فوائد:
➊ ان احادیث میں اللہ تعالیٰ کی رضا کی خاطر مساجد تعمیر کرنے کی فضیلت و عظمت کا بیان ہے کہ مسجد کے تعمیر کرنے والے کا جنت میں گھر تعمیر کر دیا جاتا ہے۔ خواہ مسجد چھوٹی اور چند نمازیوں پر مشتمل ہو، بشرطیکہ رضائے الٰہی ملحوظ اور شہرت و ریا کاری مطلوب نہ ہو، ورنہ یہی بیش قیمت عمل جزا کی بجائے سزا کا روپ دھار لے گا۔
➋ جو شخص اللہ تعالیٰ کی رضا کے لیے مسجد تعمیر کرے اس کی مثل جنت میں گھر تعمیر کر دیا جاتا ہے۔
◈ امام نووی رحمہ اللہ کہتے ہیں کہ اس کے دو معنی ہو سکتے ہیں:
(الف) مسجد تعمیر کرنے والے کا اس مسجد کی مثل جنت میں گھر تعمیر کر دیا جائے گا، لیکن جنت کے گھر کی وسعت کی فضیلت معلوم نہیں ہے کہ (یہاں فقط تشبیہ مقصود ہے) جبکہ جنت کی چیزیں ایسی ہیں، جنہیں نہ کسی آنکھ نے دیکھا نہ کسی کان نے سنا اور نہ کسی بشر کے دل میں ان کا احساس جاگزیں ہوا ہے (یعنی یہاں فقط تشبیہ مقصود ہے باقی اس کی تعمیر کا انداز، خوبصورتی و زیبائش اور حسن و عمدگی دنیا کی مسجد سے کہیں جاذب نظر، پر کشش اور عمدہ تر ہوگی۔)
(ب) دوسرا مفہوم یہ ہے کہ اس گھر کا جنت کے محلات میں مرتبہ ویسا ہی افضل ہوگا جیسے دنیوی گھروں سے مسجد افضل ہوتی ہے۔ [شرح النووي: 14/5]