سیدنا جابر بن عبداللہ رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص میرے اس منبر پر جھوٹی قسم اٹھائے وہ جہنم میں اپنا ٹھکانہ بنا لیتا ہے۔“ [صحیح ابن حبان/كتاب الأيمان/حدیث: 4368]

شعبہ بن توام بیان کرتے ہیں: سیدنا قیس بن عاصم رضی اللہ عنہ نے نبی اکرم صلی اللہ علیہ وسلم سے (زمانہ جاہلیت کے دستور کے مطابق) حلیف بنانے کے بارے میں دریافت کیا، تو نبی اکرم صلی اللہ علیہ وسلم نے فرمایا: ”اسلام میں (اس طرز پر) کوئی حلیف بنانا نہیں ہے۔“ [صحیح ابن حبان/كتاب الأيمان/حدیث: 4369]

سیدنا عبداللہ بن عباس رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اسلام میں (زمانہ جاہلیت کے رواج کے مطابق) حلیف بنانے کی کوئی حیثیت نہیں ہے اور جو کچھ زمانہ جاہلیت میں تھا اسلام نے اس کی شدت میں اضافہ ہی کیا ہے (راوی کو شک ہے شاید یہ الفاظ ہیں) اس کی تیزی میں اضافہ ہی کیا ہے۔“ [صحیح ابن حبان/كتاب الأيمان/حدیث: 4370]

سیدنا جبیر بن مطعم رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اسلام میں حلیف بنانے کی کوئی حیثیت نہیں ہے اور زمانہ جاہلیت سے تعلق رکھنے والا جو بھی حلف ہے اسلام اس کی شدت میں اضافہ ہی کرتا ہے۔“ [صحیح ابن حبان/كتاب الأيمان/حدیث: 4371]

سیدنا جبیر بن مطعم رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اسلام میں حلف کی کوئی حیثیت نہیں ہے اور زمانہ جاہلیت میں جو حلف تھا اسلام نے اس کی شدت میں اضافہ ہی کیا ہے۔“ (امام ابن حبان رحمہ اللہ فرماتے ہیں:) یہ روایت سعد بن ابراہیم نے اپنے والد کے حوالے سے سیدنا جبیر رضی اللہ عنہ سے سنی ہے، انہوں نے یہ روایت نافع بن جبیر کے حوالے سے ان کے والد سے سنی ہے تو اس کی دونوں سندیں محفوظ ہیں۔ [صحیح ابن حبان/كتاب الأيمان/حدیث: 4372]

محمد بن جبیر اپنے والد کے حوالے سے سیدنا عبدالرحمن بن عوف رضی اللہ عنہ سے نبی اکرم صلی اللہ علیہ وسلم کا یہ فرمان نقل کرتے ہیں: ”میں اپنے چچا کے ہمراہ «الْمُطَيَّبِينَ» کے حلف میں شریک ہوا تھا اور مجھے یہ بات پسند نہیں کہ میں اس حلف کی خلاف ورزی کروں خواہ مجھے اس کے عوض میں سرخ اونٹ ملیں۔“ [صحیح ابن حبان/كتاب الأيمان/حدیث: 4373]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”میں قریش کے کسی بھی حلف میں شریک نہیں ہوا صرف «الْمُطَيَّبِينَ» ”مطیبین“ کے حلف میں شریک ہوا تھا اور میری یہ خواہش نہیں ہے کہ میں اس حلف کو توڑوں خواہ اس کے عوض میں مجھے سرخ اونٹ مل رہے ہوں۔“ (راوی بیان کرتے ہیں) «الْمُطَيَّبِينَ» ”مطیبین“ سے مراد بنو ہاشم، بنو امیہ، بنو زہرہ اور بنو مخزوم ہیں۔ (امام ابن حبان رحمہ اللہ فرماتے ہیں:) دونوں روایات میں یہ بات مذکور ہے: ”میں «الْمُطَيَّبِينَ» ”مطیبین“ کے حلف میں شریک ہوا تھا“، حالانکہ نبی اکرم صلی اللہ علیہ وسلم «الْمُطَيَّبِينَ» ”مطیبین“ کے حلف میں شریک نہیں ہوئے تھے کیونکہ «الْمُطَيَّبِينَ» ”مطیبین“ کا حلف نبی اکرم صلی اللہ علیہ وسلم کی پیدائش سے پہلے ہوا تھا۔ نبی اکرم صلی اللہ علیہ وسلم «حِلْفُ الْفُضُولِ» ”حلف الفضول“ میں شریک ہوئے تھے اور یہ بھی «الْمُطَيَّبِينَ» ”مطیبین“ کے درمیان ہوا تھا، میں نے اس روایت کے بارے میں اپنی کتاب «التَّوْرِيثُ وَالْحَجْبُ» ”التوريث والحجب“ میں تفصیل سے بحث ذکر کر دی ہے۔ [صحیح ابن حبان/كتاب الأيمان/حدیث: 4374]