حضرت صعب بن جثامہ رضی اللہ عنہ سے روایت ہے، انہوں نے کہا کہ نبی کریم صلی اللہ علیہ وسلم مقام ابواء یا ودان میں میرے پاس سے گزرے تو آپ صلی اللہ علیہ وسلم سے دریافت کیا گیا کہ مشرکین کے جس قبیلے پر شبخون مارا جائے تو اس دوران میں اگر بغیر قصد کے عورتیں اور بچے قتل ہو جائیں تو ان کے متعلق کیا حکم ہے؟ آپ صلی اللہ علیہ وسلم نے فرمایا: ”وہ بھی انہی میں سے ہیں۔“ نیز میں نے آپ صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”چراگاہ تو اللہ اور اس کے رسول صلی اللہ علیہ وسلم کے لیے ہے۔“ [صحيح البخاري/كتاب الجهاد والسير/حدیث: 3012]

امام زہری رحمہ اللہ سے روایت ہے، انہوں نے عبیداللہ سے سنا، انہوں نے حضرت ابن عباس رضی اللہ عنہما سے، انہوں نے حضرت صعب رضی اللہ عنہ سے بیان کیا اور صرف بچوں کا ذکر کیا۔ عمرو بن دینار، ابن شہاب زہری سے بیان کرتے ہیں، وہ نبی کریم صلی اللہ علیہ وسلم سے روایت کرتے ہیں۔ ہم نے زہری سے سنا، انہوں نے کہا: مجھے عبیداللہ نے بتایا، انہوں نے حضرت ابن عباس رضی اللہ عنہما سے، انہوں نے حضرت صعب رضی اللہ عنہ سے روایت کی کہ ”وہ (بچے اور عورتیں) ان میں سے ہیں۔“ اور اس طرح بیان نہیں کیا جس طرح عمرو بن دینار نے بیان کیا تھا: ”وہ اپنے آبا و اجداد میں سے ہیں۔“ [صحيح البخاري/كتاب الجهاد والسير/حدیث: 3013]

حضرت عبداللہ بن عمر رضی اللہ عنہما سے روایت ہے، انہوں نے بتایا کہ نبی کریم صلی اللہ علیہ وسلم کے کسی غزوے میں ایک عورت مقتول پائی گئی تو رسول اللہ صلی اللہ علیہ وسلم نے (دوران جنگ میں) عورتوں اور بچوں کو قتل کرنے سے منع فرمایا۔ [صحيح البخاري/كتاب الجهاد والسير/حدیث: 3014]

حضرت ابن عمر رضی اللہ عنہما سے روایت ہے، انہوں نے فرمایا کہ رسول اللہ صلی اللہ علیہ وسلم کی بعض لڑائیوں میں ایک عورت قتل شدہ پائی گئی تو رسول اللہ صلی اللہ علیہ وسلم نے ”عورتوں اور بچوں کو قتل کرنے“ سے منع فرما دیا۔ [صحيح البخاري/كتاب الجهاد والسير/حدیث: 3015]

حضرت ابوہریرہ رضی اللہ عنہ سے روایت ہے، انہوں نے کہا کہ ہمیں رسول اللہ صلی اللہ علیہ وسلم نے ایک فوجی دستے کے ہمراہ روانہ کیا اور فرمایا: ”اگر تم فلاں فلاں آدمی کو پا لو تو انہیں آگ میں جلا دو۔“ جب ہم نے روانگی کا پروگرام بنایا تو پھر رسول اللہ صلی اللہ علیہ وسلم نے فرمایا: ”میں نے تمہیں فلاں فلاں آدمی کو جلا دینے کا حکم دیا تھا، اب بات یہ ہے کہ آگ کے ساتھ صرف اللہ ہی عذاب دیتا ہے، لہٰذا اگر تم انہیں پاؤ تو قتل کر دو۔“ [صحيح البخاري/كتاب الجهاد والسير/حدیث: 3016]

حضرت ابن عباس رضی اللہ عنہما سے روایت ہے، انہیں خبر ملی کہ حضرت علی رضی اللہ عنہ نے کچھ لوگوں کو آگ میں جلا دیا ہے تو حضرت ابن عباس رضی اللہ عنہما نے فرمایا: اگر میں ہوتا تو انہیں ہرگز نہ جلاتا کیونکہ نبی کریم صلی اللہ علیہ وسلم نے فرمایا ہے: ”اللہ کے عذاب (آگ) کے ساتھ کسی کو عذاب نہ دو۔“ ہاں، میں انہیں قتل کروا دیتا جیسا کہ نبی کریم صلی اللہ علیہ وسلم کا ارشاد گرامی ہے: ”جو شخص اپنا دین بدل لے، اسے قتل کر دو۔“ [صحيح البخاري/كتاب الجهاد والسير/حدیث: 3017]

حضرت انس رضی اللہ عنہ سے روایت ہے کہ قبیلہ عکل کے آٹھ آدمیوں کی ایک جماعت نبی کریم صلی اللہ علیہ وسلم کے پاس آئی اور انھیں مدینہ طیبہ کی آب و ہوا موافق نہ آئی تو وہ آپ صلی اللہ علیہ وسلم سے کہنے لگے: ”اللہ کے رسول صلی اللہ علیہ وسلم ! ہمارے لیے اونٹنیوں کے دودھ کا بندوبست کر دیں۔“ آپ صلی اللہ علیہ وسلم نے فرمایا: ”میرے پاس تمہارے لیے اس کے سوا کوئی صورت نہیں کہ تم اونٹنیوں کے پڑاؤ میں قیام کرو۔“ چنانچہ وہ چلے گئے اور وہاں اونٹنیوں کا دودھ اور پیشاب پیا تو تندرست ہو کر پہلے سے بھی زیادہ موٹے ہو گئے۔ پھر انہوں نے چرواہے کو قتل کر دیا اور سب اونٹ ہانک کر لے گئے اور مسلمان ہونے کے بعد ارتداد کا راستہ اختیار کر لیا۔ نبی کریم صلی اللہ علیہ وسلم کو ایک پکارنے والے کے ذریعے سے ان کی خبر ملی تو آپ صلی اللہ علیہ وسلم نے تلاش کنندہ ان کے تعاقب میں روانہ فرمائے۔ ابھی سورج طلوع نہیں ہوا تھا کہ انھیں پکڑ کر آپ صلی اللہ علیہ وسلم کے حضور پیش کر دیا گیا۔ آپ صلی اللہ علیہ وسلم نے ان کے ہاتھ اور پاؤں کاٹنے کا حکم دیا۔ پھر لوہے کی سلاخیں گرم کی گئیں اور انھیں ان کی آنکھوں میں پھیرا گیا اور انھیں پتھریلی زمین پر پھینک دیا گیا۔ وہ پانی مانگتے تھے تو ان کو پانی بھی نہیں پلایا گیا حتیٰ کہ وہ مر گئے۔ (راوی حدیث) ابوقلابہ رحمہ اللہ کہتے ہیں کہ انہوں نے قتل کیا، پھر چوری کی، اس کے بعد انہوں نے اللہ اور اس کے رسول صلی اللہ علیہ وسلم کے خلاف جنگ کی اور اللہ کی زمین میں ڈاکا زنی سے فساد برپا کیا۔ [صحيح البخاري/كتاب الجهاد والسير/حدیث: 3018]

حضرت ابوہریرہ رضی اللہ عنہ سے روایت ہے، انہوں نے کہا کہ میں نے رسول اللہ صلی اللہ علیہ وسلم کو یہ فرماتے سنا: ”سابقہ انبیائے کرام (علیہم السلام) میں سے ایک نبی کو کسی چیونٹی نے کاٹ کھایا تو اس کے حکم پر چیونٹیوں کا بل ہی جلا دیا گیا، پھر اللہ تعالیٰ نے اس پر وحی بھیجی کہ تجھے تو ایک چیونٹی نے کاٹا تھا لیکن تو نے ان کے پورے ایک گروہ کو جلا ڈالا جو اللہ تعالیٰ کی تسبیح کرتا تھا؟“ [صحيح البخاري/كتاب الجهاد والسير/حدیث: 3019]