سیدہ ام عطیہ رضی اللہ عنہا بیان کرتی ہیں: نبی اکرم صلی اللہ علیہ وسلم ہمارے پاس تشریف لائے، ہم اس وقت آپ صلی اللہ علیہ وسلم کی صاحبزادی کو غسل دینے لگی تھیں، آپ صلی اللہ علیہ وسلم نے فرمایا: ”تم اسے پانی اور بیری کے ساتھ تین مرتبہ یا پانچ مرتبہ یا اس سے زیادہ مرتبہ، اگر تم مناسب سمجھو، غسل دینا اور آخر میں کافور بھی شامل کر لینا (راوی کو شک ہے شاید یہ الفاظ ہیں) کچھ کافور شامل کر لینا، جب تم اس سے فارغ ہو جاؤ، تو تم مجھے اطلاع دے دینا۔“ سیدہ ام عطیہ رضی اللہ عنہا بیان کرتی ہیں: جب ہم فارغ ہوئے اور ہم نے آپ صلی اللہ علیہ وسلم کو اطلاع دی، تو نبی اکرم صلی اللہ علیہ وسلم نے اپنی چادر ہمیں دی اور فرمایا: ”یہ اس کے جسم پر لپیٹ دو۔“ حفصہ نامی خاتون نے سیدہ ام عطیہ رضی اللہ عنہا کے حوالے سے روایت میں یہ الفاظ نقل کیے ہیں: ”تم اسے دو مرتبہ یا تین مرتبہ یا پانچ مرتبہ یا سات مرتبہ غسل دینا۔“ سیدہ ام عطیہ رضی اللہ عنہا بیان کرتی ہیں: میں نے اس صاحبزادی کی تین چٹیا بنا دیں۔ اس روایت میں یہ الفاظ بھی ہیں: نبی اکرم صلی اللہ علیہ وسلم نے یہ ارشاد فرمایا تھا: ”تم اس کے دائیں طرف کے اعضاء اور وضو کے مقامات سے (غسل کا آغاز کرنا)۔“ (امام ابن حبان رحمہ اللہ فرماتے ہیں:) میت کو غسل دینے کا حکم فرض ہے اور وہ شرط جو اس کے ہمراہ ذکر کی گئی ہے، یعنی اس روایت میں مذکور عدد کو متعین طور پر ذکر کرنے سے مقصود استحباب کا بیان ہے، یہ لازم نہیں ہے۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3032]

سیدہ ام عطیہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کی صاحبزادی کا انتقال ہوا، تو آپ صلی اللہ علیہ وسلم نے ارشاد فرمایا: ”تم اسے پانی اور بیری کے پتوں کے ذریعے تین مرتبہ یا پانچ مرتبہ یا، اگر تم مناسب سمجھو، تو اس سے زیادہ مرتبہ غسل دینا اور آخر میں کچھ کافور بھی ملا دینا، جب تم فارغ ہو جاؤ، تو مجھے اطلاع دینا۔“ ہم نے آپ صلی اللہ علیہ وسلم کو اطلاع دی، تو آپ صلی اللہ علیہ وسلم نے اپنی چادر ہمیں دی اور ارشاد فرمایا: ”یہ اس کے جسم پر لپیٹ دو۔“ ایوب نامی راوی نے یہ بات بیان کی ہے، حفصہ نامی راوی خاتون نے اس میں یہ الفاظ نقل کیے ہیں: ”تم اسے تین مرتبہ یا پانچ مرتبہ یا سات مرتبہ غسل دینا اور اس کی تین چوٹیاں بنا دینا۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3033]

وہب بن منبہ رحمہ اللہ بیان کرتے ہیں: یہ وہ چیز ہے جس کے بارے میں میں نے سیدنا جابر بن عبداللہ رضی اللہ عنہما سے دریافت کیا، تو انہوں نے کچھ احادیث بیان کیں، انہوں نے یہ بتایا کہ ایک دن نبی اکرم صلی اللہ علیہ وسلم خطبہ دے رہے تھے، آپ صلی اللہ علیہ وسلم نے اپنے اصحاب میں سے ایک صاحب کا ذکر کیا جن کا انتقال ہو گیا تھا اور انہیں زیادہ بڑا کفن نہیں دیا گیا تھا اور رات کے وقت ہی دفنا دیا گیا تھا، تو نبی اکرم صلی اللہ علیہ وسلم نے اس بات سے منع کیا کہ کسی شخص کو رات کے وقت دفن کیا جائے یا کسی کی رات کے وقت نماز جنازہ ادا کی جائے، البتہ مجبوری کا معاملہ مختلف ہے، آپ صلی اللہ علیہ وسلم نے ارشاد فرمایا: ”جب کوئی شخص اپنے بھائی (کے کفن دفن کے معاملات) کا نگران بنے، تو وہ اسے اچھا کفن دے۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3034]

سیدنا عبداللہ بن عباس رضی اللہ عنہما سیدنا فضل بن عباس رضی اللہ عنہما کے حوالے سے یہ بات نقل کرتے ہیں: نبی اکرم صلی اللہ علیہ وسلم کو دو «سَحُولِيّ» ”سحولی“ کپڑوں میں کفن دیا گیا تھا۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3035]

سیدہ عائشہ رضی اللہ عنہا بیان کرتی ہیں: میں اس وقت سیدنا ابوبکر رضی اللہ عنہ کے پاس موجود تھی جب ان کا آخری وقت قریب آیا، تو میں نے یہ شعر پڑھا: ”جس کے آنسو ہمیشہ رکے رہتے ہیں، عنقریب وہ اچھل کر نکل آئیں گے۔“ تو سیدنا ابوبکر رضی اللہ عنہ نے فرمایا: ”اے میری بیٹی! تم یہ نہ کہو بلکہ تم یہ پڑھو (جو قرآن کی آیت ہے) ﴿وَجَاءَتْ سَكْرَةُ الْمَوْتِ بِالْحَقِّ ذَلِكَ مَا كُنْتَ مِنْهُ تَحِيدُ﴾ [سورة ق: 19] ”موت کی مدہوشی حق کے ساتھ آ گئی ہے، یہ وہ چیز ہے جس سے تم بچنا چاہتے تھے۔““ پھر سیدنا ابوبکر رضی اللہ عنہ نے دریافت کیا: ”نبی اکرم صلی اللہ علیہ وسلم کو کتنے کپڑوں میں کفن دیا گیا تھا؟“ میں نے جواب دیا: ”تین کپڑوں میں۔“ تو انہوں نے فرمایا: ”مجھے میرے ان دو کپڑوں میں کفن دے دینا اور ان دونوں کے ساتھ نیا کپڑا خرید لینا، کیونکہ زندہ شخص نئے کپڑے کا مرحوم کے مقابلے میں زیادہ محتاج ہوتا ہے، یہ کام کاج کے کپڑے ہیں (راوی کو شک ہے شاید یہ الفاظ ہیں) مہلت کے کپڑے ہیں۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3036]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کو تین سفید «سُحُولِيَّة» ”سحولی“ کپڑوں میں کفن دیا گیا، اس کفن میں قمیص یا عمامہ شامل نہیں تھا۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3037]

سیدنا ابوسعید خدری رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جب جنازہ (چارپائی پر) رکھ دیا جائے اور لوگ اسے گردن (یعنی کندھوں پر) اٹھا لیں، تو اگر وہ (مرحوم) نیک ہو تو وہ کہتا ہے: تم مجھے آگے لے جاؤ! اور اگر وہ نیک نہ ہو تو وہ کہتا ہے: ہائے افسوس! یہ لوگ اسے کہاں لے جا رہے ہیں؟ اس کی آواز کو انسان کے علاوہ ہر چیز سنتی ہے اور اگر انسان اسے سن لے تو بے ہوش ہو کر گر جائے۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3038]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب جنازہ (چارپائی پر) رکھ دیا جاتا ہے اور لوگ اسے اپنے کندھوں پر اٹھا لیتے ہیں، اگر وہ نیک ہو تو وہ کہتا ہے: «قَدِّمُونِي» ”تم مجھے آگے لے جاؤ“ اور اگر وہ نیک نہ ہو تو وہ کہتا ہے: «يَا وَيْلَهَا، أَيْنَ يَذْهَبُونَ بِهَا؟» ”ہائے افسوس! یہ لوگ اسے کہاں لے جا رہے ہیں؟“ اس کی آواز کو انسان کے علاوہ ہر چیز سنتی ہے، اگر انسان اسے سن لے تو بے ہوش ہو کر گر جائے۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3039]

سیدنا براء رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں ”جنازے کے ساتھ جانے، بیمار کی عیادت کرنے، چھینکنے والے کو جواب دینے، قسم اٹھانے والے کی قسم پوری کروانے، مظلوم کی مدد کرنے، سلام کو پھیلانے اور دعوت قبول کرنے“ کا حکم دیا ہے۔ (امام ابن حبان رحمہ اللہ فرماتے ہیں:) جنازے کے ساتھ جانے، بیمار کی عیادت کرنے کا حکم ثواب طلب کرنے کے لیے ہے، یہ لازمی حکم نہیں ہے، جبکہ چھینکنے والے کو جواب دینے اور قسم پوری کروانے کا حکم اس کے الفاظ عام ہیں لیکن اس کی مراد مخصوص ہے اور وہ یوں کہ چھینکنے والے کو جواب دینا اسی وقت لازم ہوتا ہے جب وہ اللہ کی حمد بیان کرے اور قسم پوری کروانا بعض صورتوں میں لازم ہوتا ہے، ہر صورت میں لازم نہیں ہوتا، جبکہ مظلوم کی مدد کرنا اور دعوت کو قبول کرنا یہ ایسا حکم ہے جو کسی وقت میں لازم ہوتا ہے اور کسی وقت میں لازم نہیں ہوتا، جبکہ سلام کو پھیلانے کا حکم لفظی طور پر عام ہے لیکن اس سے مراد یہ ہے کہ مسلمانوں کے ساتھ ایسا کیا جائے، مسلمانوں کے علاوہ (غیر مسلموں کے ساتھ) ایسا نہ کیا جائے۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3040]

سیدہ ام عطیہ رضی اللہ عنہا بیان کرتی ہیں: جب نبی اکرم صلی اللہ علیہ وسلم مدینہ منورہ تشریف لائے، تو انصار کی کچھ خواتین ایک گھر میں جمع ہوئیں۔ نبی اکرم صلی اللہ علیہ وسلم نے سیدنا عمر بن خطاب رضی اللہ عنہ کو ہمارے پاس بھیجا، وہ دروازے پر کھڑے ہوئے، انہوں نے ہمیں سلام کیا، ہم نے سلام کا جواب دیا، پھر انہوں نے بتایا کہ میں اللہ کے رسول صلی اللہ علیہ وسلم کا پیغام رساں ہوں جو تمہاری طرف آیا ہوں۔ سیدہ ام عطیہ رضی اللہ عنہا بیان کرتی ہیں: ہم نے کہا: اللہ کے رسول صلی اللہ علیہ وسلم کو اور اللہ کے رسول صلی اللہ علیہ وسلم کے پیغام رساں کو خوش آمدید، تو سیدنا عمر رضی اللہ عنہ نے فرمایا: آپ خواتین یہ بیعت کریں کہ آپ کسی کو اللہ کا شریک نہیں ٹھہرائیں گی اور زنا نہیں کریں گی اور چوری نہیں کریں گی (انہوں نے یہ آیت پڑھی)۔ سیدہ ام عطیہ رضی اللہ عنہا بیان کرتی ہیں: ہم نے جواب دیا: جی ہاں۔ سیدہ ام عطیہ رضی اللہ عنہا بیان کرتی ہیں: انہوں نے گھر کے باہری حصے کی طرف سے ہاتھ بڑھایا اور ہم نے گھر کے اندرونی حصے سے اپنے ہاتھ بڑھائے، پھر انہوں نے کہا: اے اللہ! تو گواہ ہو جا۔ سیدہ ام عطیہ رضی اللہ عنہا بیان کرتی ہیں: نبی اکرم صلی اللہ علیہ وسلم نے ہمیں عید کے بارے میں یہ حکم دیا تھا کہ ”ہم اس موقع پر بالغ اور آزاد خواتین کو بھی باہر لے کر آئیں، البتہ ہم خواتین پر جمعہ پڑھنا لازم نہیں ہے“ اور نبی اکرم صلی اللہ علیہ وسلم نے ہمیں جنازے کے ساتھ جانے سے منع کیا تھا۔ اسماعیل نامی راوی کہتے ہیں: میں نے اپنی دادی (سیدہ ام عطیہ رضی اللہ عنہا) سے اللہ تعالیٰ کے اس فرمان ﴿وَلَا يَعْصِينَكَ فِي مَعْرُوفٍ﴾ [سورة الممتحنة: 12] ”اور وہ نیکی کے کام میں تمہاری نافرمانی نہیں کریں گی“ کے بارے میں دریافت کیا، تو انہوں نے بتایا: نبی اکرم صلی اللہ علیہ وسلم نے ہمیں ”نوحہ کرنے“ سے منع کیا ہے۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 3041]