حذیفہ رضی اللہ عنہ، نبی صلی ‌اللہ ‌علیہ ‌وآلہ ‌وسلم سے روایت کرتے ہیں، آپ صلی ‌اللہ ‌علیہ ‌وآلہ ‌وسلم نے فرمایا: ”یوں نہ کہا کرو: جو اللہ چاہے اور فلاں چاہے، بلکہ یوں کہو: جو اللہ چاہے، پھر فلاں چاہے۔“ اسنادہ صحیح، رواہ احمد و ابوداؤد۔ [مشكوة المصابيح/كتاب الآداب/حدیث: 4778]

اور ایک منقطع روایت میں ہے، آپ صلی ‌اللہ ‌علیہ ‌وآلہ ‌وسلم نے فرمایا: ”یوں نہ کہا کرو: جو اللہ چاہے اور جو محمد صلی ‌اللہ ‌علیہ ‌وآلہ ‌وسلم چاہے، بلکہ یوں کہا کرو: کہ اکیلا اللہ چاہے۔“ حسن، اسے شرح السنہ میں روایت کیا گیا ہے۔ [مشكوة المصابيح/كتاب الآداب/حدیث: 4779]

حذیفہ رضی اللہ عنہ نبی کریم صلی ‌اللہ ‌علیہ ‌وآلہ ‌وسلم سے روایت کرتے ہیں، آپ صلی ‌اللہ ‌علیہ ‌وآلہ ‌وسلم نے فرمایا: ”منافق کے لیے لفظِ «سَيِّد» (آقا) نہ کہو، کیونکہ اگر وہ «سَيِّد» (سردار، آقا) ہے تو تم نے اپنے رب کو ناراض کر دیا۔“ (اسنادہ ضعیف، رواہ ابوداؤد) [مشكوة المصابيح/كتاب الآداب/حدیث: 4780]

عبدالحمید بن جبیر بن شیبہ بیان کرتے ہیں، میں سعید بن مسیب رحمہ اللہ کے پاس بیٹھا تھا، انہوں نے مجھے حدیث بیان کی کہ ان کے دادا حزن رضی اللہ عنہ، نبی کریم صلی ‌اللہ ‌علیہ ‌وآلہ ‌وسلم کے پاس آئے تو آپ صلی ‌اللہ ‌علیہ ‌وآلہ ‌وسلم نے دریافت فرمایا: ”تمہارا نام کیا ہے؟“ انہوں نے عرض کیا: میرا نام حزن ہے۔ آپ صلی ‌اللہ ‌علیہ ‌وآلہ ‌وسلم نے فرمایا: ”(نہیں) بلکہ تم سہل ہو۔“ انہوں نے کہا: میں اپنے والد کے رکھے ہوئے نام کو تبدیل نہیں کروں گا، ابن مسیب رحمہ اللہ نے فرمایا: اس کے بعد ہم میں «حُزُونَة» ”سختی“ برقرار رہی۔ رواہ البخاری۔ [مشكوة المصابيح/كتاب الآداب/حدیث: 4781]

ابووہب جشمی رضی اللہ عنہ بیان کرتے ہیں، انہوں نے کہا: رسول اللہ صلی ‌اللہ ‌علیہ ‌وآلہ ‌وسلم نے فرمایا: ”انبیاء علیہم السلام کے ناموں پر نام رکھا کرو، اللہ کے ہاں پسندیدہ نام عبداللہ اور عبدالرحمٰن ہیں، سب سے سچا نام حارث اور ہمام ہے، جبکہ سب سے قبیح نام حرب اور مرہ ہے۔“ اسنادہ ضعیف، رواہ ابوداؤد۔ [مشكوة المصابيح/كتاب الآداب/حدیث: 4782]

ابن عمر رضی اللہ عنہما بیان کرتے ہیں، دو آدمی مشرق کی (جانب) سے آئے اور انہوں نے خطاب کیا، لوگوں نے ان کے بیان پر تعجب کیا تو رسول اللہ صلی ‌اللہ ‌علیہ ‌وآلہ ‌وسلم نے فرمایا: ”بے شک بعض بیان جادو کی سی تاثیر رکھتے ہیں۔“ رواہ البخاری۔ [مشكوة المصابيح/كتاب الآداب/حدیث: 4783]

ابی بن کعب رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”بے شک بعض شعر پُر حکمت ہوتے ہیں۔“ رواہ البخاری۔ [مشكوة المصابيح/كتاب الآداب/حدیث: 4784]

ابن مسعود رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ” «هَلَكَ الْمُتَنَطِّعُونَ» ”تکلف سے کلام کرنے والے ہلاک ہو گئے۔“”آپ صلی ‌اللہ ‌علیہ ‌وآلہ ‌وسلم نے تین مرتبہ یہی فرمایا۔ (رواہ مسلم)۔ [مشكوة المصابيح/كتاب الآداب/حدیث: 4785]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”سب سے زیادہ درست بات جو کسی شاعر نے کہی وہ لبید شاعر کی یہ بات ہے: «أَلَا كُلُّ شَيْءٍ مَا خَلَا اللَّهَ بَاطِلٌ» ”سن لو! اللہ کے سوا ہر چیز فانی ہے۔““ متفق علیہ۔ [مشكوة المصابيح/كتاب الآداب/حدیث: 4786]

عمرو بن شريد اپنے والد رضی اللہ عنہ سے روایت کرتے ہیں، انہوں نے کہا: میں ایک روز رسول اللہ صلی ‌اللہ ‌علیہ ‌وآلہ ‌وسلم کے پیچھے سوار تھا، آپ صلی ‌اللہ ‌علیہ ‌وآلہ ‌وسلم نے فرمایا: ”کیا تمہیں امیہ بن ابی صلت کا کوئی شعر یاد ہے؟“ میں نے عرض کیا: جی ہاں! آپ صلی ‌اللہ ‌علیہ ‌وآلہ ‌وسلم نے فرمایا: ”سناؤ!“ میں نے آپ کو ایک شعر سنایا، آپ صلی ‌اللہ ‌علیہ ‌وآلہ ‌وسلم نے فرمایا: ”اور سناؤ!“ پھر میں نے آپ کو ایک اور شعر سنایا، آپ صلی ‌اللہ ‌علیہ ‌وآلہ ‌وسلم نے فرمایا: ”اور سناؤ!“ حتیٰ کہ میں نے آپ کو سو شعر سنائے۔ رواہ مسلم۔ [مشكوة المصابيح/كتاب الآداب/حدیث: 4787]