حضرت ابو ہریرہ رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”جس نے کسی مسلمان غلام کو آزاد کیا تو اللہ تعالیٰ (غلام کے) ایک ایک عضو کے بدلے اس کا ایک ایک عضو جہنم سے آزاد کر دے گا حتیٰ کہ (غلام) کی شرمگاہ کے عوض اس (آزاد کرنے والے) کی شرمگاہ بھی دوزخ سے آزاد ہو جائے گی۔“ [صحيح البخاري/كتاب كفارات الأيمان/حدیث: 6715]

حضرت جابر رضی اللہ عنہ سے روایت ہے کہ قبیلہ انصار میں سے ایک آدمی نے اپنے غلام کو مدبر بنایا جبکہ اس کے پاس غلام کے علاوہ اور کوئی مال نہ تھا۔ نبی کریم صلی اللہ علیہ وسلم کو اس بات کا علم ہوا تو آپ نے فرمایا: ”یہ غلام مجھ سے کون خریدتا ہے؟“ نعیم بن نحام رضی اللہ عنہ نے آٹھ سو درہم کے عوض اسے خرید لیا۔ حضرت جابر رضی اللہ عنہ کہتے ہیں کہ وہ ایک قبطی غلام تھا جو پہلے ہی سال مر گیا۔ [صحيح البخاري/كتاب كفارات الأيمان/حدیث: 6716]

حضرت عائشہ رضی اللہ عنہا سے روایت ہے، انہوں نے حضرت بریرہ رضی اللہ عنہا کو خریدنے کا ارادہ کیا تو ان کے آقاؤں نے شرط عائد کی کہ ولاء ان کی ہوگی۔ حضرت عائشہ رضی اللہ عنہا نے جب نبی صلی اللہ علیہ وسلم سے اس کا ذکر کیا تو آپ نے فرمایا: ”اسے خرید کر آزاد کر دو، ولاء تو اسی کے لیے ہوتی ہے جو آزاد کرتا ہے۔“ [صحيح البخاري/كتاب كفارات الأيمان/حدیث: 6717]

حضرت ابوموسیٰ اشعری رضی اللہ عنہ سے روایت ہے، انہوں نے کہا: میں اشعری قبیلے کے چند آدمیوں کے ہمراہ رسول اللہ صلی اللہ علیہ وسلم کی خدمت میں حاضر ہوا اور آپ سے سواری کا مطالبہ کیا۔ آپ صلی اللہ علیہ وسلم نے فرمایا: ”اللہ کی قسم! میں تمہیں سواری نہیں دوں گا اور نہ میرے پاس کوئی سواری ہے جس پر میں تمہیں سوار کر دوں۔“ پھر جس قدر اللہ نے چاہا ہم وہاں ٹھہرے۔ اس دوران میں آپ کے پاس اونٹ لائے گئے تو آپ نے ہمیں تین اونٹ دینے کا حکم دیا۔ جب ہم اونٹ لے کر چلے تو ہم نے ایک دوسرے سے کہا: ”اللہ تعالیٰ ہمیں ان میں کوئی برکت نہ دے گا کیونکہ ہم جب رسول اللہ صلی اللہ علیہ وسلم کی خدمت میں سواری لینے کے لیے آئے تھے تو آپ نے قسم کھائی تھی کہ وہ ہمیں سواریاں مہیا نہیں کریں گے، اس کے بعد آپ نے ہمیں سواریاں دے دی ہیں۔“ حضرت ابوموسیٰ اشعری رضی اللہ عنہ نے کہا: ہم نبی صلی اللہ علیہ وسلم کی خدمت میں دوبارہ حاضر ہوئے اور آپ سے یہ ذکر کیا تو آپ نے فرمایا: ”میں نے تمہیں سواری نہیں دی بلکہ اللہ تعالیٰ نے اس کا بندوبست کیا ہے۔ اللہ کی قسم! «إِنْ شَاءَ اللّٰهُ» ”اگر اللہ نے چاہا“، اگر میں کسی چیز کے متعلق قسم کھا لیتا ہوں، پھر اس سے بہتر کوئی چیز دیکھتا ہوں تو میں اپنی قسم کا کفارہ دیتا ہوں اور وہ کام کر گزرتا ہوں جو بہتر ہوتا ہے اور اپنی قسم کا کفارہ دے دیتا ہوں۔“ [صحيح البخاري/كتاب كفارات الأيمان/حدیث: 6718]

ایک روایت ہے کہ رسول اللہ صلی اللہ علیہ وسلم نے فرمایا: ”میں قسم کا کفارہ دیتا ہوں اور وہ کام کر گزرتا ہوں جو بہتر ہوتا ہے، یا (بایں الفاظ فرمایا:) میں بہتر کام کر گزرتا ہوں اور اپنی قسم کا کفارہ دے دیتا ہوں۔“ [صحيح البخاري/كتاب كفارات الأيمان/حدیث: 6719]

حضرت ابوہریرہ رضی اللہ عنہ سے روایت ہے، انہوں نے کہا کہ حضرت سلیمان علیہ السلام نے فرمایا: ”میں ضرور ایک رات اپنی نوے بیویوں کے پاس جاؤں گا اور ان میں سے ہر ایک بچہ جنے گی جو اللہ کی راہ میں جہاد کرے گا۔“ ان کے ساتھی (فرشتے) نے کہا: «إِنْ شَاءَ اللّٰهُ» کہہ دیں، لیکن وہ بھول گئے، چنانچہ وہ تمام بیویوں کے پاس گئے اور ان میں کسی بیوی کے ہاں بچہ پیدا نہ ہوا مگر ایک عورت نے ناقص بچہ جنم دیا۔ حضرت ابوہریرہ رضی اللہ عنہ نے نبی کریم صلی اللہ علیہ وسلم سے بیان کیا کہ آپ صلی اللہ علیہ وسلم نے فرمایا: ”اگر وہ «إِنْ شَاءَ اللّٰهُ» کہتے تو حانث نہ ہوتے اور اپنا مقصد حاصل کر لیتے۔“ بعض اوقات رسول اللہ صلی اللہ علیہ وسلم نے یہ الفاظ فرمائے: ”اگر وہ استثناء کہہ لیتے۔“ ہم سے ابوزناد نے بیان کیا، انہوں نے اعرج سے حضرت ابوہریرہ رضی اللہ عنہ کی طرح حدیث بیان کی۔ [صحيح البخاري/كتاب كفارات الأيمان/حدیث: 6720]

زہدم جرمی رحمہ اللہ سے روایت ہے انہوں نے کہا: ہم حضرت ابو موسیٰ اشعری رضی اللہ عنہ کے پاس تھے۔ ہمارے اور اس قبیلہ جرم کے درمیان بھائی چارہ اور احسان شناسی کے تعلقات تھے۔ حضرت ابو موسیٰ اشعری رضی اللہ عنہ کی خدمت میں کھانا پیش کیا گیا۔ اس کھانے میں مرغ کا گوشت بھی تھا۔ ان لوگوں میں بنو تیم اللہ سے ایک سرخ رنگ کا آدمی تھا، وہ بظاہر غلام معلوم ہوتا تھا۔ وہ کھانے کے قریب نہ آیا تو حضرت ابو موسیٰ اشعری رضی اللہ عنہ نے کہا: ”کھانا قریب ہو کر کھاؤ، میں نے رسول اللہ صلی اللہ علیہ وسلم کو یہ کھاتے ہوئے دیکھا ہے۔“ اس نے کہا: ”میں نے اسے گندگی سے کھاتے دیکھا ہے، اس لیے مجھے اس سے گھن آتی ہے اور میں نے قسم کھائی تھی کہ میں اسے کبھی نہیں کھاؤں گا۔“ حضرت ابو موسیٰ اشعری رضی اللہ عنہ نے فرمایا: ”کھانے میں شریک ہو جاؤ، میں تمہیں قسم کے متعلق آگاہ کرتا ہوں۔ ہم قبیلہ اشعر کے لوگوں کے ہمراہ رسول اللہ صلی اللہ علیہ وسلم کی خدمت میں حاضر ہوئے، میں نے آپ صلی اللہ علیہ وسلم سے سواری کا جانور طلب کیا، اس وقت آپ صلی اللہ علیہ وسلم صدقے کے اونٹ تقسیم کر رہے تھے، میرے خیال کے مطابق اس وقت آپ صلی اللہ علیہ وسلم غصے کی حالت میں تھے۔ رسول اللہ صلی اللہ علیہ وسلم نے فرمایا: ” «وَاللّٰهِ!» ”اللہ کی قسم!“ میں تمہیں سواری نہیں دوں گا اور نہ میرے پاس کوئی سواری ہے جو تمہیں مہیا کر سکوں۔“ اس وقت ہم واپس چلے گئے، پھر آپ صلی اللہ علیہ وسلم کے پاس غنیمت کے اونٹ آئے تو آپ صلی اللہ علیہ وسلم نے دریافت فرمایا: ”یہ اشعری کہاں چلے گئے ہیں؟“ چنانچہ ہم آپ صلی اللہ علیہ وسلم کی خدمت میں حاضر ہوئے تو آپ صلی اللہ علیہ وسلم نے ہمیں پانچ سفید کوہانوں والے عمدہ اونٹ دینے کا حکم دیا۔ ہم وہاں سے روانہ ہوئے تو اس دوران میں نے اپنے ساتھیوں سے کہا: ”ہم رسول اللہ صلی اللہ علیہ وسلم کی خدمت میں آئے تھے اور آپ صلی اللہ علیہ وسلم سے سواری مہیا کرنے کا مطالبہ کیا تھا تو آپ صلی اللہ علیہ وسلم نے قسم کھائی تھی کہ ہمیں سواری نہیں دیں گے، پھر ہمیں بلا بھیجا اور سواری کے جانور عنایت فرمائے۔ رسول اللہ صلی اللہ علیہ وسلم اپنی قسم بھول گئے ہوں گے؟ «وَاللّٰهِ!» ”اللہ کی قسم!“ اگر ہم نے رسول اللہ صلی اللہ علیہ وسلم کو قسم کے متعلق غفلت میں رکھا تو ہم کبھی کامیاب نہیں ہوں گے۔ چلو ہم سب آپ صلی اللہ علیہ وسلم کے پاس واپس چلیں اور آپ صلی اللہ علیہ وسلم کو قسم کی یاد دہانی کرائیں“ چنانچہ ہم واپس آئے اور کہا: ”اللہ کے رسول! ہم پہلے آئے تھے اور آپ صلی اللہ علیہ وسلم سے سواری مہیا کرنے کے متعلق عرض کی تھی تو آپ صلی اللہ علیہ وسلم نے قسم اٹھائی تھی کہ آپ صلی اللہ علیہ وسلم اس کا انتظام نہیں کر سکتے۔ ہم نے خیال کیا شاید آپ صلی اللہ علیہ وسلم اپنی قسم بھول گئے ہوں۔“ آپ صلی اللہ علیہ وسلم نے فرمایا: ”جاؤ تمہیں اللہ ہی نے سوار کیا ہے۔ «وَاللّٰهِ إِنْ شَاءَ اللّٰهُ!» ”اللہ کی قسم! اگر اللہ نے چاہا“ تو میں جب بھی کوئی قسم کھا لوں، پھر دوسری کسی چیز کو اس کے مقابل بہتر سمجھوں تو وہی کرتا ہوں جو بہتر ہوتا ہے اور قسم کا کفارہ دے دیتا ہوں۔“ حماد بن زید نے ایوب سے روایت کرنے میں اسماعیل بن ابراہیم کی متابعت کی ہے۔ [صحيح البخاري/كتاب كفارات الأيمان/حدیث: 6721]