حضرت ابوہریرہ رضی اللہ عنہ سے روایت ہے، نبی صلی اللہ علیہ وسلم نے فرمایا: ”قرآن مجید میں ایک سورت ہے جس کی تیس آیتیں ہیں، اس نے اپنے پڑھنے والے کی شفاعت کی حتی کہ اس کی مغفرت ہو گئی، (وہ سورت ہے) ﴿تَبَارَكَ الَّذِي بِيَدِهِ الْمُلْكُ﴾ [سورة الملك: 1] ۔“ [سنن ابن ماجه/كتاب الأدب/حدیث: 3786]

حضرت ابو ہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ” ﴿قُلْ هُوَ اللّٰهُ اَحَدٌ﴾ [سورة الإخلاص: 1] تہائی قرآن کے برابر ہے۔“ [سنن ابن ماجه/كتاب الأدب/حدیث: 3787]

حضرت انس بن مالک رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ” ﴿قُلْ هُوَ اللّٰهُ أَحَدٌ﴾ [سورة الإخلاص: 1] قرآن کے تیسرے حصے کے برابر ہے۔“ [سنن ابن ماجه/كتاب الأدب/حدیث: 3788]

حضرت ابو مسعود انصاری رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ” «اللَّهُ أَحَدٌ الْوَاحِدُ الصَّمَدُ» تہائی قرآن کے برابر ہے۔“ [سنن ابن ماجه/كتاب الأدب/حدیث: 3789]

حضرت ابو درداء رضی اللہ عنہ سے روایت ہے، نبی کریم صلی اللہ علیہ وسلم نے فرمایا: ”کیا میں تمہیں ایسا عمل نہ بتاؤں جو تمہارے اعمال میں سب سے بہتر، تمہارے بادشاہ (اللہ تعالیٰ) کو سب سے زیادہ پسند، تمہارے درجات کو سب سے زیادہ بلند کرنے والا اور تمہارے لیے سونا اور چاندی (اللہ کی راہ میں) دینے سے بہتر اور اس بات سے بھی بہتر ہے کہ تم اپنے دشمن کا مقابلہ کرو اور ان کی گردنیں کاٹو اور وہ تمہاری گردنیں کاٹیں؟“ صحابہ رضی اللہ عنہم نے عرض کیا: ”اللہ کے رسول! وہ کیا ہے؟“ آپ صلی اللہ علیہ وسلم نے فرمایا: ”اللہ کا ذکر۔“ اور حضرت معاذ بن جبل رضی اللہ عنہ نے فرمایا: ”آدمی کوئی ایسا عمل نہیں کر سکتا جو اللہ کے عذاب سے نجات دینے میں اللہ کے ذکر سے بڑھ کر مؤثر ہو۔“ [سنن ابن ماجه/كتاب الأدب/حدیث: 3790]

حضرت ابوہریرہ اور حضرت ابوسعید رضی اللہ عنہما سے روایت ہے، نبی صلی اللہ علیہ وسلم نے فرمایا: ”جو لوگ بھی اللہ تعالیٰ کا ذکر کرنے بیٹھتے ہیں، انہیں فرشتے گھیر لیتے ہیں اور ان پر رحمت چھا جاتی ہے، اور ان پر سکینت نازل ہوتی ہے، اور اللہ تعالیٰ ان کا ذکر ان (فرشتوں) میں فرماتا ہے جو اس کے پاس ہوتے ہیں۔“ [سنن ابن ماجه/كتاب الأدب/حدیث: 3791]

حضرت ابو ہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”اللہ تعالیٰ فرماتا ہے: میں اپنے بندے کے ساتھ ہوتا ہوں، جب وہ میرا ذکر کرتا ہے اور اس کے ہونٹ میرے ذکر کے ساتھ حرکت کرتے ہیں۔“ [سنن ابن ماجه/كتاب الأدب/حدیث: 3792]

حضرت عبداللہ بن بسر رضی اللہ عنہ سے روایت ہے، ایک اعرابی نے رسول اللہ صلی اللہ علیہ وسلم سے عرض کیا: ”اسلام میں نیک اعمال بہت زیادہ ہیں (میں ان سب کو کماحقہ ادا نہیں کرسکتا۔) مجھے ایک بات بتا دیجئے جسے میں مضبوطی سے پکڑ لوں۔“ آپ صلی اللہ علیہ وسلم نے فرمایا: ”تیری زبان ہمیشہ اللہ کے ذکر سے تر رہے۔“ [سنن ابن ماجه/كتاب الأدب/حدیث: 3793]

حضرت ابو ہریرہ اور حضرت ابو سعید رضی اللہ عنہما سے روایت ہے، انہوں نے گواہی دی کہ رسول اللہ صلی اللہ علیہ وسلم نے فرمایا: ”جب بندہ کہتا ہے: «لَا إِلٰهَ إِلَّا اللّٰهُ وَاللّٰهُ أَكْبَرُ» ”اللہ کے سوا کوئی معبود نہیں اور اللہ سب سے بڑا ہے“، تو اللہ عزوجل فرماتا ہے: ”میرے بندے نے سچ کہا، میرے سوا کوئی معبود نہیں اور میں سب سے بڑا ہوں“۔ اور جب بندہ کہتا ہے: «لَا إِلٰهَ إِلَّا اللّٰهُ وَحْدَهُ» ”اکیلے اللہ کے سوا کوئی معبود نہیں“، تو وہ فرماتا ہے: ”میرے بندے نے سچ کہا، مجھ اکیلے کے سوا کوئی معبود نہیں“۔ جب بندہ کہتا ہے: «لَا إِلٰهَ إِلَّا اللّٰهُ لَا شَرِيكَ لَهُ» ”اللہ کے سوا کوئی معبود نہیں، اس کا کوئی شریک نہیں“، تو وہ فرماتا ہے: ”میرے بندے نے سچ کہا، میرے سوا کوئی معبود نہیں اور میرا کوئی شریک نہیں“۔ جب وہ کہتا ہے: «لَا إِلٰهَ إِلَّا اللّٰهُ لَهُ الْمُلْكُ وَلَهُ الْحَمْدُ» ”اللہ کے سوا کوئی معبود نہیں، بادشاہی اسی کے لیے ہے اور تعریف بھی اسی کی ہے“، تو وہ فرماتا ہے: ”میرے بندے نے سچ کہا، میرے سوا کوئی معبود نہیں، بادشاہی میرے ہی لیے ہے اور تعریف بھی میری ہی ہے“۔ جب بندہ کہتا ہے: «لَا إِلٰهَ إِلَّا اللّٰهُ وَلَا حَوْلَ وَلَا قُوَّةَ إِلَّا بِاللّٰهِ» ”اللہ کے سوا کوئی معبود نہیں اور اللہ کی توفیق کے بغیر گناہ سے بچاؤ نہیں اور نیکی کی طاقت نہیں“، تو اللہ تعالیٰ فرماتا ہے: ”میرے بندے نے سچ کہا، میرے سوا کوئی معبود نہیں اور میری توفیق کے بغیر (گناہ سے) بچاؤ نہیں اور (نیکی کی) طاقت نہیں“۔“ (راویِ حدیث) ابو اسحاق بیان کرتے ہیں: ”اس کے بعد (میرے استاد) اغر نے (حدیث بیان کرتے ہوئے) ایک جملہ فرمایا جسے میں سمجھ نہ سکا، چنانچہ میں نے ابو جعفر سے کہا: ”(استاد صاحب نے) کیا فرمایا ہے؟“ انہوں نے کہا: ”یہ فرمایا ہے: جسے موت کے وقت یہ کلمات نصیب ہو گئے اسے آگ نہیں چھوئے گی۔“” [سنن ابن ماجه/كتاب الأدب/حدیث: 3794]

حضرت یحییٰ بن طلحہ رحمہ اللہ نے اپنی والدہ حضرت اُمّ سُعدٰی مُرِّیَّہ رضی اللہ عنہا سے روایت کیا، انہوں نے فرمایا: رسول اللہ صلی اللہ علیہ وسلم کی وفات کے بعد (ایک دفعہ) حضرت عمر رضی اللہ عنہ حضرت طلحہ رضی اللہ عنہ کے پاس سے گزرے تو فرمایا: ”آپ کیوں پریشان ہیں؟ کیا آپ کو اپنے چچازاد (حضرت ابوبکر رضی اللہ عنہ) کے امیر المؤمنین بننے سے ناگواری محسوس ہوئی؟“ حضرت طلحہ رضی اللہ عنہ نے فرمایا: ”نہیں، بلکہ (بات یہ ہے کہ) میں نے رسول اللہ صلی اللہ علیہ وسلم سے سنا تھا کہ آپ صلی اللہ علیہ وسلم نے فرمایا: ”مجھے ایک کلمہ معلوم ہے جسے اگر کوئی شخص اپنی موت کے وقت کہہ لے تو وہ اس کے نامہ اعمال کا نور بن جاتا ہے، اور موت کے وقت اس کی وجہ سے اس کے جسم و جان کو راحت حاصل ہوتی ہے۔“ (افسوس اس بات کا ہے کہ) میں رسول اللہ صلی اللہ علیہ وسلم کی وفات تک آپ صلی اللہ علیہ وسلم سے وہ کلمہ دریافت نہ کر سکا۔“ حضرت عمر رضی اللہ عنہ نے فرمایا: ”مجھے وہ کلمہ معلوم ہے، یہ وہی ہے جسے کہنے کا آپ صلی اللہ علیہ وسلم نے اپنے چچا (ابوطالب) کو (ان کی موت کے وقت) فرمایا تھا۔ اگر نبی صلی اللہ علیہ وسلم کو علم ہوتا کہ کوئی اور کلمہ اس کے لیے نجات کا زیادہ سبب بن سکتا ہے تو آپ صلی اللہ علیہ وسلم اسے وہی (کوئی اور کلمہ) پڑھنے کا حکم دیتے۔“ [سنن ابن ماجه/كتاب الأدب/حدیث: 3795]