سبرہ بن عبدالعزیز بن ربیع جہنی اپنے والد سے، وہ ان کے دادا (رضی اللہ عنہ) سے روایت کرتے ہیں کہ نبی کریم صلی اللہ علیہ وسلم نے (ان کے علاقے میں) ایک بڑے درخت کے نیچے پڑاؤ کیا جہاں اب مسجد ہے، آپ صلی اللہ علیہ وسلم وہاں تین دن ٹھہرے، پھر وہاں سے تبوک کی طرف روانہ ہوئے اور قبیلہ جہینہ کے لوگوں نے آپ صلی اللہ علیہ وسلم سے ایک کھلے میدان میں ملاقات کی تھی۔ آپ صلی اللہ علیہ وسلم نے ان سے پوچھا: ”مقام ذی مروہ میں کون لوگ مقیم ہیں؟“ انہوں نے کہا: ”جہینہ کا خاندان بنو رفاعہ یہاں رہتا ہے۔“ آپ صلی اللہ علیہ وسلم نے فرمایا: ”یہ زمین میں بنو رفاعہ کے نام کرتا ہوں۔“ چنانچہ ان لوگوں نے وہ (زمین) آپس میں بانٹ لی، ان میں سے کسی نے بیچ دی، کسی نے رکھ لی اور اس میں محنت مشقت (کاشت کاری وغیرہ) کرنے لگے۔ (ابن وہب رحمہ اللہ کہتے ہیں کہ) پھر میں نے سبرہ کے والد عبدالعزیز سے اس حدیث کے متعلق پوچھا تو انہوں نے اس کا کچھ حصہ بیان کیا اور پوری حدیث بیان نہیں کی۔ [سنن ابي داود/كتاب الخراج والفيء والإمارة /حدیث: 3068]