سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص (کسی دوسرے کی) پٹائی کرے تو اس کے چہرے (پر مارنے سے) اجتناب کرے کیونکہ اللہ تعالیٰ نے سیدنا آدم علیہ السلام کو اپنی صورت کے مطابق پیدا کیا ہے۔“ (امام ابن حبان رحمہ اللہ فرماتے ہیں:) اس کے ذریعے مراد یہ ہے: جس شخص کی پٹائی ہو رہی ہے اس کی شکل (سیدنا آدم علیہ السلام کی صورت کے مطابق ہے) کیونکہ جب مارنے والا شخص اپنے مسلمان بھائی کے چہرے پر مارتا ہے تو اللہ تعالیٰ نے سیدنا آدم علیہ السلام کو اس کی صورت کے مطابق پیدا کیا ہے۔ [صحیح ابن حبان/كتاب الحظر والإباحة/حدیث: 5605]

عکرمہ بیان کرتے ہیں کہ سیدنا علی رضی اللہ عنہ کے پاس کچھ لوگ لائے گئے جو اسلام کو چھوڑ کر مرتد ہو گئے تھے (راوی کو شک ہے، شاید یہ الفاظ ہیں) زندیق ہو گئے تھے۔ ان کے ہمراہ ان کی تحریریں بھی تھیں۔ سیدنا علی رضی اللہ عنہ کے حکم کے تحت آگ جلائی گئی اور انہیں ان کی تحریروں سمیت آگ میں ڈال دیا گیا۔ اس بات کی اطلاع سیدنا عبداللہ بن عباس رضی اللہ عنہما کو ملی تو انہوں نے فرمایا: اگر میں ہوتا، تو میں انہیں جلاتا نہیں، کیونکہ نبی اکرم صلی اللہ علیہ وسلم نے اس سے منع کیا ہے، لیکن میں انہیں قتل کروا دیتا کیونکہ نبی اکرم صلی اللہ علیہ وسلم نے یہ بات ارشاد فرمائی ہے۔ (جلانے سے منع کرنے کی روایت یہ ہے): ”تم لوگ اللہ کے عذاب کے مطابق عذاب نہ دو۔“ (اور ان کو قتل کروانے کی دلیل یہ حدیث ہے): ”جو شخص اپنا دین تبدیل کر لے اسے قتل کر دو۔“ [صحیح ابن حبان/كتاب الحظر والإباحة/حدیث: 5606]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جو شخص ہمیں تیر مارے وہ ہم میں سے نہیں ہے۔“ [صحیح ابن حبان/كتاب الحظر والإباحة/حدیث: 5607]

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”کسی بھی ذی روح چیز کو (نشانے بازی کے لئے) نشانہ نہ بناؤ۔“ [صحیح ابن حبان/كتاب الحظر والإباحة/حدیث: 5608]

سیدنا ابوایوب انصاری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”جانور کو باندھ کر (اس پر نشانہ بازی کرنے) سے منع کیا ہے۔“ [صحیح ابن حبان/كتاب الحظر والإباحة/حدیث: 5609]

عبید بن یعلیٰ بیان کرتے ہیں کہ ہم عبدالرحمٰن بن خالد بن ولید کے ہمراہ ایک جنگ میں شریک ہوئے، وہاں دشمن کے ہمراہ چار اونٹ لائے گئے تو عبدالرحمٰن بن خالد کے حکم کے تحت انہیں باندھ کر نیزوں کے ذریعے قتل کر دیا گیا، اس بات کی اطلاع سیدنا ابوایوب انصاری رضی اللہ عنہ کو ملی تو انہوں نے فرمایا: میں نے نبی اکرم صلی اللہ علیہ وسلم کو ”باندھ کر قتل کرنے سے منع کرتے ہوئے“ سنا ہے، اس ذات کی قسم جس کے دستِ قدرت میں میری جان ہے! اگر وہ کوئی مرغی بھی ہوتی تو میں اسے بھی باندھ کر (نشانہ بازی نہ کرتا)۔ جب اس بات کی اطلاع عبدالرحمٰن بن خالد کو ملی تو انہوں نے چار غلام آزاد کیے۔ [صحیح ابن حبان/كتاب الحظر والإباحة/حدیث: 5610]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب تمہارا ہبار بن اسود اور نافع بن عبدقیس سے سامنا ہو تو ان دونوں کو آگ میں جلا دینا۔“ اس کے بعد نبی اکرم صلی اللہ علیہ وسلم نے ارشاد فرمایا: ”آگ کے ذریعے عذاب صرف اللہ تعالیٰ دے سکتا ہے۔ جب تمہارا ان دونوں سے سامنا ہو تو تم ان دونوں کو قتل کر دینا۔“ [صحیح ابن حبان/كتاب الحظر والإباحة/حدیث: 5611]

عروہ بیان کرتے ہیں کہ ہشام بن حکیم نے عیاض بن غنم رضی اللہ عنہما کو پایا، وہ حمص کے گورنر تھے۔ انہوں نے جزیہ کی وصولی کے لیے کچھ لوگوں کو دھوپ میں کھڑا کیا ہوا تھا، تو ہشام بن حکیم رضی اللہ عنہ نے کہا: اے عیاض! یہ کیا ہے؟ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بے شک اللہ تعالیٰ ان لوگوں کو (قیامت کے دن) عذاب دے گا جو دنیا میں لوگوں کو عذاب دیتے ہیں۔“ [صحیح ابن حبان/كتاب الحظر والإباحة/حدیث: 5612]

عروہ بیان کرتے ہیں کہ سیدنا حکیم بن حزام رضی اللہ عنہ، عمیر بن سعد رضی اللہ عنہ کے پاس سے گزرے جو جزیہ کی وجہ سے لوگوں کو دھوپ میں کھڑا کرنے کی سزا دے رہے تھے۔ سیدنا حکیم بن حزام رضی اللہ عنہ نے فرمایا: اے عمیر! میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بے شک اللہ تعالیٰ ان لوگوں کو عذاب دے گا جو دنیا میں دوسرے لوگوں کو عذاب دیتے ہیں۔“ سیدنا حکیم رضی اللہ عنہ نے فرمایا: تم جاؤ اور انہیں چھوڑ دو۔ (امام ابن حبان رحمہ اللہ فرماتے ہیں:) عروہ نے یہ روایت ہشام بن حکیم رضی اللہ عنہما سے سنی ہے جو عیاض بن غنم رضی اللہ عنہ کو ایسا کرنے پر ڈانٹ رہے تھے اور انہوں نے یہ روایت سیدنا حکیم بن حزام رضی اللہ عنہ سے بھی سنی ہے جنہوں نے عمیر بن سعد رضی اللہ عنہ کو ایسا کرنے پر ڈانٹا تھا، تو یہ دونوں طرق محفوظ ہیں۔ [صحیح ابن حبان/كتاب الحظر والإباحة/حدیث: 5613]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایک چیونٹی نے کسی نبی کو کاٹ لیا تو ان کے حکم کے تحت چیونٹیوں کی بستی کو آگ لگا دی گئی تو اللہ تعالیٰ نے ان کی طرف یہ وحی کی: چیونٹی نے تمہیں کاٹا تھا، تو تم نے ایک پوری امت کو ہلاک کر دیا جو تسبیح بیان کرتی تھی۔“ [صحیح ابن حبان/كتاب الحظر والإباحة/حدیث: 5614]