نبی صلی اللہ علیہ وسلم کی زوجہ محترمہ حضرت عائشہ رضی اللہ عنہا کے مادری بھتیجے عوف بن مالک بن طفیل سے روایت ہے کہ حضرت عائشہ رضی اللہ عنہا نے کوئی چیز بیچی یا خیرات کی، انہیں خبر پہنچی کہ عبداللہ بن زبیر رضی اللہ عنہ نے ان کے متعلق کہا ہے: ”اللہ کی قسم! ام المومنین حضرت عائشہ رضی اللہ عنہا (خرید و فروخت کرنے یا خیرات کرنے سے) اگر باز نہ آئیں تو میں ان کے تصرفات پر پابندی لگا دوں گا۔“ حضرت عائشہ رضی اللہ عنہا نے فرمایا: ”کیا عبداللہ نے یہ بات کہی ہے؟“ لوگوں نے کہا: ”جی ہاں۔“ انہوں نے فرمایا: ”پھر اللہ کے لیے مجھ پر نذر ہے کہ میں ابن زبیر سے کبھی بات نہیں کروں گی۔“ اس کے بعد جب قطع تعلقی پر عرصہ گزر گیا تو حضرت عبداللہ بن زبیر رضی اللہ عنہ نے ان (حضرت عائشہ رضی اللہ عنہا) کے ہاں سفارش کرائی لیکن انہوں نے فرمایا: ”نہیں، اللہ کی قسم! میں اس کے متعلق کسی کی سفارش قبول نہیں کروں گی اور اپنی نذر ختم نہیں کروں گی۔“ جب عبداللہ بن زبیر رضی اللہ عنہ کے لیے سلام و کلام کی بندش بہت تکلیف دہ ہو گئی تو انہوں نے مسور بن مخرمہ اور عبدالرحمن بن اسود بن عبد یغوث رضی اللہ عنهم سے اس سلسلے میں گفتگو کی، وہ دونوں بنو زہرہ سے تعلق رکھتے تھے۔ (عبداللہ بن زبیر رضی اللہ عنہ نے) ان سے کہا: ”میں تمہیں اللہ کی قسم دیتا ہوں مجھے تم کسی طرح حضرت عائشہ رضی اللہ عنہا کے پاس لے جاؤ کیونکہ ان کے لیے جائز نہیں کہ میرے ساتھ قطع رحمی کی نذر مانیں۔“ چنانچہ حضرت مسور اور عبدالرحمن رضی اللہ عنہما دونوں اپنی چادریں اوڑھے ہوئے حضرت ابن زبیر رضی اللہ عنہ کو ساتھ لائے اور حضرت عائشہ رضی اللہ عنہا سے اندر آنے کی اجازت طلب کی اور «اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهٗ» ”السلام علیکم ورحمۃ اللہ وبرکاتہ“ کہتے ہوئے عرض کی: ”کیا ہم اندر آ سکتے ہیں؟“ حضرت عائشہ رضی اللہ عنہا نے فرمایا: ”آ جاؤ۔“ انہوں نے پھر عرض کی: ”کیا ہم سب آ جائیں؟“ فرمایا: ”ہاں، سب آ جاؤ۔“ آپ کو علم نہیں تھا کہ ابن زبیر رضی اللہ عنہ بھی ان کے ساتھ ہیں۔ جب وہ داخل ہوئے تو حضرت عبداللہ بن زبیر رضی اللہ عنہ پردے کے اندر چلے گئے (کیونکہ وہ بھانجے تھے) اور حضرت عائشہ رضی اللہ عنہا سے لپٹ کر انہیں اللہ کا واسطہ دینے لگے اور رونے لگے۔ حضرت مسور اور عبدالرحمن رضی اللہ عنہما بھی (پردے کے باہر سے) آپ کو اللہ کا واسطہ دینے لگے کہ عبداللہ بن زبیر رضی اللہ عنہ سے گفتگو کریں اور ان سے درگزر فرمائیں۔ ان حضرات نے یہ بھی کہا: ”آپ کو معلوم ہے کہ نبی صلی اللہ علیہ وسلم نے قطع تعلقی سے منع فرمایا ہے چنانچہ آپ کا ارشاد ہے: ”کسی مسلمان کو اپنے بھائی سے تین دن سے زیادہ قطع تعلق رہنا جائز نہیں۔“ جب انہوں نے کثرت کے ساتھ حضرت عائشہ رضی اللہ عنہا کو صلہ رحمی کی اہمیت یاد دلائی اور اس کے نقصانات سے آگاہ کیا تو وہ بھی انہیں اپنی نذر یاد دلانے لگیں اور روتے ہوئے کہنے لگیں: ”میں نے تو نذر مانی ہے اور اس کی رعایت نہ کرنا سخت دشوار ہے۔“ لیکن یہ دونوں بزرگ بار بار کوشش کرتے رہے حتیٰ کہ ام المومنین (حضرت عائشہ رضی اللہ عنہا) نے حضرت ابن زبیر رضی اللہ عنہ سے گفتگو فرمائی اور اپنی نذر میں چالیس غلام آزاد کیے۔ اس کے بعد جب بھی آپ یہ قسم یاد کرتیں تو روتیں حتیٰ کہ آپ کا دوپٹہ آنسوؤں سے تر ہو جاتا۔ [صحيح البخاري/كتاب الأدب/حدیث: 6074]

نبی صلی اللہ علیہ وسلم کی زوجہ محترمہ حضرت عائشہ رضی اللہ عنہا کے مادری بھتیجے عوف بن مالک بن طفیل سے روایت ہے کہ حضرت عائشہ رضی اللہ عنہا نے کوئی چیز بیچی یا خیرات کی، انہیں خبر پہنچی کہ عبداللہ بن زبیر رضی اللہ عنہ نے ان کے متعلق کہا ہے: ”اللہ کی قسم! ام المومنین حضرت عائشہ رضی اللہ عنہا (خرید فروخت کرنے یا خیرات کرنے سے) اگر باز نہ آئیں تو میں ان کے تصرفات پر پابندی لگا دوں گا۔“ حضرت عائشہ رضی اللہ عنہا نے فرمایا: ”کیا عبداللہ نے یہ بات کہی ہے؟“ لوگوں نے کہا: ”جی ہاں۔“ انہوں نے فرمایا: ”پھر اللہ کے لیے مجھ پر نذر ہے کہ میں ابن زبیر سے کبھی بات نہیں کروں گی۔“ اس کے بعد جب قطع تعلقی پر عرصہ گزر گیا تو عبداللہ بن زبیر رضی اللہ عنہ نے ان (حضرت عائشہ رضی اللہ عنہا) کے ہاں سفارش کرائی لیکن انہوں نے فرمایا: ”نہیں، اللہ کی قسم! میں اس کے متعلق کسی کی سفارش قبول نہیں کروں گی اور اپنی نذر ختم نہیں کروں گی۔“ جب عبداللہ بن زبیر رضی اللہ عنہ کے لیے سلام و کلام کی بندش بہت تکلیف دہ ہو گئی تو انہوں نے مسور بن مخرمہ اور عبدالرحمن بن اسود بن عبد یغوث رضی اللہ عنہما سے اس سلسلے میں گفتگو کی، وہ دونوں بنو زہرہ سے تعلق رکھتے تھے۔ عبداللہ بن زبیر رضی اللہ عنہ نے ان سے کہا: ”میں تمہیں اللہ کی قسم دیتا ہوں، مجھے تم کسی طرح حضرت عائشہ رضی اللہ عنہا کے پاس لے جاؤ کیونکہ ان کے لیے جائز نہیں کہ میرے ساتھ قطع رحمی کی نذر مانیں۔“ چنانچہ مسور اور عبدالرحمن رضی اللہ عنہما دونوں اپنی چادریں اوڑھے ہوئے عبداللہ بن زبیر رضی اللہ عنہ کو ساتھ لائے اور حضرت عائشہ رضی اللہ عنہا سے اندر آنے کی اجازت طلب کی اور «السَّلَامُ عَلَيْكُمْ وَرَحْمَةُ اللهِ وَبَرَكَاتُهُ» ”تم پر سلامتی ہو اور اللہ کی رحمت اور اس کی برکتیں“ کہتے ہوئے عرض کی: ”ہم اندر آ سکتے ہیں؟“ حضرت عائشہ رضی اللہ عنہا نے فرمایا: ”آ جاؤ۔“ انہوں نے پھر عرض کی: ”ہم سب آ جائیں؟“ فرمایا: ”ہاں، سب آ جاؤ۔“ آپ کو علم نہیں تھا کہ ابن زبیر رضی اللہ عنہ بھی ان کے ساتھ ہیں۔ جب وہ داخل ہوئے تو عبداللہ بن زبیر رضی اللہ عنہ پردے کے اندر چلے گئے (کیونکہ وہ بھانجے تھے) اور حضرت عائشہ رضی اللہ عنہا سے لپٹ کر انہیں اللہ کا واسطہ دینے لگے اور رونے لگے۔ مسور اور عبدالرحمن رضی اللہ عنہما بھی (پردے کے باہر سے) آپ کو اللہ کا واسطہ دینے لگے کہ عبداللہ بن زبیر رضی اللہ عنہ سے گفتگو کریں اور ان سے درگزر فرمائیں۔ ان حضرات نے یہ بھی کہا: ”آپ کو معلوم ہے کہ نبی صلی اللہ علیہ وسلم نے قطع تعلقی سے منع فرمایا ہے، چنانچہ آپ کا ارشاد ہے: ”کسی مسلمان کے لیے حلال نہیں کہ وہ اپنے بھائی سے تین دن سے زیادہ قطع تعلق رکھے۔““ جب انہوں نے کثرت کے ساتھ حضرت عائشہ رضی اللہ عنہا کو صلہ رحمی کی اہمیت یاد دلائی اور اس کے نقصانات سے آگاہ کیا تو وہ بھی انہیں اپنی نذر یاد دلانے لگیں اور روتے ہوئے کہنے لگیں: ”میں نے تو نذر مانی ہے اور اس کی رعایت نہ کرنا سخت دشوار ہے۔“ لیکن یہ دونوں بزرگ بار بار کوشش کرتے رہے حتیٰ کہ ام المومنین حضرت عائشہ رضی اللہ عنہا نے عبداللہ بن زبیر رضی اللہ عنہ سے گفتگو فرمائی اور اپنی نذر میں چالیس غلام آزاد کیے۔ اس کے بعد جب بھی آپ یہ قسم یاد کرتیں تو روتیں حتیٰ کہ آپ کا دوپٹہ آنسوؤں سے تر ہو جاتا۔ [صحيح البخاري/كتاب الأدب/حدیث: 6075]

حضرت انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”آپس میں غصہ نہ کیا کرو، نہ ایک دوسرے سے حسد کرو اور نہ ایک دوسرے سے پیٹھ پھیرا کرو، (بلکہ) اللہ کے بندو! بھائی بھائی بن کر رہو۔ کسی مسلمان کے لیے یہ حلال نہیں کہ وہ اپنے بھائی سے تین رات سے زیادہ میل جول چھوڑ دے۔“ [صحيح البخاري/كتاب الأدب/حدیث: 6076]

حضرت ابو ایوب انصاری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کسی آدمی کے لیے جائز نہیں کہ وہ اپنے بھائی کے ساتھ تین دن سے زیادہ میل ملاقات چھوڑے رہے، اس طرح کہ جب دونوں کا سامنا ہو جائے تو یہ بھی منہ پھیر لے اور وہ بھی منہ پھیر لے۔ اور ان دونوں میں بہتر وہ ہے جو سلام کرنے میں پہل کرے۔“ [صحيح البخاري/كتاب الأدب/حدیث: 6077]

حضرت عائشہ رضی اللہ عنہا سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”میں تمہاری ناراضی اور خوشی کو خوب پہچانتا ہوں۔“ میں نے عرض کی: اے اللہ کے رسول! آپ کیسے پہچانتے ہیں؟ آپ صلی اللہ علیہ وسلم نے فرمایا: ”جب تم خوش ہوتی ہو تو کہتی ہو: «بَلٰى وَرَبِّ مُحَمَّدٍ» ”کیوں نہیں، مجھے رب محمد صلی اللہ علیہ وسلم کی قسم ہے“ اور جب ناراض ہوتی ہو تو کہتی ہو: «لَا وَرَبِّ إِبْرَاهِيمَ» ”نہیں نہیں، مجھے رب ابراہیم کی قسم ہے“۔“ حضرت عائشہ رضی اللہ عنہا نے کہا: میں نے عرض کی: ”ہاں ایسا ہی ہے، میں صرف آپ کا نام لینا چھوڑ دیتی ہوں۔“ [صحيح البخاري/كتاب الأدب/حدیث: 6078]

حضرت عائشہ رضی اللہ عنہا سے روایت ہے، انہوں نے فرمایا: ”میں نے جب ہوش سنبھالا تو اپنے والدین کو دین اسلام کے تابع پایا۔ ان پر کوئی دن ایسا نہیں گزرتا تھا جس میں رسول اللہ صلی اللہ علیہ وسلم صبح شام ہمارے پاس تشریف نہ لاتے ہوں۔ ایک مرتبہ ہم سخت دوپہر کے وقت حضرت ابوبکر صدیق رضی اللہ عنہ کے گھر بیٹھے ہوئے تھے کہ کسی نے کہا: یہ رسول اللہ صلی اللہ علیہ وسلم تشریف لا رہے ہیں (ایسے وقت میں جس میں آپ صلی اللہ علیہ وسلم پہلے) تشریف نہیں لاتے تھے۔ حضرت ابوبکر صدیق رضی اللہ عنہ نے فرمایا: ”آپ صلی اللہ علیہ وسلم کا اس وقت تشریف لانا کسی خاص وجہ ہی سے ہو سکتا ہے۔“ آپ صلی اللہ علیہ وسلم نے فرمایا: ”مجھے مکہ مکرمہ سے باہر چلے جانے کی اجازت مل گئی ہے۔““ [صحيح البخاري/كتاب الأدب/حدیث: 6079]

حضرت انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم نے قبیلہ انصار کے ایک گھرانے کی زیارت کی اور ان کے ہاں کھانا تناول فرمایا، جب آپ صلی اللہ علیہ وسلم واپس تشریف لانے لگے تو گھر میں ایک جگہ کے متعلق حکم دیا، تو آپ صلی اللہ علیہ وسلم کے لیے چٹائی دھو کر صاف کر دی گئی، آپ صلی اللہ علیہ وسلم نے اس پر نماز پڑھی اور اہل خانہ کے لیے دعا فرمائی۔“ [صحيح البخاري/كتاب الأدب/حدیث: 6080]

حضرت یحیٰی بن ابی اسحاق سے روایت ہے، انہوں نے کہا کہ مجھ سے حضرت سالم بن عبداللہ نے پوچھا: ” «اِسْتَبْرَقٌ» کیا ہوتا ہے؟“ میں نے کہا: ”دیبا سے بنا ہوا موٹا اور کھردرا کپڑا۔“ پھر انہوں نے بیان کیا کہ میں نے حضرت عبداللہ بن عمر رضی اللہ عنہ سے سنا، انہوں نے کہا کہ حضرت عمر بن خطاب رضی اللہ عنہ نے ایک شخص کو «اِسْتَبْرَقٌ» کا جوڑا پہنے ہوئے دیکھا تو نبی صلی اللہ علیہ وسلم کی خدمت میں اسے لے کر حاضر ہوئے اور عرض کی: ”اللہ کے رسول! آپ اسے خرید لیں اور جب لوگوں کے وفد آپ کے پاس آئیں تو اسے زیب تن کر لیا کریں۔“ آپ صلی اللہ علیہ وسلم نے فرمایا: ”اسے تو صرف وہ شخص پہنتا ہے جس کا آخرت میں کوئی حصہ نہیں ہوتا۔“ اس کے بعد کچھ مدت گزری تو نبی صلی اللہ علیہ وسلم نے خود انہیں ایک ریشمی جوڑا بھیجا، چنانچہ وہ اسے لے کر نبی صلی اللہ علیہ وسلم کی خدمت میں حاضر ہوئے اور عرض کی: ”اللہ کے رسول! آپ نے یہ جوڑا میرے لیے بھیجا ہے، حالانکہ آپ اس کے متعلق جو ارشاد فرمانا تھا وہ فرما چکے ہیں۔“ آپ صلی اللہ علیہ وسلم نے فرمایا: ”میں نے یہ تمہارے پاس اس لیے بھیجا ہے کہ تم اس کے ذریعے سے مال حاصل کرو۔“ حضرت عبداللہ بن عمر رضی اللہ عنہ اس حدیث کی وجہ سے کپڑوں پر بیل بوٹے اور نقش و نگار ناپسند کرتے تھے۔ [صحيح البخاري/كتاب الأدب/حدیث: 6081]