ابن عباس رضی اللہ عنہما نے بیان فرمایا کہ مجھے صعب بن جثامہ رضی اللہ عنہ نے بتایا کہ انہوں نے نبی صلی اللہ علیہ وسلم سے سنا کہ آپ صلی اللہ علیہ وسلم سے پوچھا گیا کہ مشرکین کے گھر والوں کا کیا حکم ہے جبکہ ان پر شب خون مارا جاتا ہے تو چھوٹے بچے اور عورتیں بھی اس کی زد میں آجاتے ہیں؟ تو رسول اللہ صلی اللہ علیہ وسلم نے فرمایا: ”وہ انہیں میں سے ہیں۔“ عمرو بن دینار نے زہری سے یہ الفاظ زیادہ بیان کیے کہ ”وہ اپنے باپ دادوں میں سے ہیں۔“ (یعنی اسی نسل سے تعلق رکھتے ہیں۔) [مسند الشافعی/ كتاب الجهاد وقسم الغنائم /حدیث: 1736]

صعب بن جثامہ اللیثی رضی اللہ عنہ سے روایت ہے کہ نبی اکرم صلی اللہ علیہ وسلم سے پوچھا گیا کہ مشرکین کے گھر والوں کا کیا حکم ہے جبکہ ان پر شب خون مارا جاتا ہے تو چھوٹے بچے اور عورتیں بھی اس کی زد میں آجاتے ہیں؟ تو رسول اللہ صلی اللہ علیہ وسلم نے ارشاد فرمایا: ”وہ انہیں میں سے ہیں۔“ بعض اوقات سفیان رحمہ اللہ نے حدیث میں یہ الفاظ بیان کیے ہیں کہ ”وہ اپنے آباء میں سے ہیں۔“ [مسند الشافعی/ كتاب الجهاد وقسم الغنائم /حدیث: 1737]

سیدنا انس بن مالک رضی اللہ عنہ روایت کرتے ہیں کہ عمر بن خطاب رضی اللہ عنہ نے ان سے پوچھا: جب تم شہر کا محاصرہ کر لو تو تم کیا کرو گے؟ انہوں نے جواب دیا: ہم ایک آدمی کو چمڑے کا لباس پہنا کر شہر کی طرف بھیجیں گے۔ آپ رضی اللہ عنہ نے فرمایا: تمہارا کیا خیال ہے؟ اگر اسے کوئی پتھر مار دے تو؟ انہوں نے کہا: تب وہ قتل ہو جائے گا، تو عمر رضی اللہ عنہ نے فرمایا: پھر تم اس طرح نہ کرو۔ اس ذات کی قسم جس کے ہاتھ میں میری جان ہے! مجھے پسند نہیں کہ تم ایک مسلمان کے ضیاع کے بدلے میں ایک ایسا شہر فتح کرو جس میں چار لڑنے والے آدمی ہوں۔ [مسند الشافعی/ كتاب الجهاد وقسم الغنائم /حدیث: 1738]

سیدنا انس رضی اللہ عنہ بیان کرتے ہیں کہ ہم نے تستر قلعے کا محاصرہ کیا، ہرمزان عمر رضی اللہ عنہ کے حکم پر اترا تو میں اسے عمر رضی اللہ عنہ کے پاس لے کر آیا۔ جب ہم ان کے پاس پہنچے تو عمر رضی اللہ عنہ نے اس سے فرمایا: بات کرو۔ اس نے کہا: زندہ (یعنی دلیر) آدمی کی طرح بات کروں یا مردہ (یعنی بزدل) آدمی کی طرح؟ عمر رضی اللہ عنہ نے فرمایا: بات کرو تمہیں کوئی اندیشہ نہیں ہے (یعنی جو کچھ کہنا چاہتے ہو بلا خوف و خطر کہو)۔ وہ کہنے لگا: ہم اور آپ عرب کے باشندے ہیں مگر اللہ نے ہمارے اور تمہارے درمیان فرق رکھا ہے، ہم تمہیں غلام بنایا کرتے تھے اور تمہیں قتل کیا کرتے اور تمہارا مال غصب کر لیا کرتے تھے، جب اللہ تمہارے ساتھ ہو گیا تو ہم کمزور ہو گئے۔ عمر رضی اللہ عنہ نے مجھ سے فرمایا: تم کیا کہتے ہو؟ میں نے کہا: اے امیر المومنین! میں نے اپنے بعد بہت زیادہ دشمن اور طاقت چھوڑی ہے، اگر آپ اس کو قتل کر دیں گے تو لوگ زندگی سے ناامید ہو جائیں گے اور اس طرح ان کی طاقت (مزید) بڑھ جائے گی۔ عمر رضی اللہ عنہ نے فرمایا: کیا میں براء بن مالک اور مجزاہ بن ثور کے قاتل کو زندہ چھوڑ دوں؟ جب میں نے ڈرا کہ وہ اسے قتل کر دیں گے تو میں نے کہا: اس کے قتل کی اب کوئی گنجائش نہیں، آپ نے اسے کہا ہے کہ ”بات کرو تمہیں کوئی اندیشہ نہیں ہے“۔ پھر عمر رضی اللہ عنہ نے فرمایا: کیا تم نے اس سے رشوت لی ہے؟ میں نے کہا: اللہ کی قسم! نہ میں نے رشوت لی ہے اور نہ ہی کوئی اور چیز۔ عمر رضی اللہ عنہ نے فرمایا: جو تم نے گواہی دی ہے اس پر اپنے علاوہ کوئی اور گواہ بھی پیش کرو ورنہ میں تمہیں سزا دوں گا۔ میں وہاں سے نکلا تو مجھے زبیر بن عوام رضی اللہ عنہ ملے، انہوں نے میرے ساتھ گواہی دی۔ عمر رضی اللہ عنہ نے اسے قتل نہ کیا، وہ بعد میں مسلمان ہو گیا تو عمر رضی اللہ عنہ نے اس کا وظیفہ مقرر کر دیا۔ [مسند الشافعی/ كتاب الجهاد وقسم الغنائم /حدیث: 1739]

انس رضی اللہ عنہ سے روایت ہے کہ انہوں نے بیان فرمایا کہ رسول اللہ صلی اللہ علیہ وسلم رات کو خیبر پہنچے اور رسول اللہ صلی اللہ علیہ وسلم جب رات کو کسی قوم کے پاس آتے (حملہ کے لیے) تو صبح سے پہلے ان پر حملہ نہیں کرتے تھے۔ اگر اذان سن لیتے تو حملہ نہ کرتے اور اگر وہ نماز نہ پڑھنے والے ہوتے تو صبح کے وقت ان پر حملہ کر دیتے۔ جب صبح ہوئی تو آپ صلی اللہ علیہ وسلم بھی سوار ہوئے اور مسلمان بھی سوار ہو گئے۔ اور بستی والے اس حال میں نکلے کہ ان کے پاس ان کی ٹوکریاں اور کرالیں تھیں۔ جب انہوں نے رسول اللہ صلی اللہ علیہ وسلم کو دیکھا تو کہا: محمد صلی اللہ علیہ وسلم اور (ان کا) لشکر۔ رسول اللہ صلی اللہ علیہ وسلم نے فرمایا: ”اللہ اکبر، خیبر خراب ہوا، جب ہم کسی قوم کے پاس پہنچتے ہیں تو ان لوگوں کی صبح بری ہوتی ہے۔ جنہیں (جہنم کے عذاب سے) ڈرایا گیا ہے۔“ انس رضی اللہ عنہ نے فرمایا: میں ابوطلحہ رضی اللہ عنہ کے پیچھے سوار تھا اور میرا قدم رسول اللہ صلی اللہ علیہ وسلم کے قدم مبارک کو چھو رہا تھا۔ [مسند الشافعی/ كتاب الجهاد وقسم الغنائم /حدیث: 1740]

عبداللہ بن عون سے روایت ہے کہ نافع رحمہ اللہ نے ان کی طرف لکھا اور اسے بتایا کہ ابن عمر رضی اللہ عنہما نے خبر دی کہ نبی صلی اللہ علیہ وسلم نے جب بنو المصطلق پر حملہ کیا تو وہ بالکل غافل اپنے جانوروں کے ساتھ مریسیع کے مقام پر تھے۔ آپ صلی اللہ علیہ وسلم نے ان کے لڑنے والوں کو قتل کر دیا اور عورتوں و بچوں کو قیدی بنا لیا۔ [مسند الشافعی/ كتاب الجهاد وقسم الغنائم /حدیث: 1741]

ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے بنو نضیر کے مالوں کو جلا دیا تھا۔ [مسند الشافعی/ كتاب الجهاد وقسم الغنائم /حدیث: 1742]

ابن شہاب سے روایت ہے کہ رسول اللہ صلی اللہ علیہ وسلم نے بنو نضیر کے مالوں کو جلوا دیا، تو کہنے والے نے کہا: ”بنو لؤی (قریش) کے سرداروں کے نزدیک بویرہ کے باغات میں چاروں طرف پھیلی ہوئی آگ ایک معمولی واقعہ ثابت ہوئی۔“ [مسند الشافعی/ كتاب الجهاد وقسم الغنائم /حدیث: 1743]

ابن عمر رضی اللہ عنہما سے روایت ہے کہ نبی صلی اللہ علیہ وسلم نے بنو نضیر کی کھجوروں (کے باغات) کو کٹوا کر ان کو آگ لگا دی اور وہ (باغات) بویرہ جگہ میں تھے۔ [مسند الشافعی/ كتاب الجهاد وقسم الغنائم /حدیث: 1744]

ابن شہاب سے روایت ہے کہ رسول اللہ صلی اللہ علیہ وسلم نے بنو نضیر کے مالوں کو جلوا دیا تو کہنے والے نے کہا: ”بنو لؤی (یعنی قریش کے سرداروں) پر بویرہ کے باغات میں چاروں طرف سے پھیلی ہوئی آگ ایک معمولی واقعہ ثابت ہوئی۔“ [مسند الشافعی/ كتاب الجهاد وقسم الغنائم /حدیث: 1745]