سیدنا انس بن مالک رضی اللہ عنہ بیان کرتے ہیں کہ میں سیدنا ابوعبیدہ بن جراح رضی اللہ عنہ، سیدنا ابی بن کعب رضی اللہ عنہ اور سیدنا ابوطلحہ انصاری رضی اللہ عنہ کو فضیخ نامی شراب پلا رہا تھا، اسی دوران ایک شخص ان کے پاس آیا اور بولا: ”شراب کو حرام قرار دے دیا گیا ہے“، تو سیدنا ابوطلحہ رضی اللہ عنہ نے فرمایا: ”اے انس! تم اس مٹکے کے پاس جاؤ اور اسے توڑ دو۔“ سیدنا انس رضی اللہ عنہ بیان کرتے ہیں: میں اٹھ کر اپنے بیلچے کے پاس آیا، میں نے وہ اس مٹکے کے نیچے مارا اور اسے توڑ دیا۔ [صحیح ابن حبان/كتاب الأشربة/حدیث: 5364]

قیس بن حبتر بیان کرتے ہیں: میں نے سیدنا عبداللہ بن عباس رضی اللہ عنہما سے سبز گھڑے، سفید گھڑے اور سرخ گھڑے کے بارے میں دریافت کیا، تو انہوں نے فرمایا: اس بارے میں سب سے پہلے عبدالقیس قبیلے کے وفد نے نبی اکرم صلی اللہ علیہ وسلم سے دریافت کیا تھا تو نبی اکرم صلی اللہ علیہ وسلم نے ارشاد فرمایا: ”تم لوگ دباء، مزفت اور حنتم (نامی برتنوں) میں نہ پیو اور تم مٹکے میں نہ پیو، تم مشکیزوں میں پی لیا کرو۔“ لوگوں نے عرض کی: اگر مشکیزے میں موجود (نبیذ میں) شدت آ جائے؟ نبی اکرم صلی اللہ علیہ وسلم نے فرمایا: ”اگر مشکیزے میں موجود مشروب میں شدت آ جاتی ہے تو تم اس پر پانی ڈال لو۔“ انہوں نے عرض کی: اگر پھر بھی شدت رہے؟ نبی اکرم صلی اللہ علیہ وسلم نے فرمایا: ”پھر تم اسے بہا دو۔“ پھر آپ صلی اللہ علیہ وسلم نے ارشاد فرمایا: ”بے شک اللہ تعالیٰ نے مجھ پر حرام قرار دیا ہے۔“ (راوی کو شک ہے، شاید یہ الفاظ ہیں) ”اللہ تعالیٰ نے شراب، جوے اور کوبہ کو حرام قرار دیا ہے اور ہر نشہ آور چیز بھی حرام ہے۔“ سفیان نامی راوی کہتے ہیں: میں نے علی بن بذیمہ سے کہا: کوبہ سے مراد کیا ہے؟ انہوں نے کہا: ڈھول۔ [صحیح ابن حبان/كتاب الأشربة/حدیث: 5365]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”ہر نشہ آور چیز خمر ہے اور ہر نشہ آور چیز حرام ہے، جو شخص دنیا میں خمر پئے گا اور مر جائے گا جبکہ وہ اسے باقاعدگی سے پیتا ہو اور اس نے اس سے توبہ نہ کی ہو تو وہ آخرت میں اسے نہیں پی سکے گا۔“ (امام ابن حبان رحمہ اللہ فرماتے ہیں:) روایت کے الفاظ ابوکامل کے نقل کردہ ہیں۔ [صحیح ابن حبان/كتاب الأشربة/حدیث: 5366]

نبی اکرم صلی اللہ علیہ وسلم کی زوجہ محترمہ سیدہ ام حبیبہ رضی اللہ عنہا بیان کرتی ہیں: یمن سے تعلق رکھنے والے کچھ لوگ نبی اکرم صلی اللہ علیہ وسلم کی خدمت میں حاضر ہوئے، نبی اکرم صلی اللہ علیہ وسلم نے انہیں نماز، سنتوں اور فرائض کی تعلیم دی۔ ان لوگوں نے عرض کی: یا رسول اللہ! ہمارے ہاں ایک مشروب ہے جسے ہم گندم اور جو سے بناتے ہیں۔ نبی اکرم صلی اللہ علیہ وسلم نے دریافت کیا: ” «غَبِیْرَاءُ» (کے بارے میں تم پوچھنا چاہتے ہو؟)“ ان لوگوں نے عرض کی: جی ہاں۔ نبی اکرم صلی اللہ علیہ وسلم نے فرمایا: ”تم اسے نہ کھاؤ۔“ دو دن کے بعد پھر انہوں نے نبی اکرم صلی اللہ علیہ وسلم کے سامنے اس بات کا تذکرہ کیا تو نبی اکرم صلی اللہ علیہ وسلم نے فرمایا: ” «غَبِیْرَاءُ» (کے بارے میں تم دریافت کرنا چاہتے ہو؟)“ انہوں نے عرض کی: جی ہاں۔ نبی اکرم صلی اللہ علیہ وسلم نے فرمایا: ”تم اسے نہ کھاؤ۔“ جب ان لوگوں نے روانہ ہونے کا ارادہ کیا تو انہوں نے پھر نبی اکرم صلی اللہ علیہ وسلم سے اس بارے میں دریافت کیا تو نبی اکرم صلی اللہ علیہ وسلم نے فرمایا: ”تم ( «غَبِیْرَاءُ» کے بارے میں دریافت کرنا چاہتے ہو؟)“ ان لوگوں نے عرض کی: جی ہاں۔ نبی اکرم صلی اللہ علیہ وسلم نے فرمایا: ”تم اسے نہ کھاؤ۔“ (امام ابن حبان رحمہ اللہ فرماتے ہیں:) عمر بن حکم نامی راوی عمر بن حکم بن ثوبان ہیں جو اوس قبیلے کے حلیف ہیں اور اہل مدینہ کے جلیل القدر افراد میں سے ایک ہیں، انہوں نے سیدنا عبداللہ بن عمر رضی اللہ عنہما، سیدنا ابوہریرہ رضی اللہ عنہ اور سیدہ ام حبیبہ رضی اللہ عنہا سے احادیث کا سماع کیا ہے۔ [صحیح ابن حبان/كتاب الأشربة/حدیث: 5367]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”ہر نشہ آور چیز حرام ہے اور ہر نشہ آور چیز خمر ہے۔“ [صحیح ابن حبان/كتاب الأشربة/حدیث: 5368]

سیدنا عبداللہ بن عمر رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ”ہر نشہ آور چیز حرام ہے اور ہر نشہ آور چیز خمر ہے۔“ [صحیح ابن حبان/كتاب الأشربة/حدیث: 5369]

عامر بن سعد اپنے والد (سیدنا سعد بن ابی وقاص رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم نے ”اس چیز کے تھوڑے استعمال سے بھی منع کیا ہے جس کی زیادہ مقدار نشہ کر دے۔“ [صحیح ابن حبان/كتاب الأشربة/حدیث: 5370]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم سے «الْبِتْعِ» (نامی مخصوص قسم کی شراب) کے بارے میں دریافت کیا گیا تو آپ صلی اللہ علیہ وسلم نے فرمایا: ”ہر وہ مشروب جو نشہ کر دے وہ حرام ہے۔“ [صحیح ابن حبان/كتاب الأشربة/حدیث: 5371]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم سے «الْبِتْعُ» (نامی مخصوص قسم کی شراب) کے بارے میں دریافت کیا گیا تو آپ صلی اللہ علیہ وسلم نے فرمایا: ”ہر وہ مشروب جو نشہ کر دے وہ حرام ہے۔“ [صحیح ابن حبان/كتاب الأشربة/حدیث: 5372]

سعید بن بردہ اپنے والد کے حوالے سے اپنے دادا کا یہ بیان نقل کرتے ہیں: نبی اکرم صلی اللہ علیہ وسلم نے انہیں اور سیدنا معاذ بن جبل رضی اللہ عنہما کو یمن بھیجا۔ آپ صلی اللہ علیہ وسلم نے ان دونوں حضرات سے فرمایا: ”تم دونوں خوشخبری سنانا اور آسانی فراہم کرنا، تم دونوں تعلیم دینا اور متنفر کرنے کی کوشش نہ کرنا اور تم ایک دوسرے کے ساتھ رہنا۔“ جب سیدنا معاذ رضی اللہ عنہ مڑ کر چلے گئے تو سیدنا ابوموسیٰ اشعری رضی اللہ عنہ واپس آئے۔ انہوں نے عرض کی: یا رسول اللہ! وہاں انگور سے ایک شراب بنائی جاتی ہے جسے پکا لیا جاتا ہے یہاں تک کہ وہ پختہ ہو جاتی ہے اور «المِزْرُ» ”مزر“ ہے جسے جو سے بنایا جاتا ہے۔ نبی اکرم صلی اللہ علیہ وسلم نے ارشاد فرمایا: ”ہر وہ چیز جو نماز سے نشہ کر دے وہ حرام ہے۔“ (امام ابن حبان رحمہ اللہ فرماتے ہیں:) یہ روایت غریب غریب (یعنی انتہائی زیادہ غریب) ہے۔ [صحیح ابن حبان/كتاب الأشربة/حدیث: 5373]