سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے یہ حکم دیا تھا کہ ”کھجوروں کے ہر دس وسق میں سے ایک خوشہ مسجد میں غریبوں کے لیے لٹکا دیا جائے۔“ [صحیح ابن حبان/كتاب الزكاة/حدیث: 3289]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”زکاۃ لینا کسی خوشحال شخص کے لیے اور کمانے کے قابل شخص کے لیے جائز نہیں ہے۔“ [صحیح ابن حبان/كتاب الزكاة/حدیث: 3290]

کنانہ العدوی بیان کرتے ہیں کہ میں سیدنا قبیصہ بن مخارق رضی اللہ عنہ کے پاس موجود تھا، ان کی قوم کے کچھ افراد نے اپنی قوم کے ایک شخص کی شادی کے بارے میں ان سے مدد مانگی، تو انہوں نے ان لوگوں کو کچھ دینے سے انکار کر دیا اور وہ لوگ ان کے پاس سے اٹھ کر چلے گئے۔ کنانہ بیان کرتے ہیں کہ میں نے ان سے کہا: آپ اپنی قوم کے سردار ہیں، وہ لوگ آپ کے پاس (مدد) مانگنے کے لیے آئے تھے اور آپ نے انہیں کچھ بھی نہیں دیا؟ تو انہوں نے فرمایا: جہاں تک اس معاملے کا تعلق ہے، تو میں کچھ بھی نہیں دوں گا، میں تمہیں اس کے بارے میں بتاتا ہوں، ایک مرتبہ میں نے اپنی قوم میں سے کسی کی کوئی ادائیگی اپنے ذمے لے لی، میں نبی اکرم صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم کو اس بارے میں بتایا، میں نے آپ صلی اللہ علیہ وسلم سے درخواست کی کہ آپ صلی اللہ علیہ وسلم میری مدد کریں، تو نبی اکرم صلی اللہ علیہ وسلم نے ارشاد فرمایا: ”اے قبیصہ! تمہاری ادائیگی ہم اپنے ذمے لیتے ہیں اور صدقے کے اونٹوں میں سے انہیں ادائیگی کر دیں گے“۔ پھر آپ صلی اللہ علیہ وسلم نے ارشاد فرمایا: ”(کسی سے کچھ) مانگنا صرف تین آدمیوں کے لیے جائز ہے: ایک وہ شخص جو کوئی ادائیگی اپنے ذمے لے، اس کے لیے مانگنا جائز ہے، یہاں تک کہ وہ اس ادائیگی کو ادا کر دے؛ ایک وہ شخص جسے کوئی مصیبت لاحق ہوئی ہو، جس کے نتیجے میں اس کی پیداوار ضائع ہو جائے، اس کے لیے مانگنا جائز ہے، یہاں تک کہ وہ اپنی ضروریات کی تکمیل کر پائے (یہاں ایک لفظ کے بارے میں راوی کو شک ہے)؛ ایک وہ شخص جسے فاقہ لاحق ہو اور اس کی قوم کے تین سمجھدار لوگ اس کے بارے میں گواہی دیں کہ اس کے لیے مانگنا جائز ہو گیا ہے، تو اس کے لیے مانگنا جائز ہو گا، یہاں تک کہ وہ اپنی بنیادی ضروریات کی تکمیل کرے، اس کے علاوہ مانگنا حرام ہے“۔ [صحیح ابن حبان/كتاب الزكاة/حدیث: 3291]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میں اپنے گھر واپس جاتا ہوں، وہاں مجھے کوئی کھجور گری ہوئی ملتی ہے، میں اسے کھانے کے لیے اٹھاتا ہوں، پھر مجھے یہ اندیشہ ہوتا ہے کہ کہیں یہ صدقے کی نہ ہو، تو میں اسے رکھ دیتا ہوں۔“ [صحیح ابن حبان/كتاب الزكاة/حدیث: 3292]

سیدنا ابو رافع رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ہمارے لیے زکوٰۃ حلال نہیں ہے، کسی قوم کا غلام اس کا حصہ ہوتا ہے۔“ [صحیح ابن حبان/كتاب الزكاة/حدیث: 3293]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کی خدمت میں زکاۃ کی کھجوریں لائی گئیں، سیدنا امام حسن بن علی رضی اللہ عنہما نے ان میں سے ایک کھجور اٹھا لی، انہوں نے اسے اپنے منہ میں ڈال لیا، تو نبی اکرم صلی اللہ علیہ وسلم نے فرمایا: ”تھوکو تھوکو، ہمارے لیے زکاۃ حلال نہیں ہے۔“ [صحیح ابن حبان/كتاب الزكاة/حدیث: 3294]

سیدنا ابوہریرہ رضی اللہ عنہ بیان کرتے ہیں کہ سیدنا ابوالقاسم صلی اللہ علیہ وسلم کی خدمت میں زکاۃ کی کھجوریں آئیں، سیدنا امام حسن بن علی رضی اللہ عنہما نے ان میں سے ایک کھجور لی اور منہ میں ڈال لی، تو نبی اکرم صلی اللہ علیہ وسلم نے اپنی دو انگلیاں ان کے منہ میں ڈال کر اسے باہر نکالا اور فرمایا: ”اے میرے بیٹے! اسے تھوک دو، کیا تم یہ نہیں جانتے کہ ہمارے لیے زکاۃ حلال نہیں ہے۔“ [صحیح ابن حبان/كتاب الزكاة/حدیث: 3295]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم بعض اوقات کسی گری ہوئی کھجور کے پاس سے گزرتے، تو آپ صلی اللہ علیہ وسلم اسے اس اندیشے کے تحت نہیں اٹھاتے تھے کہ کہیں وہ زکوٰۃ کی نہ ہو۔ [صحیح ابن حبان/كتاب الزكاة/حدیث: 3296]

سیدنا جبیر بن مطعم اور سیدنا عثمان غنی رضی اللہ عنہما نبی اکرم صلی اللہ علیہ وسلم کی خدمت میں حاضر ہوئے، تاکہ خیبر کے خمس کو نبی اکرم صلی اللہ علیہ وسلم نے بنو ہاشم اور بنو مطلب میں تقسیم کیا تھا (یہ دونوں عبد مناف کی اولاد ہیں) اس کے بارے میں نبی اکرم صلی اللہ علیہ وسلم سے بات چیت کریں، کیونکہ ان لوگوں کی بھی وہی قرابت تھی جو ان لوگوں کی تھی، ان دونوں نے عرض کی: ”یا رسول اللہ صلی اللہ علیہ وسلم ! آپ صلی اللہ علیہ وسلم نے بنو مطلب اور بنو ہاشم سے تعلق رکھنے والے ہمارے بھائیوں میں (خیبر کا خمس) تقسیم کیا ہے، لیکن آپ صلی اللہ علیہ وسلم نے ہمیں کوئی چیز عطا نہیں کی“، تو نبی اکرم صلی اللہ علیہ وسلم نے ان سے فرمایا: ”کیا ہاشم اور مطلب ایک ہی نہیں ہیں (کیونکہ وہ ایک باپ کی اولاد ہے)“؟ تو سیدنا جبیر بن مطعم رضی اللہ عنہ بیان کرتے ہیں: نبی اکرم صلی اللہ علیہ وسلم نے بنی عبد شمس اور بنو نوفل کو اس خمس میں سے کچھ بھی نہیں دیا جبکہ آپ صلی اللہ علیہ وسلم نے بنو ہاشم اور بنو مطلب کو اس میں سے دیا تھا۔ [صحیح ابن حبان/كتاب الزكاة/حدیث: 3297]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”غریب وہ نہیں ہوتا جو کھانے کی ایک یا دو چیزیں لے کر یا ایک دو لقمے لے کر جائے یا ایک یا دو کھجوریں لے کر واپس چلا جائے بلکہ غریب وہ ہوتا ہے، جس کے پاس اپنی ضروریات کی تکمیل کے لیے نہ ہو اور وہ لوگوں سے لپٹ کر مانگتا بھی نہیں ہے وہ اس بات سے شرما جاتا ہے کہ لوگوں سے لپٹ کر مانگے۔“ [صحیح ابن حبان/كتاب الزكاة/حدیث: 3298]