سیدنا انس بن مالک رضی اللہ عنہ نے بیان کیا کہ رسول اللہ صلی اللہ علیہ وسلم نے ارادہ کیا کہ ”عجمی بادشاہوں کو خط لکھیں۔“ تو آپ صلی اللہ علیہ وسلم کو بتایا گیا کہ ”وہ لوگ مہر کے بغیر خط نہیں پڑھتے۔“ تو آپ صلی اللہ علیہ وسلم نے چاندی کی انگوٹھی بنوائی جس میں یہ کلمات کندہ تھے: «مُحَمَّدٌ رَسُولُ اللَّهِ» ”محمد اللہ کے رسول ہیں۔“ [سنن ابي داود/كتاب الخاتم /حدیث: 4214]

قتادہ نے سیدنا انس رضی اللہ عنہ سے مذکورہ بالا حدیث عیسیٰ بن یونس کے ہم معنی روایت کی، اس میں اضافہ ہے کہ ”پھر یہ انگوٹھی آپ صلی اللہ علیہ وسلم کے ہاتھ میں رہی حتیٰ کہ آپ صلی اللہ علیہ وسلم کی وفات ہو گئی، پھر سیدنا ابوبکر رضی اللہ عنہ کے ہاتھ میں رہی حتیٰ کہ ان کی وفات ہو گئی، پھر سیدنا عمر رضی اللہ عنہ کے ہاتھ میں رہی حتیٰ کہ ان کی وفات ہو گئی، پھر سیدنا عثمان رضی اللہ عنہ کے ہاتھ میں آئی اور پھر وہ ایک کنویں کے کنارے بیٹھے تھے کہ اتفاقاً اس میں گر گئی، تو انہوں نے حکم دیا اور اس کا سارا پانی نکالا گیا، مگر لوگ اسے تلاش کرنے سے عاجز رہے۔“ [سنن ابي داود/كتاب الخاتم /حدیث: 4215]

سیدنا انس رضی اللہ عنہ نے بیان کیا کہ ”نبی کریم صلی اللہ علیہ وسلم کی انگوٹھی چاندی کی تھی اور اس کا نگینہ حبشی تھا۔“ [سنن ابي داود/كتاب الخاتم /حدیث: 4216]

سیدنا انس بن مالک رضی اللہ عنہ سے مروی ہے کہ نبی کریم صلی اللہ علیہ وسلم کی انگوٹھی ”ساری کی ساری چاندی کی تھی، اس کا نگینہ بھی اسی ہی سے تھا۔“ [سنن ابي داود/كتاب الخاتم /حدیث: 4217]

سیدنا ابن عمر رضی اللہ عنہما نے بیان کیا کہ (پہلے پہل) رسول اللہ صلی اللہ علیہ وسلم نے سونے کی انگوٹھی بنوائی اور اس کا نگینہ ہتھیلی کی جانب رکھنا شروع کیا اور اس میں «مُحَمَّدٌ رَسُولُ اللَّهِ» ”محمد اللہ کے رسول ہیں“ کے الفاظ کندہ کروائے تو صحابہ رضی اللہ عنہم نے بھی سونے کی انگوٹھیاں بنوا لیں۔ جب آپ صلی اللہ علیہ وسلم نے یہ دیکھا کہ لوگوں نے بھی (ویسی ہی انگوٹھیاں) بنوا لی ہیں تو آپ صلی اللہ علیہ وسلم نے اپنی انگوٹھی اتار پھینکی اور فرمایا: ”میں اسے کبھی نہیں پہنوں گا۔“ پھر آپ صلی اللہ علیہ وسلم نے چاندی کی انگوٹھی بنوائی اس میں بھی «مُحَمَّدٌ رَسُولُ اللَّهِ» ”محمد اللہ کے رسول ہیں“ کے الفاظ نقش کروائے۔ آپ صلی اللہ علیہ وسلم کے بعد یہ انگوٹھی سیدنا ابوبکر رضی اللہ عنہ نے پہنی، پھر سیدنا عمر رضی اللہ عنہ نے پہنی، پھر ان کے بعد سیدنا عثمان رضی اللہ عنہ نے پہنی حتیٰ کہ اریس نامی کنویں میں گر گئی۔ امام ابوداؤد رحمہ اللہ فرماتے ہیں کہ سیدنا عثمان رضی اللہ عنہ سے اس وقت تک لوگوں نے کوئی اختلاف نہیں کیا حتیٰ کہ انگوٹھی ان کے ہاتھ سے گر گئی۔ (اس کے بعد اختلافات نے بھی سر اٹھا لیا)۔ [سنن ابي داود/كتاب الخاتم /حدیث: 4218]

سیدنا ابن عمر رضی اللہ عنہما نے اس خبر میں بیان کیا کہ نبی کریم صلی اللہ علیہ وسلم نے اپنی انگوٹھی میں «مُحَمَّدٌ رَسُولُ اللّٰهِ» ”محمد اللہ کے رسول ہیں“ کے کلمات کندہ کروائے اور فرمایا: ”کوئی شخص میری اس انگوٹھی کے نقش کی طرح اپنی انگوٹھی کا نقش نہ بنوائے۔“ پھر حدیث بیان کی۔ [سنن ابي داود/كتاب الخاتم /حدیث: 4219]

سیدنا ابن عمر رضی اللہ عنہ نے نبی کریم صلی اللہ علیہ وسلم سے یہ حدیث بیان کی، (ابن عمر رضی اللہ عنہ نے) فرمایا: ”(پھر وہ انگوٹھی گم ہو گئی) تو لوگوں نے اسے تلاش کیا مگر نہ پا سکے۔ تو سیدنا عثمان رضی اللہ عنہ نے ایک (نئی) انگوٹھی بنوائی جس میں «مُحَمَّدٌ رَسُولُ اللَّهِ» ”محمد اللہ کے رسول ہیں“ کے کلمات نقش کروائے۔ چنانچہ وہ اسی سے مہر کیا کرتے تھے، یا اسے پہنا کرتے تھے۔“ [سنن ابي داود/كتاب الخاتم /حدیث: 4220]

سیدنا انس بن مالک رضی اللہ عنہ سے روایت ہے کہ ”انہوں نے نبی کریم صلی اللہ علیہ وسلم کے ہاتھ میں صرف ایک دن چاندی کی انگوٹھی دیکھی، تو لوگوں نے بھی بنوا کر پہن لیں۔ نبی کریم صلی اللہ علیہ وسلم نے وہ اتار پھینکی تو لوگوں نے بھی اتار پھینکیں۔“ امام ابوداؤد رحمہ اللہ کہتے ہیں کہ ”اس روایت کو زہری رحمہ اللہ سے زیاد بن سعد، شعیب اور ابن مسافر نے روایت کیا اور ان سب کا بیان ہے کہ انگوٹھی چاندی کی تھی۔“ [سنن ابي داود/كتاب الخاتم /حدیث: 4221]

سیدنا عبداللہ بن مسعود رضی اللہ عنہ بیان کیا کرتے تھے کہ ”نبی کریم صلی اللہ علیہ وسلم کو دس باتیں ناپسند تھیں (حرام سمجھتے تھے) زرد رنگ کی مرکب خوشبو یعنی خلوق، سفید بالوں کا (سیاہ) رنگ تبدیل کر دینا، چادر گھسیٹنا، سونے کی انگوٹھی پہننا، بغیر موقع مناسب کے زینت کا اظہار کرنا، گوٹیوں سے کھیلنا، شرعی معوذات کے سوا دوسرے دم جھاڑ، منکے کوڈیاں وغیرہ لٹکانا، غیر حلال میں منی ڈالنا اور چھوٹے بچے میں خرابی ڈالنا، مگر آپ صلی اللہ علیہ وسلم اسے حرام نہ کہتے تھے۔“ (مراد ہے ایام رضاعت میں بچے کی ماں سے مباشرت کرنا) امام ابوداؤد رحمہ اللہ فرماتے ہیں کہ ”اس حدیث کو مسند روایت کرنے میں اہل بصرہ منفرد ہیں۔“ «وَاللّٰهُ أَعْلَمُ» ”اور اللہ بہتر جانتا ہے۔“ [سنن ابي داود/كتاب الخاتم /حدیث: 4222]

جناب عبداللہ بن بریدہ اپنے والد رضی اللہ عنہ سے روایت کرتے ہیں کہ ایک شخص نبی کریم صلی اللہ علیہ وسلم کے پاس آیا جب کہ اس نے پیتل کی انگوٹھی پہنی ہوئی تھی۔ آپ صلی اللہ علیہ وسلم نے اس سے فرمایا: ”مجھے کیا ہے کہ میں تجھ سے بتوں کی بو پاتا ہوں؟“ تو اس نے وہ انگوٹھی اتار پھینکی۔ وہ دوبارہ آیا تو لوہے کی انگوٹھی پہنے ہوئے تھا، آپ صلی اللہ علیہ وسلم نے فرمایا: ”کیا بات ہے کہ میں تجھ پر دوزخیوں کا زیور دیکھتا ہوں؟“ تو اس نے وہ بھی اتار پھینکی۔ پھر اس نے عرض کیا: ”اے اللہ کے رسول! کس چیز سے انگوٹھی بنواؤں؟“ آپ صلی اللہ علیہ وسلم نے فرمایا: ”چاندی کی بنواؤ مگر مثقال سے کم رکھنا۔“ (مثقال، مساوی ہے 4.25 گرام کے)۔ محمد بن عبدالعزیز نے ”عبداللہ بن مسلم“ کا نام ذکر نہیں کیا (بلکہ السلمی المروزی کہا) جبکہ حسن بن علی نے ”السلمی المروزی“ نہیں کہا (بلکہ صرف عبداللہ بن مسلم کہا)۔ [سنن ابي داود/كتاب الخاتم /حدیث: 4223]