سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب سورج نکلتا ہے، تو اس کے دونوں طرف دو فرشتے ہوتے ہیں جو یہ اعلان کرتے ہیں اور ان کی آواز انسانوں اور جنوں کے علاوہ تمام روئے زمین کو سنائی دیتی ہے: «يَا أَيُّهَا النَّاسُ، هَلُمُّوا إِلَىٰ رَبِّكُمْ، مَا قَلَّ وَكَفَىٰ خَيْرٌ مِمَّا كَثُرَ وَأَلْهَىٰ» ”اے لوگو! اپنے پروردگار کی طرف آؤ، جو چیز تھوڑی ہو اور کفایت کر جائے وہ اس سے بہتر ہے، جو زیادہ ہو اور غافل کر دے۔“ (نبی اکرم صلی اللہ علیہ وسلم فرماتے ہیں:) ”سورج جب غروب ہوتا ہے، تو دو فرشتے اس کے پہلوؤں میں یہ اعلان کرتے ہیں: «اللَّهُمَّ أَعْطِ مُنْفِقًا خَلَفًا، وَأَعْطِ مُمْسِكًا تَلَفًا» ”اے اللہ! (اپنی راہ) میں خرچ کرنے والے کو مزید دے اور نہ کرنے والے کا نقصان کر دے۔““ [صحیح ابن حبان/كتاب الزكاة/حدیث: 3329]

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”تم میں سے کون شخص ایسا ہے جسے اپنا مال اپنے وارث کے مال سے زیادہ محبوب ہو؟“ لوگوں نے عرض کی: یا رسول اللہ صلی اللہ علیہ وسلم ! ہم میں سے ہر ایک شخص کو اپنے وارث کے مال کے مقابلے میں اپنا مال زیادہ محبوب ہو گا۔ نبی اکرم صلی اللہ علیہ وسلم نے فرمایا: ”تم لوگ دیکھ لو کہ تم کیا کہہ رہے ہو؟“ لوگوں نے عرض کی: یا رسول اللہ صلی اللہ علیہ وسلم ! ہم تو یہی سمجھتے ہیں۔ نبی اکرم صلی اللہ علیہ وسلم نے فرمایا: ”تم میں سے ہر ایک کے نزدیک اس کے وارث کا مال اس کے اپنے مال سے زیادہ محبوب ہے۔“ لوگوں نے دریافت کیا: یا رسول اللہ صلی اللہ علیہ وسلم ! وہ کیسے؟ نبی اکرم صلی اللہ علیہ وسلم نے فرمایا: ”تم میں سے کسی ایک شخص کا مال وہ ہے جسے وہ (صدقہ و خیرات کر کے) آگے بھیج دے اور اس کے وارث کا مال وہ ہے جسے وہ (مرنے کے بعد) پیچھے چھوڑ جائے۔“ [صحیح ابن حبان/كتاب الزكاة/حدیث: 3330]

سیدنا ابوذر غفاری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”(دنیا میں مال و دولت کے اعتبار سے) کثرت رکھنے والے لوگ ہی (قیامت کے دن) نچلے مرتبے کے ہوں گے، ماسوائے اس شخص کے جو اپنے مال کے بارے میں اس طرح اور اس طرح کہے (یعنی اسے صدقہ و خیرات کرے) اور اس نے حلال طور پر اسے کمایا ہو۔“ [صحیح ابن حبان/كتاب الزكاة/حدیث: 3331]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”کنجوسی کرنے والے اور صدقہ کرنے والے کی مثال دو ایسے آدمیوں کی طرح ہے جن پر لوہے کے بنے ہوئے دو جبے یا دو زرہیں ہوتی ہیں جو ان کے سینوں سے لے کر ان کی گردنوں تک ہوتی ہیں، خرچ کرنے والا شخص جب بھی صدقہ کرتا ہے اور اس کا ارادہ کرتا ہے، تو اس کی جلد سے وہ زرہ ہٹ جاتی ہے، یہاں تک کہ وہ اس کے پاؤں کے نشان کو ڈھانپ لیتی ہے اور انگلیوں کے پوروں پر آ جاتی ہے (یعنی نیچے گر جاتی ہے) اور کنجوس شخص جب بھی کوئی چیز خرچ کرنے کا ارادہ کرتا ہے اور وہ اس بارے میں سوچتا ہے، تو وہ زرہ اور مضبوط ہو جاتی ہے اور اس کا ہر حلقہ اپنی جگہ پر جم جاتا ہے، وہ اسے کشادہ کرنے کی کوشش کرتا ہے، لیکن وہ کشادہ نہیں ہوتی۔“ [صحیح ابن حبان/كتاب الزكاة/حدیث: 3332]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جنت کے ایک دروازے پر ایک فرشتہ یہ کہتا ہے: کون شخص آج قرض دے گا کہ کل اس کو بدلہ دیا جائے؟ دوسرے دروازے پر فرشتہ یہ کہتا ہے: اے اللہ! (اپنی راہ میں) خرچ کرنے والے کو مزید عطا کر اور نہ کرنے والے کا (مال) ضائع کر دے۔“ [صحیح ابن حبان/كتاب الزكاة/حدیث: 3333]

سیدنا ابو سعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”آدمی اپنی زندگی اور صحت کے دوران ایک درہم صدقہ کر دے، یہ اس کے لیے اس سے زیادہ بہتر ہے کہ وہ مرنے کے قریب ایک سو درہم صدقہ کرے۔“ [صحیح ابن حبان/كتاب الزكاة/حدیث: 3334]

سیدنا ابوہریرہ رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عرض کی: یا رسول اللہ صلی اللہ علیہ وسلم ! کون سا صدقہ زیادہ بڑا ہے؟ نبی اکرم صلی اللہ علیہ وسلم نے ارشاد فرمایا: ”یہ کہ تم ایسی حالت میں صدقہ کرو کہ تم تندرست ہو اور تمہیں مال کی قلت کا اندیشہ بھی ہو اور خوشحالی کی خواہش بھی ہو، تم اسے اتنی تاخیر سے نہ کرو کہ جان حلق تک پہنچ جائے، پھر تم یہ کہو کہ فلاں کو اتنا مل جائے اور فلاں کو اتنا مل جائے، حالانکہ وہ ویسے ہی فلاں کو مل جانا ہے۔“ [صحیح ابن حبان/كتاب الزكاة/حدیث: 3335]

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص مرنے کے قریب صدقہ کرتا ہے اس کی مثال اس طرح ہے، جس طرح وہ خود سیر ہونے کے بعد کوئی چیز دیتا ہے۔“ [صحیح ابن حبان/كتاب الزكاة/حدیث: 3336]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک دن اپنے اصحاب سے فرمایا: ”تم لوگ صدقہ کرو۔“ ایک صاحب نے عرض کی: یا رسول اللہ صلی اللہ علیہ وسلم ! میرے پاس ایک دینار ہے۔ نبی اکرم صلی اللہ علیہ وسلم نے فرمایا: ”تم اس کو اپنے اوپر خرچ کرو۔“ اس نے عرض کی کہ اگر میرے پاس ایک اور ہو؟ نبی اکرم صلی اللہ علیہ وسلم نے فرمایا: ”تم اسے اپنی بیوی پر خرچ کرو۔“ اس نے عرض کی: اگر میرے پاس ایک اور ہو؟ تو نبی اکرم صلی اللہ علیہ وسلم نے فرمایا: ”تم اپنی اولاد پر خرچ کرو۔“ اس نے عرض کی: اگر میرے پاس ایک اور ہو؟ تو فرمایا: ”تم اس کو اپنے خادم پر خرچ کرو۔“ اس نے دریافت کیا: اگر میرے پاس ایک اور ہو؟ تو فرمایا: ”تم زیادہ سمجھ دار ہو۔“ (یعنی تمہیں خود اندازہ ہو گا اسے کسی پر خرچ کرنا چاہیے)۔ [صحیح ابن حبان/كتاب الزكاة/حدیث: 3337]

سیدنا ابومسعود رضی اللہ عنہ بیان کرتے ہیں: ہم لوگ اپنی پشتوں پر بوجھ لادا کرتے تھے (یعنی مزدوری کرتے تھے) اور پھر ہم میں سے کوئی شخص کوئی چیز لاتا اور اسے صدقہ کر دیتا تھا، ایک شخص نصف صاع لے آتا تھا اور ایک شخص اس سے تھوڑی سی زیادہ چیز لے آتا تھا، تو منافقین یہ کہتے تھے: اللہ تعالیٰ اس شخص کے صدقے سے بے نیاز ہے، اور وہ یہ کہتے تھے: یہ دکھاوے کے طور پر ہے، تو اللہ تعالیٰ نے اس بارے میں یہ آیت نازل فرمائی: ﴿الَّذِينَ يَلْمِزُونَ الْمُطَّوِّعِينَ مِنَ الْمُؤْمِنِينَ فِي الصَّدَقَاتِ وَالَّذِينَ لَا يَجِدُونَ إِلَّا جُهْدَهُمْ﴾ [سورة التوبة: 79] ”وہ لوگ جو اہل ایمان سے تعلق رکھنے والے افراد پر ان کے کیے گئے صدقے کے حوالے سے نکتہ چینی کرتے ہیں، (اور) وہ اہل ایمان جنہیں (صدقہ کرنے کے لیے) صرف اپنی محنت کی کمائی ملتی ہے۔“ [صحیح ابن حبان/كتاب الزكاة/حدیث: 3338]