سیدنا عبداللہ بن عمر رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ” «كُلُّ مُسْكِرٍ خَمْرٌ وَكُلُّ خَمْرٍ حَرَامٌ» ہر نشہ آور چیز خمر ہے اور ہر خمر حرام ہے۔“ [صحیح ابن حبان/كتاب الأشربة/حدیث: 5354]

سیدنا جابر بن عبداللہ رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ”تین لوگ ایسے ہیں جن کی نماز اللہ تعالیٰ قبول نہیں کرے گا اور ان کی کوئی نیکی آسمان کی طرف بلند نہیں ہوگی: وہ مفرور غلام جب تک وہ اپنے آقا کے پاس واپس نہیں آ جاتا اور اپنا ہاتھ اس کے ہاتھ میں نہیں دے دیتا، وہ عورت جس کا شوہر اس سے ناراض ہو جب تک اس کا شوہر راضی نہیں ہو جاتا اور نشے کا شکار شخص جب تک اس کا نشہ ختم نہیں ہوتا۔“ [صحیح ابن حبان/كتاب الأشربة/حدیث: 5355]

سیدنا عبداللہ بن عباس رضی اللہ عنہما فرماتے ہیں، سیدنا جبرائیل علیہ السلام نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: ”اے سیدنا محمد صلی اللہ علیہ وسلم ! بے شک اللہ تعالیٰ نے شراب پر، اسے نچوڑنے والے پر، اسے نچڑوانے والے پر، اسے اٹھانے والے پر، جس کے لیے اٹھا کر لے جائی جا رہی ہے اس پر، اسے پینے والے پر، اسے فروخت کرنے والے پر، اسے خریدنے والے پر، اسے پلانے والے پر، اور جسے وہ پلائی جا رہی ہے، اس پر لعنت کی ہے۔“ [صحیح ابن حبان/كتاب الأشربة/حدیث: 5356]

سیدنا عبداللہ بن عمرو رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جو شخص شراب پیے اور نشے میں آ جائے، چالیس دن تک اس کی نماز قبول نہیں ہوتی، اگر وہ (اس دوران) مر جائے تو جہنم میں داخل ہو گا اور اگر وہ توبہ کر لے تو اللہ تعالیٰ اس کی توبہ قبول کر لے گا۔ اگر وہ دوبارہ ایسا کرے اور شراب پی کر نشے میں آ جائے تو اس کی چالیس دن تک نماز قبول نہیں ہو گی اور اگر وہ (اسی عالم میں) مر گیا تو (جہنم میں داخل ہو گا)، اگر پھر اس نے توبہ کر لی تو اللہ تعالیٰ اس کی توبہ کو قبول کرے گا اور اگر پھر وہ ایسا کرے اور شراب پی کر نشے میں آ جائے تو چالیس دن تک اس کی نماز قبول نہیں ہو گی اور اگر وہ (اسی عالم میں) مر گیا، تو (جہنم میں داخل ہو گا) اور اگر اس نے توبہ کر لی تو اللہ تعالیٰ اس کی توبہ کو قبول کرے گا اور اگر وہ چوتھی مرتبہ ایسا کرے تو اللہ تعالیٰ کے ذمے یہ بات لازم ہے قیامت کے دن اسے «طِينَةَ الْخَبَالِ» ”طینۃ الخبال“ پلائے۔“ لوگوں نے عرض کی: «طِينَةَ الْخَبَالِ» ”طینۃ الخبال“ سے مراد کیا ہے؟ نبی اکرم صلی اللہ علیہ وسلم نے ارشاد فرمایا: ”اہلِ جہنم (کے خون اور پیپ وغیرہ) کا نچوڑ۔“ [صحیح ابن حبان/كتاب الأشربة/حدیث: 5357]

سیدنا عبداللہ بن عمر رضی اللہ عنہما بیان کرتے ہیں کہ سیدنا عمر بن خطاب رضی اللہ عنہ نے نبی اکرم صلی اللہ علیہ وسلم کے منبر پر ہمیں خطبہ دیتے ہوئے اللہ تعالیٰ کی حمد و ثناء بیان کی، پھر یہ بات بیان کی کہ جب شراب کی حرمت کا حکم نازل ہوا تو یہ پانچ چیزوں سے بنائی جاتی تھی: انگور، کھجور، شہد، گندم اور جو، ویسے «الْخَمْرُ» ”شراب“ ہر اس چیز کو کہا جاتا ہے جو عقل کو ڈھانپ لے۔ [صحیح ابن حبان/كتاب الأشربة/حدیث: 5358]

سیدنا عبداللہ بن عمر رضی اللہ عنہما بیان کرتے ہیں کہ میں نے سیدنا عمر رضی اللہ عنہ کو نبی اکرم صلی اللہ علیہ وسلم کے منبر پر یہ بیان کرتے ہوئے سنا: «أَمَّا بَعْدُ» ”اما بعد! اے لوگو! جب شراب کی حرمت کا حکم نازل ہوا تو یہ پانچ چیزوں سے بنائی جاتی تھی: انگور، کھجور، شہد، گندم اور جو، ویسے «الْخَمْرُ» ”خمر“ ہر وہ چیز ہے جو عقل کو ڈھانپ لے۔ اے لوگو! تین چیزیں ایسی ہیں جن کے بارے میں میری یہ خواہش تھی کہ نبی اکرم صلی اللہ علیہ وسلم ہم سے جدا ہونے سے پہلے ہمیں ان کے بارے میں زیادہ وضاحت سے بتا دیتے: «الْكَلَالَةُ» ”کلالہ“، (وراثت میں) دادا کا مسئلہ اور سود کی کچھ صورتیں۔“ [صحیح ابن حبان/كتاب الأشربة/حدیث: 5359]

سیدنا جابر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”ہر نشہ آور چیز حرام ہے اور اللہ تعالیٰ کے ذمے یہ بات لازم ہے کہ جو شخص نشہ آور چیز پیتا ہے، اللہ تعالیٰ قیامت کے دن اسے «طِينَةُ الْخَبَالِ» ”طینۃ الخبال“ پلائے۔“ [صحیح ابن حبان/كتاب الأشربة/حدیث: 5360]

سیدنا انس بن مالک رضی اللہ عنہ بیان کرتے ہیں کہ سیدنا ابوعبیدہ بن جراح رضی اللہ عنہ، سیدنا سہیل بن بیضاء رضی اللہ عنہ اور سیدنا ابی بن کعب رضی اللہ عنہ، سیدنا ابوطلحہ رضی اللہ عنہ کے ہاں موجود تھے اور میں ان حضرات کو شراب پلا رہا تھا۔ وہ حضرات اسے پی ہی رہے تھے کہ اسی دوران وہاں سے ایک مسلمان گزرا اور اس نے اعلان کیا: ”کیا تم لوگ یہ بات جانتے ہو کہ شراب کو حرام قرار دے دیا گیا ہے؟“ سیدنا انس رضی اللہ عنہ بیان کرتے ہیں: اللہ کی قسم! انہوں نے اس بات کا انتظار نہیں کیا (اور فوراً) مجھے یہ ہدایت کی کہ ”تم اپنے برتن میں موجود شراب کو انڈیل دو“ تو میں نے ایسا ہی کیا۔ اس کے بعد اللہ تعالیٰ کی بارگاہ میں حاضر ہونے تک انہوں نے کبھی شراب نہیں پی۔ اس زمانے میں شراب تازہ اور خشک کھجوروں سے بنائی جاتی تھی اور ان دنوں ہماری شراب یہی تھی۔ [صحیح ابن حبان/كتاب الأشربة/حدیث: 5361]

سیدنا انس بن مالک رضی اللہ عنہ بیان کرتے ہیں: میں اپنے چچاؤں کو فضیخ پلا رہا تھا کیونکہ میں عمر میں ان میں سب سے کم سن تھا۔ اسی دوران ایک شخص آیا اور بولا: شراب کو حرام قرار دے دیا گیا ہے، تو انہوں نے کہا: اے انس! اسے گرا دو، تو میں نے اسے گرا دیا۔ سلیمان نامی راوی کہتے ہیں: میں نے دریافت کیا کہ وہ شراب کس چیز کی بنائی جاتی تھی؟ سیدنا انس رضی اللہ عنہ نے جواب دیا: خشک اور تازہ کھجوروں کی۔ راوی بیان کرتے ہیں: ابوبکر بن انس رحمہ اللہ نے یہ بات بیان کی کہ ان دنوں شراب اسی چیز سے بنائی جاتی تھی۔ [صحیح ابن حبان/كتاب الأشربة/حدیث: 5362]

سیدنا انس رضی اللہ عنہ بیان کرتے ہیں: میں سیدنا ابوطلحہ، سیدنا ابوعبیدہ، سیدنا کعب اور سیدنا سہیل بن بیضاء رضی اللہ عنہم کو خشک اور تازہ کھجور سے بنی ہوئی نبیذ پلا رہا تھا، اسی دوران ایک منادی نے یہ اعلان کیا: ”خبردار! شراب کو حرام قرار دے دیا گیا ہے۔“ سیدنا انس رضی اللہ عنہ بیان کرتے ہیں: اللہ کی قسم! انہوں نے اس بات کا انتظار نہیں کیا کہ وہ پہلے اس بات کی تحقیق کر لیں کہ یہ بات درست ہے یا غلط ہے، ان لوگوں نے کہا: اے انس! اسے بہا دو، تو میں نے اسے بہا دیا، اللہ کی قسم! اس کے بعد یہ حضرات مرتے دم تک دوبارہ کبھی شراب کی طرف نہیں گئے، ان دنوں شراب خشک اور تازہ کھجوروں سے بنائی جاتی تھی۔ [صحیح ابن حبان/كتاب الأشربة/حدیث: 5363]