ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اللہ کی بندیوں کو اللہ تعالیٰ کی مسجدوں میں آنے سے نہ روکو، اور جب وہ (مسجدوں کے لیے) نکلیں تو خوشبو لگائے بغیر نکلیں“۔ [مسند الشافعی/ كتاب عشرة النساء والإيلاء والخلع /حدیث: 1207]

ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”اللہ کی بندیوں کو اللہ تعالیٰ کی مسجدوں میں آنے سے نہ روکو“۔ [مسند الشافعی/ كتاب عشرة النساء والإيلاء والخلع /حدیث: 1208]

عائشہ رضی اللہ عنہا نے بیان فرمایا کہ ہند رضی اللہ عنہا نبی صلی اللہ علیہ وسلم کے پاس آئیں اور عرض کیا: ”اے اللہ کے رسول صلی اللہ علیہ وسلم ! ابوسفیان (میرا خاوند) بخیل آدمی ہے۔ مجھے اتنا خرچہ نہیں دیتا جو میرے اور میرے بچوں کے لیے کافی ہو۔ ہاں اگر میں ان کی لاعلمی میں ان کے مال سے کچھ لے لوں، کیا مجھ پر اس کا کوئی گناہ تو نہیں؟“ نبی صلی اللہ علیہ وسلم نے فرمایا: ”تم اچھے طریقے سے اتنا لے سکتی ہو جو تمہارے اور تمہارے بچوں کے لیے کافی ہو“۔ [مسند الشافعی/ كتاب عشرة النساء والإيلاء والخلع /حدیث: 1209]

عائشہ رضی اللہ عنہا سے روایت ہے کہ ہند بنت عتبہ رضی اللہ عنہا نبی صلی اللہ علیہ وسلم کے پاس آئی اور عرض کی: ”اے اللہ کے رسول صلی اللہ علیہ وسلم ! ابوسفیان بخیل آدمی ہے اور میرے پاس وہی خرچہ ہوتا ہے جو وہ مجھے دیتا ہے (جو ناکافی ہے)“۔ تو نبی صلی اللہ علیہ وسلم نے فرمایا: ”دستور کے موافق اتنا خرچہ اس کے مال سے لے لے جو تیرے اور تیرے بچوں کے لیے کافی ہو“۔ [مسند الشافعی/ كتاب عشرة النساء والإيلاء والخلع /حدیث: 1210]

ابوہریرہ رضی اللہ عنہ سے روایت ہے کہ ایک آدمی رسول اللہ صلی اللہ علیہ وسلم کے پاس آیا اور کہا: ”اے اللہ کے رسول صلی اللہ علیہ وسلم ! میرے پاس ایک دینار ہے“۔ آپ صلی اللہ علیہ وسلم نے فرمایا: ”اس کو اپنے آپ پر خرچ کر“۔ اس نے کہا: ”میرے پاس ایک اور ہے“۔ آپ صلی اللہ علیہ وسلم نے فرمایا: ”اس کو اپنی اولاد پر خرچ کر“۔ اس نے کہا: ”میرے پاس ایک اور ہے“۔ آپ صلی اللہ علیہ وسلم نے فرمایا: ”اس کو اپنے گھر والوں پر خرچ کر“۔ اس نے کہا: ”میرے پاس ایک اور ہے“۔ آپ صلی اللہ علیہ وسلم نے فرمایا: ”اسے اپنے خادم پر خرچ کر“۔ اس نے کہا: ”میرے پاس ایک اور ہے“۔ آپ صلی اللہ علیہ وسلم نے فرمایا: ”تو بہتر جانتا ہے کہ اسے کہاں خرچ کرنا ہے“۔ سعید نے کہا کہ جب ابوہریرہ رضی اللہ عنہ یہ حدیث بیان کرتے تو فرماتے: ”تیرا بیٹا کہتا ہے کہ مجھ پر خرچ کرو یا کسی اور کے سپرد کر دو تیری بیوی کہتی ہے مجھ پر خرچ کر یا مجھے طلاق دے دے اور تیرا خادم کہتا ہے کہ مجھ پر خرچ کر یا مجھے بیچ دو“۔ [مسند الشافعی/ كتاب عشرة النساء والإيلاء والخلع /حدیث: 1211]

ابوالزناد سے روایت ہے، کہتے ہیں: میں نے سعید بن مسیب سے ایسے آدمی کے بارے میں پوچھا جس کے پاس بیوی پر خرچ کرنے کے لیے مال نہ ہو، تو انہوں نے کہا: ”دونوں کے درمیان علیحدگی کرا دی جائے گی“۔ ابوالزناد نے پوچھا: ”کیا یہ سنت ہے؟“ سعید نے کہا: ”ہاں، سنت ہے“۔ امام شافعی رحمہ اللہ نے فرمایا: سعید کی بات سنت ہے، سے یہ معلوم ہوتا ہے کہ رسول اللہ صلی اللہ علیہ وسلم کی سنت ہے۔ [مسند الشافعی/ كتاب عشرة النساء والإيلاء والخلع /حدیث: 1212]

ابن عمر رضی اللہ عنہما سے روایت ہے کہ عمر بن خطاب رضی اللہ عنہ نے لشکروں کے امیروں کے نام خط لکھا ان آدمیوں کے متعلق جو (گھروں سے) غائب اپنی عورتوں کے پاس نہیں ہیں۔ اور انہیں حکم دیا کہ وہ ان کا اس بات پر مواخذہ کریں کہ وہ یا تو ان کو نفقہ دیں یا طلاق دے دیں۔ اور اگر وہ طلاق دیں تو جتنی دیر ان کو خرچہ نہیں دیا وہ بھی ساتھ دیں۔ [مسند الشافعی/ كتاب عشرة النساء والإيلاء والخلع /حدیث: 1213]

محمد بن منکدر سے روایت ہے کہ ایک آدمی نے نبی صلی اللہ علیہ وسلم کے پاس آکر عرض کی: ”میرے پاس مال ہے اور میں صاحبِ اولاد ہوں، اور میرے باپ کے پاس بھی مال ہے لیکن وہ میرے مال سے لے کر اپنے (دوسرے) بچوں کو کھلانا چاہتا ہے“۔ اس پر نبی صلی اللہ علیہ وسلم نے فرمایا: ”تو بھی اور تیرا مال بھی تیرے باپ کے لیے ہے“۔ [مسند الشافعی/ كتاب عشرة النساء والإيلاء والخلع /حدیث: 1214]

سعید بن مسیب رحمہ اللہ سے روایت ہے کہ محمد بن مسلمہ کی بیٹی، رافع بن خدیج رضی اللہ عنہ کے نکاح میں تھیں، وہ بڑھاپے یا کسی اور وجہ سے انہیں ناپسند کرنے لگے تھے۔ جب انہوں نے طلاق کا ارادہ کیا تو بیوی نے کہا: ”مجھے طلاق نہ دیں، مجھے اپنے پاس روکے رکھیں اور میرے حقِ باری کے بارے میں جو چاہیں فیصلہ کریں“۔ تب اللہ تعالیٰ نے یہ آیت نازل فرمائی: ”اور اگر کوئی عورت اپنے خاوند کی بے تعلقی سے ڈرے“۔ [مسند الشافعی/ كتاب عشرة النساء والإيلاء والخلع /حدیث: 1215]

ابن ابی ملیکہ بیان کرتے ہیں کہ عقیل بن ابی طالب رضی اللہ عنہ نے فاطمہ بنت عقبہ سے شادی کی، تو فاطمہ نے ان سے کہا: ”آپ میرے پاس ہی رہیں اور میں آپ پر خرچ بھی کروں گی“۔ وہ جب بھی ان کے پاس آتے تو وہ (فاطمہ) کہتی تھیں: ”عتبہ اور شیبہ کہاں ہیں؟“ تو وہ (یہ سن کر) خاموش ہو جاتے۔ ایک دن وہ اکتائے ہوئے گھر میں داخل ہوئے تو فاطمہ نے کہا: ”عتبہ بن ربیعہ اور شیبہ بن ربیعہ کہاں ہیں؟“ عقیل رضی اللہ عنہ نے غصے میں کہا: ”جب تو جہنم میں جائے گی تو وہ تیرے بائیں جانب ہوں گے“۔ (یہ بات اس پر سخت گراں گزری) تو اس نے کپڑے باندھے اور عثمان بن عفان رضی اللہ عنہ کے پاس آگئی اور ان سے یہ ساری بات بیان کی۔ عثمان رضی اللہ عنہ نے ابن عباس اور معاویہ رضی اللہ عنہما کو (فیصلے کے لیے) بھیجا۔ ابن عباس رضی اللہ عنہما نے کہا: ”میں ضرور ان کے درمیان علیحدگی کرواؤں گا“، اور معاویہ رضی اللہ عنہ نے فرمایا: ”میں بنی عبد مناف کے دو بزرگوں کے درمیان علیحدگی نہیں ہونے دوں گا“۔ ابن ابی ملیکہ نے کہا کہ وہ دونوں ان کے پاس آئے تو ان کو سخت غصے میں پایا، پھر ان دونوں نے ان کے مابین صلح کروا دی۔ [مسند الشافعی/ كتاب عشرة النساء والإيلاء والخلع /حدیث: 1216]