حضرت نبیط رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو عرفات میں نماز سے پہلے ایک سرخ اونٹ پر خطبہ ارشاد فرماتے دیکھا۔ [سنن نسائي/كتاب مناسك الحج/حدیث: 3010]

حضرت نبیط رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو عرفہ کے دن سرخ اونٹ پر خطبہ ارشاد فرماتے دیکھا۔ [سنن نسائي/كتاب مناسك الحج/حدیث: 3011]

حضرت سالم بن عبداللہ رحمہ اللہ سے روایت ہے کہ حضرت عبداللہ بن عمر رضی اللہ عنہما عرفے کے دن، جونہی سورج ڈھلا، حجاج بن یوسف کے پاس آئے۔ میں بھی ان کے ساتھ تھا۔ انہوں نے فرمایا: اگر تو سنت پر عمل کرنا چاہتا ہے تو ابھی (خطبے اور نماز کے لیے) چل۔ وہ کہنے لگا: اس وقت؟ انہوں نے فرمایا: ہاں۔ حضرت سالم رحمہ اللہ نے کہا: میں نے حجاج سے کہا: اگر تو آج سنت پر عمل کرنا چاہتا ہے تو خطبہ مختصر کرنا اور نماز جلد شروع کرنا۔ حضرت عبداللہ بن عمر رضی اللہ عنہما نے (بطور تصدیق) فرمایا: اس نے درست کہا۔ [سنن نسائي/كتاب مناسك الحج/حدیث: 3012]

حضرت عبداللہ بن مسعود رضی اللہ عنہ بیان کرتے ہیں کہ رسول اللہ صلی اللہ علیہ وسلم ہر نماز اس کے وقت پر پڑھتے تھے مگر مزدلفہ اور عرفات میں (جمع کرتے تھے)۔ [سنن نسائي/كتاب مناسك الحج/حدیث: 3013]

حضرت اسامہ بن زید رضی اللہ عنہما بیان کرتے ہیں کہ میں (دورانِ وقوف) عرفات میں نبی صلی اللہ علیہ وسلم کے پیچھے سوار تھا۔ آپ صلی اللہ علیہ وسلم ہاتھ اٹھا کر دعا کرنے لگے۔ اتنے میں آپ صلی اللہ علیہ وسلم کی اونٹنی ایک طرف کو مڑی تو مہار آپ صلی اللہ علیہ وسلم کے ہاتھ سے گر پڑی۔ آپ صلی اللہ علیہ وسلم نے ایک ہاتھ سے مہار پکڑ لی اور دوسرا ہاتھ (دعا کے لیے) اٹھائے رکھا۔ [سنن نسائي/كتاب مناسك الحج/حدیث: 3014]

حضرت عائشہ رضی اللہ عنہا فرماتی ہیں کہ قریش مزدلفہ میں ٹھہر جاتے تھے، وہ اپنے آپ کو «حُمْسٌ» کہتے تھے اور باقی عرب عرفات میں وقوف کرتے تھے، اللہ تعالیٰ نے اپنے نبی صلی اللہ علیہ وسلم کو حکم دیا کہ آپ عرفات میں ٹھہریں، پھر وہاں سے واپس لوٹیں، تب اللہ تعالیٰ نے یہ آیت اتاری: ﴿ثُمَّ أَفِيضُوا مِنْ حَيْثُ أَفَاضَ النَّاسُ﴾ [سورة البقرة: 199] ”تم بھی وہاں سے لوٹا کرو جہاں سے دوسرے لوگ لوٹتے ہیں۔“ [سنن نسائي/كتاب مناسك الحج/حدیث: 3015]

حضرت جبیر بن مطعم رضی اللہ عنہ سے روایت ہے کہ میرا ایک اونٹ گم ہو گیا۔ میں اسے تلاش کرنے کے لیے عرفہ پہنچ گیا۔ یہ عرفہ کا دن تھا۔ میں نے نبی صلی اللہ علیہ وسلم کو وہاں وقوف کرتے دیکھا۔ میں نے (دل میں) کہا: آپ کا یہاں کیا کام؟ آپ تو حمس میں سے ہیں۔ [سنن نسائي/كتاب مناسك الحج/حدیث: 3016]

حضرت یزید بن شیبان بیان کرتے ہیں کہ ہم عرفات میں رسول اللہ صلی اللہ علیہ وسلم کی جائے وقوف سے بہت دور ٹھہرے ہوئے تھے، ہمارے پاس حضرت ابن مربع انصاری رضی اللہ عنہ آئے اور فرمایا: میں تمہاری طرف رسول اللہ صلی اللہ علیہ وسلم کا قاصد ہوں، آپ صلی اللہ علیہ وسلم فرما رہے ہیں: ”اپنی اپنی جگہوں پر ٹھہرے رہو، تم اپنے جد امجد حضرت ابراہیم علیہ السلام کی وراثت پر قائم ہو۔“ [سنن نسائي/كتاب مناسك الحج/حدیث: 3017]

امام محمد باقر رحمہ اللہ بیان کرتے ہیں کہ ہم حضرت جابر بن عبداللہ رضی اللہ عنہما کے پاس گئے اور ان سے نبی صلی اللہ علیہ وسلم کے حج کے بارے میں پوچھا تو انہوں نے بیان کیا کہ اللہ تعالیٰ کے نبی صلی اللہ علیہ وسلم نے فرمایا: ”عرفات سارے کا سارا وقوف کی جگہ ہے۔“ [سنن نسائي/كتاب مناسك الحج/حدیث: 3018]

حضرت عبدالرحمن بن یعمر رضی اللہ عنہ بیان کرتے ہیں کہ میں رسول اللہ صلی اللہ علیہ وسلم کے پاس حاضر تھا کہ آپ کے پاس کچھ لوگ آئے اور آپ سے حج کے بارے میں سوالات کیے تو رسول اللہ صلی اللہ علیہ وسلم نے فرمایا: ”حج وقوفِ عرفہ کا نام ہے۔ جو شخص مزدلفہ میں گزاری جانے والی رات کی صبح طلوع ہونے سے پہلے عرفات (سے ہو کر مزدلفہ) آ جائے اس کا حج پورا ہو گیا۔“ [سنن نسائي/كتاب مناسك الحج/حدیث: 3019]