سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم منبر پر یہ ارشاد فرماتے تھے: ”میں دو کمزور لوگوں یعنی یتیم اور عورت کے مال کے بارے میں (تمہیں بچتے رہنے کی تلقین کرتا ہوں)۔“ [صحیح ابن حبان/كتاب الحظر والإباحة/حدیث: 5565]

سیدنا ابوبرزہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قیامت کے دن کچھ لوگوں کو ان کی قبروں سے زندہ کیا جائے گا، ان کے منہ سے آگ نکل رہی ہو گی۔“ عرض کی گئی: یا رسول اللہ ( صلی اللہ علیہ وسلم )! یہ کون لوگ ہوں گے؟ نبی اکرم صلی اللہ علیہ وسلم نے فرمایا: ”تم نے غور نہیں کیا۔ اللہ تعالیٰ نے ارشاد فرمایا ہے: ﴿إِنَّ الَّذِينَ يَأْكُلُونَ أَمْوَالَ الْيَتَامَىٰ ظُلْمًا إِنَّمَا يَأْكُلُونَ فِي بُطُونِهِمْ نَارًا﴾ [سورة النساء: 10] ”بے شک وہ لوگ جو یتیموں کا مال ظلم کے طور پر کھا لیتے ہیں وہ اپنے پیٹوں میں آگ بھرتے ہیں۔““ [صحیح ابن حبان/كتاب الحظر والإباحة/حدیث: 5566]

سیدنا کعب بن عجرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اے کعب بن عجرہ! ایسا گوشت اور خون جنت میں داخل نہیں ہوں گے جن کی نشوونما حرام پر ہوئی ہو، آگ ان کے زیادہ لائق ہے۔ اے کعب بن عجرہ! لوگ دو طرح کی حالت میں نکلتے ہیں: ایک شخص اپنے آپ کو رہا کروا کے خود کو آزاد کروا لیتا ہے اور ایک خود کو غلام بنوا لیتا ہے۔ اے کعب بن عجرہ! نماز قربت کے حصول کا باعث ہے، صدقہ برہان ہے، روزہ ڈھال ہے، صدقہ گناہ کو یوں ختم کر دیتا ہے جس طرح کوئی قوت والا شخص صفا پر جاتا ہے۔“ [صحیح ابن حبان/كتاب الحظر والإباحة/حدیث: 5567]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے مجھ سے فرمایا: ”اے عائشہ (رضی اللہ عنہا)! بظاہر چھوٹے نظر آنے والے (گناہوں سے) بچنے کی کوشش کرنا کیونکہ اللہ تعالیٰ کی بارگاہ میں ان کے حوالے سے بھی باز پرس ہو گی۔“ [صحیح ابن حبان/كتاب الحظر والإباحة/حدیث: 5568]

سیدنا نعمان بن بشیر رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”اپنے اور حرام کے درمیان حلال کے ذریعے رکاوٹ بنا لو، جو شخص ایسا کر لے گا وہ اپنی عزت اور دین کو محفوظ کر لے گا اور جو شخص اس میں چرنے کی کوشش کرے گا تو وہ چراگاہ کے پہلو میں چرنے والا ہو گا اور اس بات کا احتمال موجود ہے کہ وہ چراگاہ کے اندر داخل ہو جائے، ہر بادشاہ کی مخصوص چراگاہ ہوتی ہے، زمین میں اللہ تعالیٰ کی مخصوص چراگاہ اس کی حرام کردہ چیزیں ہیں۔“ [صحیح ابن حبان/كتاب الحظر والإباحة/حدیث: 5569]

سیدنا علی بن ابو طالب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ان سے فرمایا: ”اے علی! تمہارا ایک خزانہ ہے اور تم دو قرنوں والے ہو۔ ایک نظر کے بعد دوسری نظر نہ اٹھاؤ، کیونکہ تمہیں پہلی کا حق حاصل ہے لیکن دوسری کا حق حاصل نہیں ہے۔“ [صحیح ابن حبان/كتاب الحظر والإباحة/حدیث: 5570]

سیدنا جریر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم سے اچانک پڑ جانے والی نظر کے بارے میں دریافت کیا تو آپ نے مجھے یہ ہدایت کی کہ ”میں اپنی نگاہ کو پھیر لوں۔“ (امام ابن حبان رحمہ اللہ فرماتے ہیں:) نظر کو پھیرنے کا حکم لازمی طور پر ہے جو اس چیز کے بارے میں ہے جو جائز نہیں ہے اور یہ اس کے متضاد سے ممانعت کے ہمراہ ملا ہوا ہے اور وہ چیز یہ ہے، جسے حرام قرار دیا گیا ہو اس کی طرف (دیکھنا منع ہے)۔ [صحیح ابن حبان/كتاب الحظر والإباحة/حدیث: 5571]

سیدنا جابر رضی اللہ عنہ بیان کرتے ہیں: نبی اکرم صلی اللہ علیہ وسلم نے ایک خاتون کو دیکھا (وہ آپ کو اچھی لگی) آپ سیدہ زینب رضی اللہ عنہا کے ہاں تشریف لائے آپ نے اپنی خواہش کو پورا کیا پھر آپ (گھر سے باہر) تشریف لائے اور ارشاد فرمایا: ”عورت جب آتی ہے تو شیطان کی شکل میں آتی ہے۔ جب کوئی شخص کسی عورت کو دیکھے اور وہ اسے اچھی لگے تو اسے اپنی بیوی کے پاس جانا چاہیے کیونکہ اس کی بیوی کے پاس بھی وہی کچھ ہوتا ہے جو اس عورت کے پاس ہے۔“ [صحیح ابن حبان/كتاب الحظر والإباحة/حدیث: 5572]

سیدنا جابر رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جب کوئی شخص کسی ایسی عورت کو دیکھے جو اسے اچھی لگے، تو اس شخص کو اپنی بیوی کے پاس جانا چاہیے اور اس کے ساتھ صحبت کرنی چاہیے کیونکہ اس کے پاس بھی وہی (لطف اور قربت ہو گی۔)“ [صحیح ابن حبان/كتاب الحظر والإباحة/حدیث: 5573]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”کوئی شخص کسی دوسرے شخص کی شرمگاہ کی طرف نہ دیکھے، اور کوئی عورت کسی دوسری عورت کی شرمگاہ کی طرف نہ دیکھے، کوئی مرد کسی دوسرے مرد کے ساتھ (برہنہ ہو کر) ایک ہی کپڑے میں نہ لیٹے، اور کوئی عورت کسی دوسری عورت کے ساتھ (برہنہ ہو کر) ایک ہی کپڑے میں نہ لیٹے۔“ [صحیح ابن حبان/كتاب الحظر والإباحة/حدیث: 5574]