حدیث حاشیہ:
غلہ کی کم یابی زمانہ میں ان احادیث سے سرکاری سطح پر راشن کی تقسیم کا طریقہ ثابت ہوا۔
یہ بھی معلوم ہوا کہ راشن اچھا ہو یا ردی برابر حصہ سب کو تقسیم کرنا چاہیئے۔
آج کے دور گرانی میں راشن کی صحیح تقسیم کے لیے ان احادیث نبوی میں بڑی روشنی ملتی ہے مگر دیکھنے سمجھنے عملی جامہ پہنانے کے لیے دیدئہ بینا کی ضرورت ہے نہ کہ آج کل جیسے بددیانت تقسیم کاروں کی جن کے ہاتھوں صحیح تقسیم نہ ہونے کے باعث مخلوق خدا پریشان ہے یہ راشن تقسیم کرنے کا دوسرا واقعہ ہے۔

حدیث حاشیہ:
(1)
اہل حجاز کی پسندیدہ غذا کھجوریں تھیں۔
حضرت عائشہ رضی اللہ عنہا سے مروی ہے کہ نبی صلی اللہ علیہ وسلم نے فرمایا:
”جس گھر میں کھجور نہ ہو اس کے رہنے والے بھوکے رہتے ہیں۔
“ (جامع الترمذي، الأطعمة، حدیث: 1815) (2)
اس حدیث میں کھجور اور پانی کو "أسودین" کہا گیا ہے۔
کھجور تو سیاہ ہوتی ہے، البتہ پانی کو تغلیب کی بنا پر سیاہ کہا گیا ہے جیسا کہ والدین کو أبوين اور سورج و چاند کو قمرين کہا جاتا ہے۔