ابن عمر رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”تم سامانِ تجارت کو شہر سے باہر جا کر نہ ملو حتیٰ کہ اسے بازار میں اتار دیا جائے۔“ متفق علیہ۔ [مشكوة المصابيح/كتاب البيوع/حدیث: 2849]

ابن عمر رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”آدمی اپنے بھائی کی بیع پر بیع نہ کرے اور نہ اپنے بھائی کے پیغامِ نکاح پر پیغامِ نکاح بھیجے مگر یہ کہ وہ اسے اجازت دے دے۔“ رواہ مسلم۔ [مشكوة المصابيح/كتاب البيوع/حدیث: 2850]

ابوہریرہ رضی اللہ عنہ سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”آدمی اپنے مسلمان بھائی کی بیع طے ہونے تک بھاؤ نہ کرے۔“ رواہ مسلم۔ [مشكوة المصابيح/كتاب البيوع/حدیث: 2851]

جابر رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”کوئی شہری، کسی دیہاتی کا مال فروخت نہ کرے، لوگوں کو (اپنے حال پر) چھوڑ دو، اللہ تعالیٰ بعض کے ذریعے بعض کو رزق فراہم کرتا ہے۔“ رواہ مسلم۔ [مشكوة المصابيح/كتاب البيوع/حدیث: 2852]

ابو سعید خدری رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے ”دو طرح کے پہناووں اور دو طرح کی تجارت سے منع فرمایا ہے“۔ آپ صلی ‌اللہ ‌علیہ ‌وآلہ ‌وسلم نے بیع «الْمُلَامَسَةِ» ”ملامسہ“ اور «الْمُنَابَذَةِ» ”منابذہ“ سے منع فرمایا، «الْمُلَامَسَةُ» ”ملامسہ“ یہ ہے کہ آدمی دن یا رات کے وقت کسی دوسرے شخص کے کپڑے کو ہاتھ سے چھوتا ہے اور اسے الٹ پلٹ کر کے نہیں دیکھتا اور بس اس طرح بیع ہو جاتی ہے، جبکہ «الْمُنَابَذَةُ» ”منابذہ“ یہ ہے کہ آدمی اپنا کپڑا دوسرے شخص کی طرف اور وہ اپنا کپڑا اس پہلے شخص کی طرف پھینکتا ہے اور بس اسی طرح بن دیکھے اور بغیر رضامندی کے بیع ہو جاتی ہے۔ اور دو پہناوے یہ ہیں: ان میں سے ایک «اشْتِمَالُ الصَّمَّاءِ» ”اشتمال الصماء“ ہے اور وہ یہ ہے کہ وہ اپنا کپڑا اپنے کسی ایک کندھے پر رکھے اور اس کا ایک پہلو ظاہر رہے جس پر کوئی کپڑا نہ ہو، اور دوسرا پہناوا یہ ہے کہ گوٹ مار کر اس طرح بیٹھنا کہ اس کپڑے کا کچھ بھی حصہ اس کی شرم گاہ پر نہ ہو۔ متفق علیہ۔ [مشكوة المصابيح/كتاب البيوع/حدیث: 2853]

ابوہریرہ رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نے ”کنکری پھینک کر بیع کرنے اور دھوکے کی بیع کرنے“ سے منع فرمایا۔ (رواہ مسلم)۔ [مشكوة المصابيح/كتاب البيوع/حدیث: 2854]

ابن عمر رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے ” «حَبَلِ الْحَبَلَةِ» کی بیع سے منع فرمایا“، اور اہل جاہلیت اس طرح کی بیع کیا کرتے تھے، اور وہ اس طرح کہ آدمی اس اقرار پر اونٹنی خریدتا کہ یہ اونٹنی بچہ جنے گی اور پھر جب وہ بچہ، بچہ جنے گا تب اس کی قیمت ادا کروں گا۔ متفق علیہ۔ [مشكوة المصابيح/كتاب البيوع/حدیث: 2855]

ابن عمر رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے ”نر سے جفتی کرانے پر اجرت لینے سے منع فرمایا۔“ رواہ البخاری۔ [مشكوة المصابيح/كتاب البيوع/حدیث: 2856]

جابر رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے ”اونٹ سے اونٹنی پر جفتی کروانے پر اجرت لینے اور کھیتی باڑی کے لیے دی جانے والی زمین اور پانی پر اجرت لینے سے منع فرمایا۔“ رواہ مسلم۔ [مشكوة المصابيح/كتاب البيوع/حدیث: 2857]

جابر رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے ”زائد از ضرورت پانی فروخت کرنے سے منع فرمایا۔“ (رواہ مسلم) [مشكوة المصابيح/كتاب البيوع/حدیث: 2858]