حضرت جابر بن عبد اللہ رضی اللہ عنہما سے روایت ہے، انہوں نے کہا کہ میں ایک دفعہ نبی صلی اللہ علیہ وسلم کی خدمت میں حاضر ہوا۔ آپ صلی اللہ علیہ وسلم اس وقت مسجد میں تشریف فرما تھے۔ (راوی حدیث) حضرت مسعر کہتے ہیں کہ میرے گمان کے مطابق انہوں نے کہا: چاشت کا وقت تھا۔ آپ صلی اللہ علیہ وسلم نے مجھ سے فرمایا: ”دو رکعت ادا کرو۔“ میرا آپ کے ذمے کچھ قرض تھا تو آپ نے وہ ادا کیا اور مجھے کچھ زیادہ بھی دیا۔ [صحيح البخاري/كتاب الاستقراض/حدیث: 2394]

حضرت جابر بن عبداللہ رضی اللہ عنہما سے روایت ہے کہ ان کے والد غزوۂ احد میں شہید ہو گئے تھے اور ان پر قرض تھا، تو قرض خواہوں نے حقوق طلبی میں سختی سے کام لیا۔ میں نبی صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے قرض خواہوں سے فرمایا کہ: ”وہ ان کے باغ کا پھل قبول کر لیں اور ان کے والد کو قرض سے بری کر دیں۔“ لیکن ان لوگوں نے اس سے انکار کر دیا۔ نبی صلی اللہ علیہ وسلم نے انہیں میرا باغ نہ دیا بلکہ مجھ سے فرمایا: ”کل تمہارے باغ میں آؤں گا۔“ چنانچہ آپ صلی اللہ علیہ وسلم صبح تشریف لائے تو میرے باغ کا پورا چکر لگایا اور اس کے پھل میں برکت کی دعا فرمائی۔ اس کے بعد میں نے پھل اتارا، اس میں سے قرض خواہوں کا قرض بھی ادا کر دیا اور ہمارے لیے کچھ کھجوریں بچ بھی گئیں۔ [صحيح البخاري/كتاب الاستقراض/حدیث: 2395]

وہب بن کیسان سے روایت ہے کہ حضرت جابر بن عبداللہ رضی اللہ عنہما نے انہیں بتایا کہ ان کے والد جب فوت ہوئے تو ان پر ایک یہودی کے تیس وسق (کھجوریں) قرض تھیں، حضرت جابر رضی اللہ عنہ نے اس سے مہلت طلب کی تو اس نے مہلت دینے سے انکار کر دیا، حضرت جابر رضی اللہ عنہ نے رسول اللہ صلی اللہ علیہ وسلم سے عرض کیا کہ آپ اس یہودی سے ان کی سفارش کریں، چنانچہ رسول اللہ صلی اللہ علیہ وسلم یہودی کے پاس تشریف لے گئے اور اس سے گفتگو کی کہ وہ اپنے قرض کے عوض اس (جابر) کے باغ کی کھجوریں لے لے تو اس نے انکار کر دیا، تب رسول اللہ صلی اللہ علیہ وسلم باغ میں تشریف لے گئے اور اس کا چکر لگایا، پھر حضرت جابر رضی اللہ عنہ سے فرمایا: ”ان کا پھل توڑ کر اس کا قرض ادا کرو۔“ چنانچہ حضرت جابر رضی اللہ عنہ نے رسول اللہ صلی اللہ علیہ وسلم کے واپس جانے کے بعد پھل توڑا اور یہودی کے تیس وسق پورے دے دیے، ان کے پاس سترہ وسق کھجوریں باقی بچ گئیں، اس کے بعد حضرت جابر رضی اللہ عنہ رسول اللہ صلی اللہ علیہ وسلم کی خدمت میں حاضر ہوئے تاکہ آپ سے یہ واقعہ بیان کریں، انہوں نے رسول اللہ صلی اللہ علیہ وسلم کو عصر کی نماز پڑھتے ہوئے پایا، جب آپ صلی اللہ علیہ وسلم نماز سے فارغ ہوئے تو حضرت جابر رضی اللہ عنہ نے آپ سے کھجوروں کے باقی بچ رہنے کا ذکر کیا، آپ صلی اللہ علیہ وسلم نے فرمایا: ”ابن خطاب (رضی اللہ عنہ) کو بھی اس سے آگاہ کرو۔“ چنانچہ حضرت جابر رضی اللہ عنہ حضرت عمر رضی اللہ عنہ کے پاس آئے اور انہیں اس کی خبر دی تو انہوں نے فرمایا کہ جب رسول اللہ صلی اللہ علیہ وسلم نے باغ کا چکر لگایا تھا تو مجھے اسی وقت یقین ہو گیا تھا کہ اللہ تعالیٰ اس میں ضرور برکت فرمائے گا۔ [صحيح البخاري/كتاب الاستقراض/حدیث: 2396]

حضرت عائشہ رضی اللہ عنہا سے روایت ہے، انہوں نے بتایا کہ رسول اللہ صلی اللہ علیہ وسلم دورانِ نماز میں دعا کیا کرتے تھے: «اللَّهُمَّ إِنِّي أَعُوذُ بِكَ مِنَ الْمَأْثَمِ وَالْمَغْرَمِ» ”اے اللہ! میں گناہ اور قرض سے تیری پناہ مانگتا ہوں۔“ کسی کہنے والے نے عرض کیا: اللہ کے رسول صلی اللہ علیہ وسلم ! آپ قرض سے بکثرت پناہ کیوں مانگتے ہیں؟ آپ صلی اللہ علیہ وسلم نے فرمایا: ”آدمی جب مقروض ہوتا ہے تو بات بات پر جھوٹ بولتا ہے اور وعدہ کرتا ہے تو اس کی خلاف ورزی کرتا ہے۔“ [صحيح البخاري/كتاب الاستقراض/حدیث: 2397]

حضرت ابوہریرہ رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”جس نے کوئی مال چھوڑا تو وہ اس کے ورثاء کا حق ہے اور جس نے کوئی بوجھ (اہل و عیال یا قرض) چھوڑا تو وہ ہمارے ذمے ہے۔“ [صحيح البخاري/كتاب الاستقراض/حدیث: 2398]

حضرت ابوہریرہ رضی اللہ عنہ ہی سے روایت ہے کہ نبی صلی اللہ علیہ وسلم نے فرمایا: ”دنیا میں کوئی مومن ایسا نہیں جس سے میرا دنیا و آخرت میں سب سے زیادہ قریب رشتہ نہ ہو۔ اگر چاہتے ہو تو یہ آیت پڑھ لو: ﴿النَّبِيُّ أَوْلَىٰ بِالْمُؤْمِنِينَ مِنْ أَنفُسِهِمْ﴾ [سورة الأحزاب: 6] ”نبی اہل ایمان سے ان کی جانوں سے بھی زیادہ قریبی رشتہ رکھتے ہیں۔“ لہٰذا جو کوئی مومن مر جائے اور مال چھوڑ جائے تو وہ اس کے خاندان کو ملے گا جو اس کے وارث ہوں۔ اور جو کوئی قرض یا عیال چھوڑ جائے تو وہ میرے پاس آئے میں اس کا بندوبست کرنے والا ہوں۔“ [صحيح البخاري/كتاب الاستقراض/حدیث: 2399]

حضرت ابوہریرہ رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”مالدار کا ٹال مٹول کرنا صریح ظلم ہے۔“ [صحيح البخاري/كتاب الاستقراض/حدیث: 2400]

حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم کے پاس ایک شخص اپنے حق کا مطالبہ کرنے کے لیے حاضر ہوا۔ اس نے حق طلبی میں آپ صلی اللہ علیہ وسلم کے ساتھ کچھ سخت انداز اختیار کیا تو صحابہ کرام رضی اللہ عنہم نے اس کی گوشمالی کرنے (اسے سزا دینے) کا ارادہ کیا۔ آپ صلی اللہ علیہ وسلم نے فرمایا: ”اسے چھوڑ دو، بے شک صاحب حق کو (کڑوی کسیلی) باتیں کرنے کا حق ہے۔“ [صحيح البخاري/كتاب الاستقراض/حدیث: 2401]