حضرت عثمان بن عبداللہ بن موہب رحمہ اللہ ہی سے روایت ہے، انہوں نے کہا: ”میں حضرت ام سلمہ رضی اللہ عنہا کی خدمت میں حاضر ہوا تو انہوں نے ہمیں نبی صلی اللہ علیہ وسلم کے چند بال نکال کر دکھائے جن پر خضاب لگا ہوا تھا۔“ [صحيح البخاري/كتاب اللباس/حدیث: 5897]

حضرت عثمان بن عبداللہ بن موہب ہی سے ایک دوسری روایت ہے، انہوں نے کہا کہ ”انہیں حضرت ام سلمہ رضی اللہ عنہا نے نبی صلی اللہ علیہ وسلم کا موئے مبارک دکھایا جو سرخ تھا۔“ [صحيح البخاري/كتاب اللباس/حدیث: 5898]

حضرت ابو ہریرہ رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے فرمایا: ”یہود و نصاریٰ اپنے بالوں کو رنگ نہیں کرتے، تم ان کی مخالفت کرو۔“ [صحيح البخاري/كتاب اللباس/حدیث: 5899]

حضرت انس بن مالک رضی اللہ عنہ سے روایت ہے، انہوں نے فرمایا کہ رسول اللہ صلی اللہ علیہ وسلم ”نہ تو انتہائی دراز قد تھے اور نہ بہت پست قامت، نہ بہت سفید رنگت والے اور نہ گندم گوں تھے۔ آپ کے بال سخت پیچ دار الجھے ہوئے نہ تھے اور نہ بالکل سیدھے ہی۔ اللہ تعالیٰ نے آپ کو چالیس سال کی عمر میں رسول بنایا، پھر دس سال تک مکہ مکرمہ میں قیام فرمایا اور دس سال ہی مدینہ طیبہ میں ٹھہرے۔ تقریباً ساٹھ سال کی عمر میں آپ کو وفات دی، اس وقت آپ کے سر اور داڑھی میں بیس بال بھی سفید نہ تھے۔“ [صحيح البخاري/كتاب اللباس/حدیث: 5900]

حضرت براء رضی اللہ عنہ سے روایت ہے، انہوں نے بیان کیا کہ ”میں نے سرخ جوڑے میں ملبوس نبی صلی اللہ علیہ وسلم سے زیادہ کسی کو خوبصورت نہیں دیکھا۔“ (امام بخاری رحمہ اللہ کہتے ہیں) میرے کچھ ساتھیوں نے مالک بن اسماعیل سے بیان کیا کہ ”آپ صلی اللہ علیہ وسلم کے بال کندھوں کے قریب لہراتے تھے۔“ ابو اسحاق کہتے ہیں کہ ”میں نے (حضرت براء رضی اللہ عنہ کو) ایک سے زیادہ مرتبہ یہ حدیث بیان کرتے سنا، وہ جب بھی یہ حدیث بیان کرتے تو مسکراتے۔“ اس کی متابعت شعبہ نے کی ہے کہ ”آپ صلی اللہ علیہ وسلم کے بال آپ کے کانوں کی لو تک تھے۔“ [صحيح البخاري/كتاب اللباس/حدیث: 5901]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”آج رات میں نے خواب میں اپنے آپ کو کعبے کے پاس دیکھا۔ میں نے وہاں ایک خوبصورت گندمی رنگ والا آدمی دیکھا، تم نے ایسا خوبصورت آدمی کبھی نہیں دیکھا ہوگا۔ اس کے بال شانوں تک لمبے لمبے تھے، وہ اس قدر خوبصورت تھا کہ تم نے ایسا خوبصورت بالوں والا کبھی نہیں دیکھا ہوگا۔ وہ اپنے بالوں میں کنگھی کیے ہوئے تھا اور اس کے سر سے پانی ٹپک رہا تھا۔ وہ دو آدمیوں یا دو آدمیوں کے کندھوں کا سہارا لیے ہوئے بیت اللہ کا طواف کر رہا تھا۔ میں نے پوچھا: یہ کون بزرگ ہیں؟ مجھے بتایا گیا کہ یہ بزرگ مسیح ابن مریم ہیں۔ اس دوران میں اچانک میں نے ایک آدمی دیکھا جو الجھے ہوئے پیچ دار بالوں والا تھا۔ وہ دائیں آنکھ سے کانا تھا گویا وہ آنکھ انگور کا دانہ ہے جو ابھرا ہوا ہو۔ میں نے پوچھا: یہ کون ہے؟ مجھے بتایا گیا کہ یہ مسیح دجال ہے۔“ [صحيح البخاري/كتاب اللباس/حدیث: 5902]

حضرت انس رضی اللہ عنہ سے روایت ہے کہ ”نبی صلی اللہ علیہ وسلم کے موئے مبارک آپ کے کندھوں پر لہراتے تھے۔“ [صحيح البخاري/كتاب اللباس/حدیث: 5903]

حضرت انس رضی اللہ عنہ سے روایت ہے کہ نبی صلی اللہ علیہ وسلم کے سر کے ”موئے مبارک آپ کے شانوں تک پہنچے تھے۔“ [صحيح البخاري/كتاب اللباس/حدیث: 5904]

حضرت قتادہ رحمہ اللہ سے روایت ہے انہوں نے کہا: ”میں نے حضرت انس بن مالک رضی اللہ عنہ سے رسول اللہ صلی اللہ علیہ وسلم کے بالوں کے متعلق دریافت کیا تو انہوں نے فرمایا: ”رسول اللہ صلی اللہ علیہ وسلم کے بال قدرے خمیدہ تھے، نہ الجھے ہوئے انتہائی پیچیدہ اور نہ تنے ہوئے سیدھے کھڑے تھے، اور وہ دونوں کانوں اور کندھوں کے درمیان تھے۔“” [صحيح البخاري/كتاب اللباس/حدیث: 5905]

حضرت انس رضی اللہ عنہ سے روایت ہے، انہوں نے کہا کہ: ”نبی صلی اللہ علیہ وسلم کے دونوں ہاتھ گوشت سے بھرے ہوئے تھے۔ میں نے آپ کے بعد آپ جیسا کوئی نہیں دیکھا، نبی صلی اللہ علیہ وسلم کے بال قدرے خمیدہ تھے، نہ تو بہت شکن دار تھے اور نہ انتہائی سیدھے ہی تھے۔“ [صحيح البخاري/كتاب اللباس/حدیث: 5906]