حدیث حاشیہ:
جمعہ کے دن غسل کرنا موجب اجر وثواب ہے مگر یہ غسل واجب ہے یا مستحب، اس میں اختلاف ہے۔
بعض احادیث میں اس کے لیے لفظ واجب استعمال ہوا ہے اور بعض میں صیغہ امر بھی ہے جس سے اس کا وجوب ثابت ہوتا ہے مگر ایک روایت میں سمرہ ابن جندب ؓ سے ان لفظوں میں بھی مروی ہے۔
أن نبي اللہ صلی اللہ علیه وسلم قال من توضأ للجمعة فبھا ونعمت ومن اغتسل فذلك أفضل۔
(رواہ الخمسة إلا ابن ماجة)
یعنی آنحضرت صلی اللہ علیہ وسلم نے فرمایا کہ جس نے جمعہ کے لیے وضو کیا پس اچھا کیا اور بہت ہی اچھا کیا اور جس نے غسل بھی کر لیا پس یہ غسل افضل ہے۔
اس حدیث کو ترمذی نے حسن کہا ہے اسی بناءپر علامہ شوکانی فرماتے ہیں:
۔
قال النووي فحکی وجوبه عن طائفة من السلف حکوہ عن بعض الصحابة وبه قال أھل الظاھر۔
یعنی (حدیث بخاری کے تحت)
سلف میں سے ایک جماعت سے غسل جمعہ کا وجوب نقل ہوا ہے بعض صحابہ سے بھی منقول ہے اور اہل ظاہر کا یہی فتوی ہے۔
مگر دوسری روایت کی بنا پر حضرت علامہ شوکانی فرماتے ہیں:
وذھب جمھور العلماء من السلف والخلف وفقھاءالأمصار إلی أنھا مستحب۔
(نیل)
یعنی سلف اور خلف سے جمہور علماءفقہاءامصار اس طرف گئے ہیں کہ یہ مستحب ہے جن روایات میں حق اور واجب کا لفظ آیا ہے اس سے مراد تاکید ہے اور وہ وجوب مراد نہیں ہے جن کے ترک سے گناہ لازم آئے (نیل)
ہاں جن لوگوں کا یہ حال ہو وہ ہفتہ بھر نہ نہاتے ہوں اور ان کے جسم ولباس سے بدبو آرہی ہو، ان کے لیے غسل جمعہ ضروری ہے۔
حضرت علامہ عبد الرحمن مبارکپوری ؒ فرماتے ہیں۔
قلت قد جاء في ھذا الباب أحادیث مختلفة بعضھا یدل علی أن الغسل یوم الجمعة واجب وبعضھا یدل علی أنه مستحب والظاھر عندي أنه سنة مؤکدة وبھذا یحصل الجمع بین الأحادیث المختلفة واللہ تعالی أعلم۔
(تحفۃ الاحوذی)
یعنی میں کہتا ہوں کہ اس مسئلہ میں مختلف احادیث آئی ہیں بعض سے وجوب غسل ثابت ہوتا ہے اور بعض سے صرف استحباب اور میرے نزدیک ظاہر مسئلہ یہ ہے کہ غسل جمعہ سنت مؤکدہ ہے اور اسی طرح سے مختلف احادیث واردہ میں تطبیق دی جا سکتی ہے۔
احادیث مذکورہ سے یہ بھی ظاہر ہے کہ اہل دیہات جمعہ کے لیے ضرور حاضر ہوا کرتے تھے کیونکہ نبی کریم صلی اللہ علیہ وسلم کی اقتداءان کے لیے باعث صد فخر تھی اور وہ اہل دیہات بھی ایسے کہ اونٹ اور بکریوں کے چرانے والے، عسرت کی زندگی گزارنے والے، بعض دفعہ غسل کے لیے موقع بھی نہ ملتا اور بدن کے پسینوں کی بو آتی رہتی تھی۔
اگر اسلام میں اہل دیہات کے لیے جمعہ کی ادائیگی معاف ہوتی تو ضرور کبھی نہ کبھی آنحضرت ان سے فرما دیتے کہ تم لوگ اس قدر محنت مشقت کیوں اٹھاتے ہو، تمہارے لیے جمعہ کی حاضری فرض نہیں ہے مگر آپ صلی اللہ علیہ وسلم نے ایک دفعہ بھی کبھی ایسا نہیں فرمایا جس سے صاف ظاہر ہے کہ جمعہ ہر مسلمان پر فرض ہے ہاں جن کوخود صاحب شریعت نے مستثنی فرما دیا، ان پر فرض نہیں ہے۔
اس سے یہ بھی ظاہر ہوا کہ غسل جمعہ بہر حال ہونا چاہیے کیونکہ اسلام میں صفائی ستھرائی کی بڑی تاکید ہے۔
قرآن مجید میں اللہ پاک نے فرمایا:
﴿اِنَّ اللّٰہَ یُحِبُّ التَّوَّابِینَ وَیُحِبُّ المُتَطَھَّرِینَ ﴾ (البقرۃ: 222)
”بے شک اللہ پاک توبہ کرنے والوں اور پاکی حاصل کرنے والوں کو دوست رکھتا ہے۔
“ غسل بھی پاکی حاصل کرنے کا اہم ذریعہ ہے، اسلام میں یہ اصول مقرر کیا گیا کہ بغیر پاکی حاصل کئے نماز ہی درست نہ ہوگی جس میں بوقت ضرورت استنجائ، غسل، وضو سب طریقے داخل ہیں۔
حجۃ الہند حضرت شاہ ولی اللہ محدث دہلوی فرماتے ہیں۔
قال النبی صلی اللہ عله وسلم الطھور شطر الإیمان۔
أقول المراد بالإیمان ھھنا ھیئة نفسانیة مرکبة من نور الطھارة والأخبات والإحسان أوضح منه في هذا المعنی ولا شك أن الطھور شطرہ۔
(حجۃ اللہ البالغۃ)
یعنی نبی کریم صلی اللہ علیہ وسلم نے فرمایا کہ ”طہارت نصف ایمان ہے“ میں کہتاہوں کہ یہاں ایمان سے ایک ایسی ہیئت نفسانیہ مراد ہے جو نور طہارت اور خشوع سے مرکب ہے اور لفظ احسان اس معنی میں ایمان سے زیادہ واضح ہے اور اس میں کوئی شک نہیں کہ طہارت اس کانصف ہے۔
خلاصۃ المرام یہ کہ جمعہ کے دن خاص طور پر نہا دھوکر خوب پاک صاف ہو کر نماز جمعہ کی ادائیگی کے لیے جانا موجب صداجر وثواب ہے اور نہانے دھونے سے صفائی ستھرائی کا حصول صحت جسمانی کے لیے بھی مفید ہے۔
جو لوگ روز انہ غسل کے عادی ہیں ان کا تو ذکر ہی کیا ہے مگر جو لوگ کسی وجہ سے روزانہ غسل نہیں کر سکتے کم از کم جمعہ کے دن وہ ضرورضرورغسل کر کے صفائی حاصل کریں۔
جمعہ کے دن غسل کے علاوہ بوقت جنابت مرد وعورت دونوں کے لیے غسل واجب ہے، یہ مسئلہ اپنی جگہ پر تفصیل سے آچکا ہے۔

حدیث حاشیہ:
(1)
عوالی، مدینہ کے بالائی علاقے میں تین چار میل پر واقع آبادی کو کہتے ہیں۔
معلوم ہوا اتنی مسافت پر رہنے والوں کو شہر کی مساجد میں جمعہ کے لیے حاضر ہونا ضروری نہیں۔
اگر ضروری ہوتا تو باری باری آنے کی بجائے سب کے سب حاضر ہوتے۔
ان حضرات کا باری باری آنا تعلیم کے لیے تھا جیسا کہ حضرت عمرؓ اور ایک انصاری صحابی باری باری مسجد نبوی میں حصول علم کے لیے حاضر ہوتے تھے۔
(2)
اس حدیث سے کئی ایک چیزوں کا پتہ چلتا ہے، مثلاً:
٭ عالم دین کو طلباء کے ساتھ نرمی کرنی چاہیے۔
٭ اہل خیر کی مجالس میں نظافت اور صفائی کا خیال رکھنا چاہیے۔
٭ مسلمان کی اذیت رسانی سے اجتناب کرنا چاہیے۔
٭ صحابۂ کرام رضی اللہ عنہم امتثال اوامر پربڑے حریص تھے اگرچہ انہیں مشقت اٹھانا پڑتی تھی۔