حضرت ابوحمید ساعدی رضی اللہ عنہ سے روایت ہے، انہوں نے بتایا کہ رسول اللہ صلی اللہ علیہ وسلم نے ایک عامل مقرر فرمایا؛ جب وہ اپنے کام سے فارغ ہو کر واپس آیا تو آپ صلی اللہ علیہ وسلم کی خدمت میں حاضر ہوا اور کہا: ”اللہ کے رسول! یہ آپ کا مال ہے اور یہ مجھے تحفہ دیا گیا ہے۔“ آپ صلی اللہ علیہ وسلم نے اس سے فرمایا: ”تم اپنے والدین کے گھر کیوں نہیں بیٹھے رہے، پھر تم دیکھتے کہ تمہیں کوئی تحفہ دیتا ہے یا نہیں۔“ پھر رسول اللہ صلی اللہ علیہ وسلم نماز پڑھنے کے بعد کھڑے ہوئے، خطبہ دیا اور اللہ تعالیٰ کی شایانِ شان تعریف کی، پھر فرمایا: ” «أَمَّا بَعْدُ» ”حمد و ثنا کے بعد!“ اس عامل کا کیا حال ہے؟ ہم اسے کسی کام کے لیے تعینات کرتے ہیں، وہ ہمارے پاس آ کر کہتا ہے کہ یہ تو آپ کا وصول کردہ مال ہے اور یہ مجھے تحفہ دیا گیا ہے۔ وہ اپنے والدین کے گھر کیوں نہ بیٹھا رہا، پھر وہ دیکھتا کہ اسے تحفہ دیا جاتا ہے یا نہیں۔ اس ذات کی قسم جس کے ہاتھ میں محمد صلی اللہ علیہ وسلم کی جان ہے! اگر تم میں سے کوئی اس مال میں سے کچھ خیانت کرے گا تو قیامت کے دن وہ اسے اپنی گردن پر اٹھائے لائے گا۔ اگر وہ اونٹ ہو گا تو وہ اس حال میں اسے لائے گا کہ وہ بلبلا رہا ہو گا۔ اگر وہ گائے ہو گی تو وہ اسے لائے گا اور اس کے ڈکارنے کی آواز آ رہی ہو گی، اگر بکری کی خیانت کی ہو گی تو وہ اسے اس حال میں لائے گا کہ وہ ممیاتی ہو گی۔ الغرض میں نے تمہیں اللہ کا حکم پہنچا دیا ہے۔“ حضرت ابوحمید رضی اللہ عنہ بیان کرتے ہیں کہ پھر رسول اللہ صلی اللہ علیہ وسلم نے اپنا دستِ مبارک اس قدر اوپر اٹھایا کہ ہمیں آپ صلی اللہ علیہ وسلم کی بغلوں کی سفیدی نظر آنے لگی۔ حضرت ابوحمید رضی اللہ عنہ نے مزید فرمایا: ”میرے ساتھ یہ حدیث حضرت زید بن ثابت رضی اللہ عنہ نے بھی نبی صلی اللہ علیہ وسلم سے سنی تھی، تم لوگ ان سے بھی پوچھ سکتے ہو۔“ [صحيح البخاري/كتاب الأيمان والنذور/حدیث: 6636]