حضرت عمرو بن میمون رحمہ اللہ بیان کرتے ہیں کہ میں نے دیکھا کہ حضرت عمر رضی اللہ عنہ مزدلفہ میں فرما رہے تھے کہ جاہلیت والے سورج طلوع ہونے سے پہلے مزدلفہ سے نہیں چلتے تھے بلکہ کہتے تھے: «أَشْرِقْ ثَبِيرُ» ”اے ثبیر! روشن ہو“، لیکن رسول اللہ صلی اللہ علیہ وسلم نے ان کی مخالفت فرمائی، پھر وہ طلوعِ شمس سے پہلے ہی چل پڑے۔ [سنن نسائي/كتاب مناسك الحج/حدیث: 3050]

حضرت عبداللہ بن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے مجھے کمزور، عورتوں اور بچوں میں (رات ہی کو) بھیج دیا تھا۔ ہم نے صبح کی نماز منیٰ میں پڑھی اور جمرہ (عقبہ) کو کنکریاں ماریں۔ [سنن نسائي/كتاب مناسك الحج/حدیث: 3051]

ام المومنین حضرت عائشہ رضی اللہ عنہا فرماتی ہیں کہ کاش میں رسول اللہ صلی اللہ علیہ وسلم سے (مزدلفہ سے رات کو منیٰ چلے جانے کی) اجازت طلب کرتی، جیسے حضرت سودہ رضی اللہ عنہا نے اجازت طلب کر لی تھی اور میں بھی فجر کی نماز لوگوں کے آنے سے پہلے منیٰ میں پڑھ لیتی۔ حضرت سودہ رضی اللہ عنہا بوجھل اور سست رفتار خاتون تھیں۔ انہوں نے رسول اللہ صلی اللہ علیہ وسلم سے اجازت طلب کر لی تھی اور آپ نے انہیں اجازت دے دی تھی۔ تو انہوں نے فجر کی نماز منیٰ میں پڑھی اور لوگوں کے آنے سے پہلے رمی کر لی تھی۔ [سنن نسائي/كتاب مناسك الحج/حدیث: 3052]

حضرت اسماء بنت ابی بکر رضی اللہ عنہما کے ایک مولیٰ (آزاد کردہ غلام) سے روایت ہے کہ میں حضرت اسماء بنت ابی بکر رضی اللہ عنہما کے ساتھ رات کے اندھیرے ہی میں منیٰ آگیا، تو میں نے ان سے کہا کہ ہم منیٰ میں اندھیرے ہی میں آگئے ہیں۔ وہ فرمانے لگیں: ہم اس شخصیت صلی اللہ علیہ وسلم کے ہوتے ہوئے ایسا کیا کرتے تھے جو تجھ (اور ہم) سے بہت افضل تھی۔ [سنن نسائي/كتاب مناسك الحج/حدیث: 3053]

حضرت عروہ رحمہ اللہ بیان کرتے ہیں کہ حضرت اسامہ بن زید رضی اللہ عنہ سے پوچھا گیا، جبکہ میں بھی ان کے پاس بیٹھا تھا کہ رسول اللہ صلی اللہ علیہ وسلم جب حجۃ الوداع میں واپس چلے تو آپ کی رفتار کیسی تھی؟ انہوں نے فرمایا: آپ اپنی اونٹنی کو درمیانی چال سے چلا رہے تھے، البتہ جب خالی جگہ پاتے تو (مزید) تیز فرما دیتے۔ [سنن نسائي/كتاب مناسك الحج/حدیث: 3054]

حضرت جابر رضی اللہ عنہ سے روایت ہے کہ نبی صلی اللہ علیہ وسلم نے وادی محسر میں اونٹنی کو بہت تیز کر دیا تھا۔ [سنن نسائي/كتاب مناسك الحج/حدیث: 3055]

حضرت محمد باقر رحمہ اللہ سے مروی ہے کہ ہم حضرت جابر بن عبداللہ رضی اللہ عنہما کے پاس گئے اور میں نے ان سے کہا: ہمیں نبی صلی اللہ علیہ وسلم کے حج کے بارے میں بیان فرمائیے۔ انہوں نے فرمایا: رسول اللہ صلی اللہ علیہ وسلم مزدلفہ سے سورج طلوع ہونے سے پہلے چل پڑے اور آپ صلی اللہ علیہ وسلم نے حضرت فضل بن عباس رضی اللہ عنہما کو اپنے پیچھے سواری پر بٹھا لیا حتیٰ کہ جب وادیِ محسر میں پہنچے تو سواری کو کچھ تیز کر دیا، پھر اس درمیانی راستے سے چلے جو آپ کو بڑے جمرے (جمرہ عقبہ) پر جا پہنچاتا ہے، حتیٰ کہ آپ صلی اللہ علیہ وسلم اس جمرے کے پاس پہنچے جو ”شجرہ“ کے پاس ہے، پھر آپ صلی اللہ علیہ وسلم نے سات کنکریاں ماریں۔ ہر کنکری کے ساتھ «اللَّهُ أَكْبَرُ» ”اللہ سب سے بڑا ہے“ کہتے تھے۔ اور وہ کنکریاں خذف کی کنکریوں جیسی (چھوٹی چھوٹی) تھیں۔ آپ صلی اللہ علیہ وسلم نے یہ رمی وادی کے نشیب کی طرف سے کی تھی۔ [سنن نسائي/كتاب مناسك الحج/حدیث: 3056]

حضرت فضل بن عباس رضی اللہ عنہما سے روایت ہے کہ میں نبی صلی اللہ علیہ وسلم کے پیچھے سوار تھا (یعنی مزدلفہ سے منیٰ تک)۔ آپ صلی اللہ علیہ وسلم «لَبَّيْكَ» ”لبیک“ کہتے رہے حتیٰ کہ آپ صلی اللہ علیہ وسلم نے جمرے کی رمی شروع کی۔ [سنن نسائي/كتاب مناسك الحج/حدیث: 3057]

حضرت ابن عباس رضی اللہ عنہما سے منقول ہے کہ رسول اللہ صلی اللہ علیہ وسلم «لَبَّيْكَ» ”لبیک“ پڑھتے رہے، حتیٰ کہ آپ نے جمرے کو رمی کی۔ [سنن نسائي/كتاب مناسك الحج/حدیث: 3058]

حضرت عبداللہ بن عباس رضی اللہ عنہما سے روایت ہے کہ مجھے رسول اللہ صلی اللہ علیہ وسلم نے جمرۂ عقبہ کی رمی والی صبح (10 ذوالحجہ) کو، جبکہ آپ اپنی سواری پر سوار تھے، فرمایا: ”میرے لیے کنکریاں چنو۔“ میں نے (چھوٹی چھوٹی) کنکریاں چنیں جو خذف کی کنکریوں جیسی تھیں۔ جب میں نے وہ آپ کے ہاتھ میں رکھیں تو آپ نے فرمایا: ”اس قسم کی کنکریوں سے رمی کرنی چاہیے۔ دین میں غلو (حد سے بڑھ جانے) سے بچو کیونکہ تم سے پہلی قوموں کو دین میں غلو نے ہلاک کیا۔“ [سنن نسائي/كتاب مناسك الحج/حدیث: 3059]