جعفر بن محمد اپنے باپ سے روایت کرتے ہیں کہ رسول اللہ صلی اللہ علیہ وسلم نے بنی ظفر کے ایک آدمی ابو الشحم یہودی کے پاس اپنی زرہ گروی رکھی۔ [مسند الشافعی/ كتاب الرهن والقراض والحجر والتفليس واللقطة /حدیث: 1474]

جعفر بن محمد اپنے باپ سے روایت کرتے ہیں، فرمایا کہ رسول اللہ صلی اللہ علیہ وسلم نے اپنی زرہ ابو الشحم یہودی کے پاس گروی رکھی۔ [مسند الشافعی/ كتاب الرهن والقراض والحجر والتفليس واللقطة /حدیث: 1475]

جعفر بن محمد اپنے باپ سے روایت کرتے ہیں کہ نبی اکرم صلی اللہ علیہ وسلم نے اپنی زرہ ابو الشحم یہودی کے پاس گروی رکھی۔ [مسند الشافعی/ كتاب الرهن والقراض والحجر والتفليس واللقطة /حدیث: 1476]

سعید بن مسیب رحمہ اللہ سے روایت ہے کہ رسول اللہ صلی اللہ علیہ وسلم نے فرمایا: ”گروی رکھی ہوئی چیز گروی رکھنے والے سے نہیں روکی جائے گی، گروی رکھنے والے کے لیے گروی رکھی ہوئی چیز کی منفعت بھی ہے اور اس کا تاوان بھی اسے ہی دینا ہوگا۔“ امام شافعی رحمہ اللہ نے فرمایا: ”غنمہ“ کا مطلب ہے اس کی زیادتی و فائدہ اور ”غرمہ“ کا مطلب ہے اس کا ہلاک ہونا یا اس میں نقصان ہو جانا۔ [مسند الشافعی/ كتاب الرهن والقراض والحجر والتفليس واللقطة /حدیث: 1477]

ابن مسیب رحمہ اللہ کے واسطہ سے ابوہریرہ رضی اللہ عنہ سے بھی اسی حدیث کے مثل یا ہم معنی مروی ہے۔ [مسند الشافعی/ كتاب الرهن والقراض والحجر والتفليس واللقطة /حدیث: 1478]

سعید بن مسیب رحمہ اللہ سے روایت ہے کہ رسول اللہ صلی اللہ علیہ وسلم نے فرمایا: ”گروی رکھنے والے سے گروی رکھی ہوئی چیز نہیں روکی جائے گی، اس کا فائدہ بھی اسی کے لیے ہے اور تاوان کا بھی وہی ذمہ دار ہے۔“ [مسند الشافعی/ كتاب الرهن والقراض والحجر والتفليس واللقطة /حدیث: 1479]

ایک اور سند سے ابوہریرہ رضی اللہ عنہ کے واسطہ سے یہ حدیث نبی صلی اللہ علیہ وسلم سے ابن ابی ذئب کی سند والی حدیث کی مثل مروی ہے۔ [مسند الشافعی/ كتاب الرهن والقراض والحجر والتفليس واللقطة /حدیث: 1480]

زید بن اسلم اپنے باپ سے روایت کرتے ہیں کہ عمر بن خطاب رضی اللہ عنہ کے دو بیٹے عبداللہ اور عبید اللہ رضی اللہ عنہما مجاہدین کے لشکر کے ساتھ عراق کی طرف نکلے، جب دونوں واپس مڑے تو یہ دونوں عمر رضی اللہ عنہ کے ایک گورنر کے پاس سے گزرے، اس نے ان کو خوش آمدید کہا اور وہ بصرہ کا امیر تھا۔ اس نے کہا: ”اگر مجھے تمہارے لیے کسی معاملے کا اختیار ہوتا جس سے تمہیں فائدہ پہنچا سکتا تو ضرور کرتا۔“ پھر اس نے کہا: ”ہاں! (یاد آیا) یہاں اللہ تعالیٰ کے مال میں سے مال ہے جسے میں امیر المومنین کی طرف بھیجنا چاہتا ہوں، میں وہ تمہیں بطور قرض دیتا ہوں، تم دونوں اس سے عراق کا سامان خرید کر مدینہ میں بیچ دینا، پھر اصل مال امیر المومنین کو دے دینا اور نفع تمہارا ہو جائے گا۔“ ان دونوں نے کہا: ”ہمیں منظور ہے، آپ مال ہمیں دے دیں۔“ پھر امیر بصرہ نے ان کو عمر رضی اللہ عنہ کے نام خط لکھ کر دیا کہ ان سے مال وصول کر لیں۔ جب وہ دونوں مدینہ آئے تو انہوں نے مال بیچ کر نفع حاصل کیا۔ پھر جب اصل مال عمر رضی اللہ عنہ کو دیا تو انہوں نے دونوں سے پوچھا: ”کیا اس نے سارے لشکر والوں کو اسی طرح قرض دیا ہے جس طرح تم دونوں کو دیا ہے؟“ انہوں نے کہا: ”نہیں۔“ تو عمر رضی اللہ عنہ نے فرمایا: ”امیر المومنین کے دو بیٹوں کو (ہی) قرض دیا! تم اصل مال اور اس سے حاصل شدہ نفع دونوں ادا کر دو۔“ عبداللہ رضی اللہ عنہ تو یہ سن کر خاموش رہے البتہ عبید اللہ رضی اللہ عنہ نے فرمایا: ”اے امیر المومنین! یہ آپ کے لیے جائز نہیں ہے، کیونکہ اگر مال تباہ ہو جاتا یا اس میں نقصان ہوتا تو ہم اس کے ضامن تھے (ہمیں ہی بھرنا پڑتا)۔“ عمر رضی اللہ عنہ نے پھر فرمایا: ”اس کو ادا کر دو۔“ عبداللہ بن عمر رضی اللہ عنہ تو خاموش رہے البتہ عبید اللہ رضی اللہ عنہ نے دوبارہ بات دہرائی۔ پھر عمر رضی اللہ عنہ کے پاس بیٹھے لوگوں میں سے ایک آدمی نے کہا: ”اے امیر المومنین! اگر آپ اسے قراض (مضاربت) کی صورت دے دیں تو بہتر ہے۔“ پھر عمر رضی اللہ عنہ نے اصل مال اور آدھا نفع لے لیا اور اس مال کا آدھا نفع عبداللہ رضی اللہ عنہ اور عبید اللہ رضی اللہ عنہ نے لیا۔ [مسند الشافعی/ كتاب الرهن والقراض والحجر والتفليس واللقطة /حدیث: 1481]

ہشام بن عروہ اپنے باپ سے روایت کرتے ہیں، فرمایا: عبداللہ بن جعفر رضی اللہ عنہ نے کوئی چیز خریدی تو علی رضی اللہ عنہ نے فرمایا: ”میں عثمان رضی اللہ عنہ کے پاس جاؤں گا اور تیرے خلاف تصرف نہ کرنے کا مقدمہ درج کروں گا۔“ جب عبداللہ بن جعفر رضی اللہ عنہ نے یہ بات زبیر رضی اللہ عنہ کو بتائی تو انہوں نے فرمایا: ”میں تیری اس بیع میں تیرا شریک ہوں۔“ پھر وہ عثمان رضی اللہ عنہ کے پاس آئے اور علی رضی اللہ عنہ نے فرمایا: ”اس کو (مال میں) تصرف سے روک دیں (کیونکہ یہ فضول خرچی کر رہا ہے)۔“ تو زبیر رضی اللہ عنہ نے فرمایا: ”میں اس کا حصے دار ہوں۔“ تو عثمان رضی اللہ عنہ نے فرمایا: ”میں ایسے آدمی کو تصرف سے کیسے روک سکتا ہوں جس کا حصے دار زبیر رضی اللہ عنہ ہو۔“ [مسند الشافعی/ كتاب الرهن والقراض والحجر والتفليس واللقطة /حدیث: 1482]

ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو کوئی آدمی مفلس ہو گیا، پھر آدمی نے اپنا مال بعینہ مفلس کے پاس پا لیا تو وہ (دوسروں کی نسبت) اس کا زیادہ حق دار ہے۔“ [مسند الشافعی/ كتاب الرهن والقراض والحجر والتفليس واللقطة /حدیث: 1483]