حضرت عمرو بن زید رضی اللہ عنہ نے کہا: میں نے حضرت ابن عمر رضی اللہ عنہما کو فرماتے سنا کہ ہم زمین بٹائی پر دیا کرتے تھے اور اس میں کوئی حرج نہیں سمجھتے تھے، حتیٰ کہ حضرت رافع بن خدیج رضی اللہ عنہ نے کہا کہ رسول اللہ صلی اللہ علیہ وسلم نے ”بٹائی سے منع فرمایا ہے“۔ [سنن نسائي/كتاب المزارعة/حدیث: 3948]

عمرو بن دینار رحمہ اللہ بیان کرتے ہیں کہ میں گواہی دیتا ہوں کہ میں نے حضرت عبداللہ بن عمر رضی اللہ عنہما کو فرماتے سنا، جبکہ ان سے بٹائی کے بارے میں پوچھا گیا تھا: ہم اس میں کوئی حرج نہیں سمجھتے تھے حتیٰ کہ حضرت رافع بن خدیج رضی اللہ عنہ نے ہمیں پہلے سال بتلایا کہ انہوں نے نبی اکرم صلی اللہ علیہ وسلم کو بٹائی سے منع فرماتے سنا ہے۔ حماد بن زید رحمہ اللہ نے ان دونوں (سفیان بن عیینہ رحمہ اللہ اور ابن جریج رحمہ اللہ) کی موافقت کی ہے۔ [سنن نسائي/كتاب المزارعة/حدیث: 3949]

حضرت عمرو بن دینار رحمہ اللہ سے منقول ہے کہ میں نے حضرت ابن عمر رضی اللہ عنہما کو فرماتے سنا کہ ہم بٹائی میں کوئی حرج نہیں سمجھتے تھے حتیٰ کہ (یزید یا حضرت ابن زبیر رضی اللہ عنہما کی خلافت کا) پہلا سال ہوا تو رافع رضی اللہ عنہ کہنے لگے کہ نبی اکرم صلی اللہ علیہ وسلم نے ”اس سے منع فرمایا ہے“۔ عارم رحمہ اللہ نے اس (یحییٰ بن حبیب) کی مخالفت کی ہے اور کہا ہے: «عَنْ حَمَّادٍ، عَنْ عَمْرٍو، عَنْ جَابِرٍ» ”حماد سے، عمرو سے، جابر سے“۔ [سنن نسائي/كتاب المزارعة/حدیث: 3950]

حضرت جابر بن عبداللہ رضی اللہ عنہما سے روایت ہے کہ نبی اکرم صلی اللہ علیہ وسلم نے ”زمین کرایہ پر دینے سے منع فرمایا ہے“۔ محمد بن مسلم طائفی نے اس (حماد بن زید) کی متابعت کی ہے۔ [سنن نسائي/كتاب المزارعة/حدیث: 3951]

حضرت جابر رضی اللہ عنہ سے مروی ہے کہ رسول اللہ صلی اللہ علیہ وسلم نے ”مجھے مخابرہ، محاقلہ اور مزابنہ سے منع فرمایا۔“ سفیان بن عیینہ رحمہ اللہ نے (دونوں صحابہ کی) دو حدیثوں کو جمع کر دیا ہے اور کہا ہے: «عَنْ ابْنِ عُمَرَ وَجَابِرٍ» ”ابن عمر رضی اللہ عنہما اور جابر رضی اللہ عنہ سے۔“ [سنن نسائي/كتاب المزارعة/حدیث: 3952]

حضرت ابن عمر اور حضرت جابر رضی اللہ عنہما سے روایت ہے کہ رسول اللہ صلی اللہ علیہ وسلم نے ”پھل کی فروخت سے منع فرمایا ہے حتیٰ کہ وہ پک جائے۔“ اور آپ صلی اللہ علیہ وسلم نے «الْمُخَابَرَةِ» ”مخابرہ“ سے بھی منع فرمایا ہے کہ زمین کو پیداوار کے تہائی یا چوتھائی حصے کے عوض بٹائی پر دیا جائے۔ اسے ابوالنجاشی عطاء بن صہیب نے روایت کیا ہے اور اس حدیث میں اس پر اختلاف کیا گیا ہے۔ [سنن نسائي/كتاب المزارعة/حدیث: 3953]

حضرت رافع بن خدیج رضی اللہ عنہ بیان کرتے ہیں کہ رسول اللہ صلی اللہ علیہ وسلم نے مجھ سے پوچھا: ”کیا تم اپنی فالتو زمینیں بٹائی پر دیتے ہو؟“ میں نے عرض کیا: جی ہاں! اے اللہ کے رسول! ہم انہیں پیداوار کے چوتھائی حصے یا چند وسق جو کے عوض بٹائی پر دیتے ہیں۔ رسول اللہ صلی اللہ علیہ وسلم نے فرمایا: ”ایسے نہ کرو، خود کاشت کرو یا کسی کو ایک دو سال کے لیے (عارتیاً) بلا معاوضہ کاشت کے لیے دے دو، ورنہ رکھے رکھو۔“ اوزاعی رحمہ اللہ نے اس (یحییٰ بن ابو کثیر رحمہ اللہ) کی مخالفت کی ہے اور اس نے کہا ہے: «عَنْ رَافِعٍ عَنْ ظُهَيْرِ بْنِ رَافِعٍ» ”رافع سے مروی ہے، وہ ظہیر بن رافع رضی اللہ عنہما سے روایت کرتے ہیں۔“ [سنن نسائي/كتاب المزارعة/حدیث: 3954]

حضرت رافع رضی اللہ عنہ سے روایت ہے کہ ہمارے پاس حضرت ظہیر بن رافع رضی اللہ عنہما آئے اور فرمایا: مجھے رسول اللہ صلی اللہ علیہ وسلم نے ایک ایسے کام سے روک دیا ہے جو ہمارے لیے مفید تھا۔ میں نے کہا: وہ کیا؟ وہ فرمانے لگے: اللہ کے رسول صلی اللہ علیہ وسلم کا فرمان ہی صحیح اور برحق ہے۔ آپ نے مجھ سے پوچھا: ”تم اپنی (زائد) زمینوں کو کیا کرتے ہو؟“ میں نے کہا: ہم انہیں پیداوار کے تہائی یا چوتھائی حصے اور چند وسق کھجوروں یا جو کے عوض بٹائی پر دیتے ہیں۔ آپ نے فرمایا: ”تو ایسے نہ کرو، انہیں خود کاشت کرو یا کسی کو بلامعاوضہ کاشت کے لیے دے دو یا اسی طرح رہنے دو۔“ یہ روایت بکیر بن عبداللہ بن اشج رحمہ اللہ نے اسید بن رافع رحمہ اللہ سے بیان کی ہے تو اسے (حضرت رافع بن خدیج رضی اللہ عنہما کے بجائے) حضرت رافع رضی اللہ عنہ کے بھائی کی روایت بنایا ہے۔ (دیکھیے، آئندہ روایت) [سنن نسائي/كتاب المزارعة/حدیث: 3955]

(حضرت رافع بن خدیج رضی اللہ عنہ کے بیٹے) اسید سے روایت ہے کہ (والد محترم) رافع رضی اللہ عنہ کے بھائی نے اپنی قوم سے کہا کہ رسول اللہ صلی اللہ علیہ وسلم نے آج ایک ایسی چیز سے روک دیا ہے جو تمہارے لیے مفید تھی۔ ویسے آپ صلی اللہ علیہ وسلم کے حکم ہی کی اطاعت کی جائے گی اور وہی سب سے بہتر ہے۔ آپ صلی اللہ علیہ وسلم نے ”زمین بٹائی پر دینے“ سے روک دیا ہے۔ [سنن نسائي/كتاب المزارعة/حدیث: 3956]

حضرت عبدالرحمن بن ہرمز رحمہ اللہ نے کہا: میں نے اسید بن رافع بن خدیج انصاری رحمہ اللہ کو یہ ذکر کرتے سنا کہ ان کو «الْمُحَاقَلَةِ» (محاقلہ) سے روک دیا گیا تھا۔ اور محاقلہ سے مراد یہ ہے کہ زمین اپنی پیداوار کے کچھ حصے کے عوض کاشت کے لیے دے دی جائے۔ یہ روایت عیسیٰ بن سہل بن رافع رحمہ اللہ نے بیان کی ہے۔ [سنن نسائي/كتاب المزارعة/حدیث: 3957]