تخریج:
«أخرجه البيهقي: 2 /369، وأخرج البخاري صدر الحديث، المغازي، حديث:4349.» تشریح:
1. آپ نے حضرت علی رضی اللہ عنہ کے مکتوب میں اہل یمن کے اسلام قبول کرنے کی خبر پڑھ کر سجدۂ شکر ادا کیا۔
مسلمانوں کی تعداد میں اضافہ باعث خوشی اور مقام مسرت ہے اور یہ بھی ایک عظیم نعمت الٰہی ہے‘ اس لیے بطور شکرکے سجدۂ شکر بجا لانا مشروع ہے۔
2. ایک وہ وقت تھا جب مسلمانوں کی کثرت تعداد باعث مسرت اور موجب انبساط ہوا کرتی تھی اور اب یہ دور ہے کہ مسلمان بچوں کی پیدائش روکنے کی شب و روز سکیمیں اور عملی تدبیریں بروئے کار لانے کی کوششیں کی جا رہی ہیں‘ اور ستم ظریفی یہ ہے کہ حکومتی سطح پر زور و شور سے اس مہم کو چلایا جا رہا ہے اور کروڑہا روپیہ اسے کامیاب بنانے پر صرف کیا جا رہا ہے۔

حدیث حاشیہ:
اسماعیل کی روایت میں ہے کہ جب ہم حضرت علی ؓ کے ساتھ پھر یمن کو لوٹ گئے تو کافروں کی ایک قوم ہمدان سے مقابلہ ہوا۔
حضرت علی ؓ نے ان کو آنحضرت ا کاخط سنایا۔
وہ سب مسلمان ہوگئے۔
حضرت علی ؓ نے یہ حال آنحضرت صلی اللہ علیہ وسلم کو لکھا۔
آپ نے سجدئہ شکر ادا کیا اور فرمایا ہمدان سلامت رہے۔

حدیث حاشیہ:
ایک روایت میں ہے کہ جب ہم لوٹ کر حضرت علی ؓ کے ہمراہ یمن گئے تو قوم ہمدان سے ہمارا مقابلہ ہوا۔
حضرت علی ؓ نے انھیں رسول اللہ صلی اللہ علیہ وسلم کا خط پڑھ کرسنایا تو وہ سب مسلمان ہوگئے۔
حضرت علی ؓ نے اس واقعے کی اطلاع جب رسول اللہ صلی اللہ علیہ وسلم کو دی تو آپ نے سجدہ شکرادا کیا اورفرمایا:
"ہمدان سلامت رہے۔
"(السنن الکبری للبیهقي: 369/2 و فتح الباري: 83/8)
ایک روایت میں ہے کہ حضرت علی ؓ کو رسول اللہ صلی اللہ علیہ وسلم نے جب یمن بھیجنے کا ارادہ کیاتو انھوں نے عرض کی:
اللہ کے رسول صلی اللہ علیہ وسلم ! آپ مجھے ایسی قوم کی طرف بھیج رہ ہیں جن کے افراد عمر رسیدہ ہیں جبکہ میں ابھی نوعمر ہوں، فیصلہ کرنے کی پوری صلاحیت نہیں رکھتا۔
رسول اللہ صلی اللہ علیہ وسلم نے میرے سینے پر ہاتھ رکھ کردعا فرمائی:
"اے اللہ! اس کی زبان کو ثابت رکھ، اس کے دل کی رہنمائی فرما۔
" نیز آپ نے فرمایا:
"جب تیرے پاس کوئی معاملہ آئے تو فریقین کے بیان سن کر پھر فیصلہ کرنا۔
"(مسند أحمد: 111/1)