سیدنا ابن عباس رضی اللہ عنہما سے مروی ہے، انہوں نے کہا: ”جب کوئی عورت ایسی ہوتی کہ اس کے بچے زندہ نہ رہتے، تو وہ نذر مان لیا کرتی تھی کہ اگر اس کا بچہ زندہ رہا تو وہ اسے یہودی بنا ڈالے گی۔ سو جب بنو نضیر کو مدینے سے جلا وطن کیا گیا تو ان میں انصاریوں کے لڑکے بھی تھے (جو اس قسم کی نذر کے تحت یہودی بنائے گئے تھے)۔ انہوں نے کہا: ہم اپنے بچوں کو نہیں چھوڑیں گے (ان کے ساتھ نہیں جانے دیں گے)، تو اللہ تعالیٰ نے یہ آیت نازل فرمائی: ﴿لَا إِكْرَاهَ فِي الدِّينِ قَدْ تَبَيَّنَ الرُّشْدُ مِنَ الْغَيِّ﴾ [سورة البقرة: 256] ”دین میں کوئی جبر و اکراہ نہیں۔ ہدایت، گمراہی کے مقابلے میں واضح اور نمایاں ہو چکی ہے۔“”امام ابوداؤد رحمہ اللہ فرماتے ہیں: ” «الْمِقْلَاةُ» وہ عورت ہوتی ہے جس کے بچے زندہ نہ رہتے ہوں۔“ [سنن ابي داود/كتاب الجهاد /حدیث: 2682]