سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم ، سیدہ فاطمہ رضی اللہ عنہا کے پاس ایک غلام، لے کر آئے جو آپ نے انہیں ہبہ کیا تھا۔ سیدہ فاطمہ رضی اللہ عنہا پر ایک کپڑا تھا، جب وہ ا‏‏‏‏س کے ساتھ اپنا سر ڈھانپتیں تو پاؤں تک نہیں پہنچتا تھا اور جب پاؤں پر ڈالتیں تو وہ سر تک نہیں پہنچتا تھا۔ جب نبی کریم صلی اللہ علیہ وسلم نے ان کی پریشانی دیکھی تو فرمایا: ”(‏‏‏‏اگر پردہ مکمل نہ ہو تو) کوئی حرج نہیں، کیونکہ (‏‏‏‏یہاں) صرف تیرا باپ اور تیرا غلام ہیں۔“ [سلسله احاديث صحيحه/الاخلاق والبروالصلة/حدیث: 2506]

سیدنا عمر بن خطاب رضی اللہ عنہ کہتے ہیں: رسول اللہ صلی اللہ علیہ وسلم ‏‏‏‏نے کوئی چیز تقسیم کی۔ میں نے کہا: اللہ کی قسم! اے اللہ کے رسول! دوسرے لوگ اس کے زیادہ حقدار تھے۔ آپ صلی اللہ علیہ وسلم نے فرمایا: ”(‏‏‏‏درحقیقت) ان لوگوں نے مجھے (‏‏‏‏دو امور کا) اختیار دیا: یا تو مجھ سے بدتمیزی سے مانگتے یا پھر مجھے بخیل کہتے اور میں بخیل نہیں ہوں۔“ [سلسله احاديث صحيحه/الاخلاق والبروالصلة/حدیث: 2507]

سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ”میں تیری ناراضگی اور رضا مندی کو پہچان لیتا ہوں۔“ وہ کہتی ہیں: میں نے کہا کہ اے اللہ کے رسول! آپ کیسے پہچان لیتے ہیں۔ آپ صلی اللہ علیہ وسلم نے فرمایا: ”جب تم راضی ہوتی ہو تو ”رب محمد کی قسم!“ کہتی ہو اور جب ناراض ہوتی ہو تو ”رب ابراہیم کی قسم! کہتی ہو۔“ سیدہ عائشہ رضی اللہ عنہا کہتی ہیں: میں نے کہا: جی ہاں، (‏‏‏‏لیکن) میں صرف آپ کا نام لینا ہی چھوڑتی ہوں (‏‏‏‏دل میں کوئی ناراضگی نہیں ہوتی)۔ [سلسله احاديث صحيحه/الاخلاق والبروالصلة/حدیث: 2508]

سیدنا عبداللہ بن عباس رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا: ”جنتی شخص وہ ہے کہ اللہ تعالیٰ جس کے کانوں کو لوگوں کی طرف سے اچھی تعریف سناتا ہے اور وہ سن رہا ہوتا ہے اور جہنمی وہ شخص ہے کہ اللہ تعالیٰ جس کے کانوں میں لوگوں کی طرف سے شر ڈالتا ہے اور وہ سن رہا ہوتا ہے۔“ [سلسله احاديث صحيحه/الاخلاق والبروالصلة/حدیث: 2509]

سیدنا فضالہ بن عبید رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”تو تین آدمیوں کے (‏‏‏‏عذاب کے) بارے میں سوال نہ کر (‏‏‏‏‏‏‏‏١) ایسا آدمی جو جماعت سے علیحدہ ہو گیا ہو اور امام کی نافرمانی کی ہو اور اسی حالت میں مر گیا ہو (‏‏‏‏٢) ایسی لونڈی یا غلام جو (‏‏‏‏اپنے مالک سے) بھاگ گیا ہو اور اسی حالت میں مر گیا ہو اور (‏‏‏‏٣) ایسی عورت کہ اس کا شوہر اس کے دنیوی اخراجات پورے کر کے غائب ہوا ہو اور وہ (‏‏‏‏اس کی عدم موجودگی میں) بن سنور کر باہر نکلی ہو۔ ان کے بارے میں تو مت پوچھ۔ اسی طرح تین آدمی ہیں (‏‏‏‏ان کے عذاب کے بارے میں بھی) مت دریافت کر (‏‏‏‏ ‏‏‏‏١) ایسا آدمی جس نے اللہ سے اس کی چادر چھیننے (‏‏‏‏کی کوشش کی ہو) اور اللہ کی چادر کبریائی ہے اور ا‏‏‏‏س کا ازار عزت (‏‏‏‏و طاقت) ہے (‏‏‏‏٢) ایسا آدمی جس نے اللہ کے حکم میں شک کیا ہو اور (‏‏‏‏٣) ایسا شخص جو اللہ کی رحمت سے ناامید ہو گیا ہو۔“ [سلسله احاديث صحيحه/الاخلاق والبروالصلة/حدیث: 2510]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”حیاء، ایمان سے ہے اور ایمان جنت میں (‏‏‏‏لے جانے والا) ہے اور بدکلامی و بدزبانی، اکھڑ مزاجی (‏‏‏‏اور بدخلقی) سے ہے اور اکھڑ مزاجی آگ میں (لے جانے والی) ہے۔“ [سلسله احاديث صحيحه/الاخلاق والبروالصلة/حدیث: 2511]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”اللہ اس آدمی پر رحم کرے، جس نے اپنے بھائی کی عزت یا مال (‏‏‏‏کے معاملے میں) ناانصافی کی ہو اور پھر اس کے پاس جا کر معذرت کر لی ہو، قبل اس کے کہ (وہ دن آ جائے جس میں) ا‏‏‏‏س کا مؤاخذہ کیا جائے اور جہاں دینار ہو گا نہ درہم۔ (وہاں تو یوں معاملہ حل کیا جائے گا کہ) اگر ا‏‏‏‏س (‏‏‏‏ظالم) کے پاس نیکیاں ہوئیں تو اس سے نیکیاں لے لی جائیں گی اور اگر اس کے پاس نیکیاں نہ ہوئیں، تو (‏‏‏‏مظلوم) لوگ اپنی برائیاں اس پر ڈال دیں گے۔“ [سلسله احاديث صحيحه/الاخلاق والبروالصلة/حدیث: 2512]

عمرو بن حبیب نے سعید بن خالد بن عمرو بن عثمان سے کہا: کیا آپ کو معلوم نہیں کہ رسول اللہ صلی اللہ علیہ وسلم نے فرمایا: ”ایسا بندہ ناکام و نامراد ہوا جس کے دل میں اللہ تعالیٰ نے انسانیت کے لیے نرمی نہیں رکھی۔“ [سلسله احاديث صحيحه/الاخلاق والبروالصلة/حدیث: 2513]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”اللہ تعالیٰ اس آدمی پر رحم کرے کہ جس نے اپنے بھائی کی عزت یا مال (‏‏‏‏کے معاملے میں) ناانصافی کی ہو اور پھر اس کے پاس جا کر معذرت کر لی ہو، قبل اس کے کہ (‏‏‏‏وہ دن آ جائے جس میں) اس کا مؤاخذہ کیا جائے اور جہاں دینار ہو گا نہ درہم۔ (‏‏‏‏وہاں تو معاملہ یوں حل کیا جائے گا کہ) اگر اس (‏‏‏‏ظالم) کے پاس نیکیاں ہوئیں تو ا‏‏‏‏س سے نیکیاں لے لی جائیں گی اور اگر ا‏‏‏‏س کے پاس نیکیاں نہ ہوئیں، تو (‏‏‏‏مظلوم) لوگ اپنی برائیاں ا‏‏‏‏س پر ڈال دیں گے۔“ ‏‏‏‏ [سلسله احاديث صحيحه/الاخلاق والبروالصلة/حدیث: 2514]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: موسیٰ علیہ السلام نے اپنے رب سے چھ چیزوں کے بارے میں دریافت کیا اور ان کا خیال یہ تھا کہ یہ ان کے لیے خاص ہیں اور ساتویں چیز کو موسیٰ علیہ السلام ناپسند کرتے تھے۔ (۱) موسیٰ علیہ السلام نے کہا: اے میرے رب! تیرا کون سا بندہ بہت زیادہ متقی ہے؟ اللہ تعالیٰ نے فرمایا: ”جو مجھے یاد رکھتا ہے اور بھولتا نہیں۔“ (‏‏‏‏‏‏‏‏۲) موسیٰ علیہ السلام نے کہا: تیرا کون سا بندہ بہت زیادہ ہدایت یافتہ ہے؟ اللہ تعالیٰ نے فرمایا: ”جو (‏‏‏‏ ‏‏‏‏میری) ہدایت کی پیروی کرتا ہے۔“ (‏‏‏‏ ‏‏‏‏۳) موسیٰ نے کہا: تیرا کون سا بندہ سب سے زیادہ منصف ہے؟ اللہ تعالیٰ نے فرمایا: ”جو لوگوں کے لیے اسی طرح فیصلہ کرتا ہو، جس طرح اپنی ذات کے لیے فیصلہ کرتا ہے۔“ (‏‏‏‏٤) موسیٰ علیہ السلام نے کہا: تیرا کون سا بندہ زیادہ علم والا ہے؟ اللہ تعالیٰ نے فرمایا: ”جو علم سے سیر نہیں ہوتا اور لوگوں کے علم کو اپنے علم کی طرف جمع کرتا ہے۔“ (‏‏‏‏٥) موسیٰ علیہ السلام نے کہا: تیرا کون سا بندہ زیادہ معزز ہے؟ اللہ تعالیٰ نے فرمایا: ”جو (‏‏‏‏مقابل پر) قدرت پانے کے بعد معاف کر دے۔“ (‏‏‏‏۶) موسیٰ نے کہا: تیرا کون سا بندہ بہت زیادہ مالدار ہے؟ اللہ تعالیٰ نے فرمایا: ”جسے (‏‏‏‏اللہ تعالیٰ کی طرف سے) جو کچھ دیا جائے وہ اس پر راضی ہو جائے۔“ (٧) موسیٰ علیہ السلام نے کہا: تیرا کون سا بندہ سب سے زیادہ فقیر ہے؟ اللہ تعالیٰ نے فرمایا: ”جو صاحب (یعنی مالدار اپنے مال کو) کم سمجھنے والا (اور مزید طلب کرنے والا ہو)“۔ پھر رسول اللہ صلی اللہ علیہ وسلم نے فرمایا: مالداری (اور بے نیازی کو) کو غنی نہیں کہتے، غنی تو دل کا ہوتا ہے، جب اللہ تعالیٰ کسی بندے کے حق میں خیر و بھلائی کا ارادہ کرتا ہے تو ا‏‏‏‏س کے نفس میں غنی اور دل میں تقویٰ پیدا کر دیتا ہے اور جب اللہ تعالیٰ کسی بندے کے حق میں شر کا ارادہ کرتا ہے تو اس کی فقیری کو اس کی پیشانی پر رکھ دیتا ہے۔“ [سلسله احاديث صحيحه/الاخلاق والبروالصلة/حدیث: 2515]