کیا اور زیاد نے بھی تیزی سے چلنا شروع کیا۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3043]

سیدنا ابوبکرہ رضی اللہ عنہ بیان کرتے ہیں کہ مجھے اپنے بارے میں یہ بات یاد ہے کہ میں نبی اکرم صلی اللہ علیہ وسلم کے ساتھ تھا اور جنازوں کے ساتھ اس طرح چلا جاتا تھا جیسے دوڑا جاتا ہے۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3044]

سالم اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں کہ انہوں نے نبی اکرم صلی اللہ علیہ وسلم ، سیدنا ابوبکر رضی اللہ عنہ اور سیدنا عمر رضی اللہ عنہ کو جنازے کے آگے چلتے ہوئے دیکھا ہے۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3045]

سالم اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں: نبی اکرم صلی اللہ علیہ وسلم ، سیدنا ابوبکر رضی اللہ عنہ اور سیدنا عمر رضی اللہ عنہ جنازے کے آگے چلا کرتے تھے۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3046]

سالم اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں: میں نے نبی اکرم صلی اللہ علیہ وسلم ، سیدنا ابوبکر رضی اللہ عنہ اور سیدنا عمر رضی اللہ عنہ کو جنازے کے آگے چلتے ہوئے دیکھا ہے۔ سفیان نامی راوی سے کہا گیا: روایت میں یہ الفاظ ہیں اور سیدنا عثمان رضی اللہ عنہ کو بھی دیکھا ہے، تو انہوں نے جواب دیا: مجھے یہ الفاظ یاد نہیں ہیں۔ ان سے کہا گیا: بعض لوگ یہ کہتے ہیں کہ یہ روایت سالم سے منقول ہے، تو انہوں نے بتایا: زہری نے یہ روایت کئی مرتبہ ہمیں بیان کی ہے اور میں تمہارے سامنے گواہی دے کر یہ بات کہتا ہوں۔ ان سے کہا گیا: ابن جریج اس روایت کو اسی طرح بیان کرتے ہیں جس طرح آپ بیان کرتے ہیں، لیکن وہ اس میں سیدنا عثمان رضی اللہ عنہ کا ذکر بھی کرتے ہیں، تو سفیان نے کہا: میں نے انہیں سیدنا عثمان رضی اللہ عنہ کا ذکر کرتے ہوئے نہیں سنا۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3047]

سالم بن عبداللہ رحمہ اللہ بیان کرتے ہیں کہ سیدنا عبداللہ بن عمر رضی اللہ عنہما جنازے کے آگے چلا کرتے تھے اور یہ بات بیان کرتے تھے کہ: ”نبی اکرم صلی اللہ علیہ وسلم ، سیدنا ابوبکر رضی اللہ عنہ، سیدنا عمر رضی اللہ عنہ اور سیدنا عثمان رضی اللہ عنہ بھی جنازے کے آگے چلا کرتے تھے۔“ امام زہری رحمہ اللہ بیان کرتے ہیں کہ سنت بھی یہی ہے۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3048]

سیدنا مغیرہ بن شعبہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جنازے کے ساتھ سوار ہو کر چلنے والا جنازے کے پیچھے چلے گا اور پیدل چلنے والا جہاں چاہے گا چلے گا اور (نابالغ) بچے کی نمازِ جنازہ ادا کی جائے گی۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3049]

سیدنا جابر بن عبداللہ رضی اللہ عنہما بیان کرتے ہیں: ایک مرتبہ ہم نبی اکرم صلی اللہ علیہ وسلم کے ساتھ تھے، ایک جنازہ ہمارے پاس سے گزرا، نبی اکرم صلی اللہ علیہ وسلم اس کے لیے کھڑے ہو گئے، جب ہم اسے کندھا دینے کے لیے آگے بڑھے، تو وہ ایک یہودی کا جنازہ تھا، نبی اکرم صلی اللہ علیہ وسلم نے ارشاد فرمایا: ”موت کی مخصوص گھبراہٹ ہوتی ہے، جب تم جنازے کو دیکھا کرو، تو کھڑے ہو جایا کرو۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3050]

سیدنا عامر بن ربیعہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب تم جنازے کو دیکھو تو کھڑے ہو جاؤ، یہاں تک کہ وہ آگے گزر جائے یا اسے (زمین پر) رکھ دیا جائے۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3051]